|
དགག་དང་སྒྲུབ་པ་ཇི་སྙེད་པ། །འགལ་འབྲེལ་ཉིད་ལ་ལྟོས་པས་ན། །ཚད་མའི་མཚན་ཉིད་དཔྱོད་པ་ཡི།
།སྔོན་དུ་འགལ་འབྲེལ་དཔྱད་པར་
བྱ། །ཆོས་གཉིས་གཅིག་པ་མི་སྲིད་ཅིང་། །གཅིག་ལ་འབྲེལ་པ་མི་སྲིད་པས། །རང་རང་ངོ་བོ་ལ་གནས་པའི།
།དངོས་པོ་ཐམས་ཅད་འབྲེལ་མེད་
ཡིན། །དངོས་མེད་ལ་ཡང་དངོས་འབྲེལ་ནི། །ཡོད་ཅེས་བླུན་པོ་འགའ་ཞིག་སྨྲ། །དངོས་མེད་ངོ་བོ་མེད་པ་ལ།
།འབྲེལ་པ་ཡོད་ན་དངོས་པོར་
འགྱུར། །ཆོས་གང་ཆོས་གཞན་མི་འདོར་བ། །འབྲེལ་པ་རྣམས་ཀྱི་སྤྱི་མཚན་ཏེ། །དངོས་པོ་འདྲེ་བ་མེད་ཕྱིར་དང་།
།དངོས་མེད་ངོ་བོ་མེད་ཕྱིར་
མེད། །བདག་གཅིག་པ་ལ་ཆོས་གཉིས་མེད། །ཆོས་གཉིས་མེད་ལ་འབྲེལ་མི་སྲིད། །དེས་ན་བྱས་དང་མི་རྟག་པ།
།དོན་གྱི་སྟེང་ན་འབྲེལ་བ་མེད།།
གལ་ཏེ་བྱས་དང་མི་རྟག་པའི་། །ལྡོག་པ་སྒྲ་ལ་མ་གྲུབ་ན། །ཚུལ་གསུམ་གྲུབ་པ་མི་སྲིད་པས།
།དོན་ལ་བདག་གཅིག་འབྲེལ་ཞེ་ན། །རྫས་གཅིག་
དོན་མཐུན་ལྡོག་པ་རྣམས། །དོན་ལ་ཡོད་ན་ལྡོག་པ་ནི། །མ་འབྲེལ་རྟགས་མིན་འབྲེལ་ན་ཡང་།
།རྣམ་གྲངས་པ་འམ་འབྲས་བུར་འགྱུར། །སྔ་ཕྱི་
མིན་ལ་དེ་བྱུང་མེད། །སྔ་ཕྱི་ཡོད་ན་གང་རུང་མེད། །དེས་ན་དངོས་དང་དངོས་མེད་ལ།
།དེ་ལས་བྱུང་བའི་འབྲེལ་པ་མེད། །འགགས་པ་དང་ནི་
སྐྱེས་པ་ལ། །སྦྱོར་བའི་འབྲེལ་པ་ཡོད་ཅེ་ན། །སྦྱོར་འབྲེལ་རྟག་ན་དངོས་པོ་མིན།
།མི་རྟག་ན་ནི་ཐུག་མེད་འགྱུར། །གལ་ཏེ་ཕན་ཚུན་མ་བལྟོས་
པའི། །མེ་དུད་འབྲེལ་པ་ཡིན་ཞེ་ན། །རྐྱང་པ་རེ་རེ་མཐོང་བས་ཀྱང་། །གཉིས་ཀའི་འབྲེལ་པ་ངེས་པར་འགྱུར།
།རྒྱུ་འབྲས་ཕན་ཚུན་བལྟོས་ནས་
ཕན། །འདོགས་ཕྱིར་འབྲེལ་པ་མི་འགལ་ན། །རྒྱུ་འབྲས་དངོས་པོ་དངོས་མེད་ལ། །ཕན་བྱ་ཕན་བྱེད་འཐད་པ་དཀའ།
།མེད་ན་མི་འབྱུང་འབྲེལ་
ཡིན་ན། །གཡས་གཡོན་སོགས་ཀྱང་འབྲེལ་པར་འགྱུར། །དོན་ལ་མེད་ན་མི་འབྱུང་བའི།
།འབྲེལ་པ་རྫས་ལྡོག་བརྟགས་པས་ཁེགས། །རང་གི་
མཚན་ཉིད་འབྲེལ་མེད་ཀྱང་། །རྒྱུ་འབྲས་རིགས་ལ་འབྲེལ་ཞེ་ན། །རིགས་དེ་རྒྱུ་འབྲས་ཉིད་ཡིན་ན།
།སྔར་གྱི་སྐྱོན་ལས་འདས་པ་མེད། །དེ་ལས་
གཞན་པའི་རིགས་ཡོད་ན། །སྤྱི་ཡི་སྐབས་སུ་བཀག་ཟིན་ཏོ། །འདིས་ནི་ལྡན་དང་འདུ་བ་དང་།
།ཁྱད་པར་དང་ནི་ཁྱད་པར་ཅན། །བྱེད་དང་
ཕྲད་པ་ལ་སོགས་པ། །འབྲེལ་པར་འདོད་པ་བཀག་པ་ཡིན། །འཁར་གཞོང་ལ་ནི་རྒྱ་ཤུག་བརྟེན།
།དེ་ནི་ལྡན་པའི་འབྲེལ་ཞེས་ཟེར། །རྟག་པའི་
རྟེན་ལ་མི་རྟག་པ། །འབྲེལ་པ་འཕྲོད་པ་འདུ་ཞེས་གྲགས། །བྱས་དང་མི་རྟག་ལ་སོགས་པ།
།དོན་གཅིག་ལ་ནི་འདུ་ཞེས་སྨྲ། །ཐ་དད་གཞན་གྱིས་
གཞན་གོ་བ། །ཁྱད་པར་བྱེད་ཆོས་འབྲེལ་ཞེས་འདོད། །འགགས་པའི་རྒྱུ་དང་ད་ལྟར་གྱི།
།འབྲས་བུ་འབྲེལ་པ་སྦྱོར་འབྲེལ་ལོ། །བདག་དང་བྱ་
བ་རྣམ་གཉིས་ལ། །བྱེད་པའི་འབྲེལ་པ་ཡོད་དོ་ལོ། །མིག་གིས་གཟུགས་ལ་བལྟ་བ་ལ།
།ཕྲད་པའི་འབྲེལ་པ་ཡིན་ཞེས་ཟེར། །རྗེ་ཁོལ་ཁྱོ་ཤུག་ལ་
སོགས་ཀྱང་། །འབྲེལ་པ་ཡིད་ཞེས་རྨོངས་པ་སྨྲ། །དོན་ལ་འབྲེལ་པ་འདོད་པ་ནི། །གཅིག་དང་ཐ་དད་བརྟགས་པས་ཁེགས།
།ལྡན་པ་སོགས་
ལའང་གཞན་སེལ་གྱིས། །སྦྲེལ་ན་གོ་བྱེད་ཡིན་ཞེ་ན། །ལྡན་པ་ཅན་སོགས་གནོད་བྱེད་ཡོད།
།གནོད་བྱེད་མེད་ན་གཉིས་པོར་འདུས། །ཇི་ལྟར་
གནོད་པ་ཡོད་ཅེ་ན། །གཞན་ཡང་གྲངས་ཅན་འདོད་པ་ཡི། །ལྕགས་གོང་དང་ནི་མེ་བཞིན་དུ།
།འདྲེས་པ་རྣམས་དབྱེར་མེད་ཅེ་ན། །ཆོས་ཀྱི་
གྲགས་པས་བོར་བ་ཡི། །ངན་རྟོག་ཕལ་ཆེར་བླུན་པོ་ལེན། །སྐྱུགས་སྨན་བཏང་ནས་སྐྱུགས་པ་ལ།
།ཁྱི་ལས་གཞན་པ་སུ་ཞིག་ཟ། །བར་སྐབས་ཀྱི་
ཚིགས་སུ་བཅད་པའོ། །རྣམ་རྟོག་ཡུལ་ལ་འཇིག་རྟེན་གྱི། །ཐ་སྙད་བཞིན་དུ་དབྱེ་བསྡུ་དང་།
།སྔ་ཕྱི་རྟོག་པས་སྦྲེལ་བ་ཡིས། །འཇུག་ཡུལ་བསྒྲུབ་
ཕྱིར་འབྲེལ་པར་འཐད། །བྱས་དང་མི་རྟག་བློས་སྦྲེལ་བ། །དོན་ལ་གྲུབ་ན་དོན་འབྲེལ་ཡིན།
།དོན་ལ་དེ་དག་མ་གྲུབ་ན། །དོན་གྱི་སྒྲུབ་བྱེད་མིན་
ཞེ་ན། །བརྟགས་པ་དོན་ལ་འཇུག་པ་དང་། །མི་འཇུག་པ་སྟེ་རྣམ་པ་གཉིས། །འཇུག་པས་འཇུག་ཡུལ་ཐོབ་པ་ན།
།འབྲེལ་པ་ཉིད་དེ་ཅིག་ཤོས་
མིན། །མེད་ན་མི་འབྱུང་དུ་བ་ལ། །མེད་ན་དེ་ནི་རྒྱུ་མེད་འགྱུར། །ཡོད་ན་དེ་ཉིད་དངོས་པོ་ཡི།
།འབྲེལ་པ་ཉིད་དུ་འགྱུར་ཞེ་ན། །དོན་གྱི་དུ་བ་
མེ་མེད་ན། །མི་འབྱུང་བ་ཙམ་ཡོད་མོད་ཀྱང་། །སྔ་ཕྱི་བཟུང་ནས་སྦྲེལ་བ་ནི། །རྟོག་པ་མིན་པས་སྦྲེལ་མི་ནུས།
།མཚན་ཉིད་དང་ནི་མཚོན་བྱ་
དང་། །སྤྱི་དང་བྱེ་བྲག་འབྲེལ་པ་ཡང་། །འཁྲུལ་པས་དངོས་པོ་གཅིག་ཉིད་དུ། །བརྟགས་པས་འགྲུབ་ཀྱི་གཞན་དུ་མིན།
།གང་ཡོད་དེ་འཇིག་
བུམ་པ་བཞིན། །སྒྲ་ཡང་ཡོད་ཅེས་རང་བཞིན་རྟགས། །སྐྱེས་པ་ཁོ་ན་འཇིག་པ་ཡིན།
།དེ་འཇིག་བྱེད་གཞན་མི་དགོས། །འཇིག་པ་རྒྱུ་གཞན་ལ་
བལྟོས་ཕྱིར། །ལྟོས་མེད་འདི་ནི་མ་གྲུབ་ལོ། །འཇིག་པར་བྱ་རྒྱུའི་དངོས་པོ་དང་།
།ཞིག་པ་དངོས་མེད་གཉིས་ཀ་ལ། །འཇིག་པའི་སྒྲ་དོན་འཇུག་
མོད་ཀྱི། །གཉིས་ཀ་ལ་ཡང་རྒྱུ་མི་དགོས། །བུམ་འཇིག་དངོས་མེད་རྒྱུ་མི་ལྟོས།
།དགོས་ནའང་རང་གྲུབ་རྒྱུ་ཅི་དགོས། །གཞན་རྒྱུས་བྱས་པས་དེ་
མི་འཇིག །དེས་ན་འཇིག་པ་རྒྱུ་མེད་གྲུབ། །འཇིག་པ་དངོས་མེད་རྒྱུས་བྱེད་ཅེས།
།སྨྲ་ན་ལྟོས་མེད་ཤུགས་ལ་གྲུབ། །དངོས་མེད་རྒྱུ་ཡིས་བྱེད་པ་
དང་། །རྒྱུ་ཡིས་ཅི་ཡང་མི་བྱེད་པ། །དོན་མཚུངས་དཔེར་ན་མེད་པ་ལ། །ལྟ་དང་བལྟ་རྒྱུ་མེད་པ་བཞིན།
།ཚོགས་པ་ཚང་ཡང་མྱུ་གུ་བཞིན། །ལྟོས་
མེད་འདི་ཡང་མ་ངེས་ལོ། །ཚོགས་པ་དེ་དག་འགྱུར་བ་ལ། །ལྟོས་པའི་ཕྱིར་ན་མ་ངེས་མིན།
།བྱས་པའང་དུས་ལ་བལྟོས་ཤེ་ན། །དུས་ལ་བལྟོས་
ན་བྱས་པ་དེ། །འགྱུར་ན་འཇིག་པ་ལྟོས་མེད་གྲུབ། །མི་འགྱུར་སྔར་བཞིན་འཇིག་མེད་གནས།
།ཚོགས་པ་འགྱུར་མེད་གཅིག་ཡིན་པས། །གཏན་
ཚིགས་འདི་ནི་མ་གྲུབ་ལོ། །ཚོགས་པས་ཕྱི་ནས་བསྐྱེད་པ་ལྟར། །གཅིག་ཕྱིར་དང་པོ་བསྐྱེད་པར་འགྱུར།
།གཅིག་ཉིད་ན་ཡང་གེགས་ཡོད་ཕྱིར། །
མྱུ་གུ་བསྐྱེད་པར་མི་ངེས་ན། །གེགས་ཅན་གེགས་མེད་ཐ་དད་ཕྱིར། །གཅིག་ཏུ་འདོད་ཀྱང་གཉིས་སུ་འགྱུར།
།ནས་ཀྱི་རྒྱུ་ཚོགས་སཱ་ལུ་ཡི། །མྱུ་གུ་
བསྐྱེད་ལ་བལྟོས་མོད་ཀྱང་། །སཱ་ལུས་མྱུ་གུ་མི་བསྐྱེད་པས། །གཏན་ཚིགས་འདི་ནི་མ་ངེས་ལོ།
།སཱ་ལུའི་ས་བོན་ལ་བལྟོས་ཕྱིར། །ལྟོས་མེད་ཡིན་
པའི་རྟགས་མ་གྲུབ། །བྱས་ཡོད་སྐད་ཅིག་འཇིག་པ་མིན། །འཇིག་པའི་རྒྱུ་ལ་བལྟོས་ཤེ་ན།
།མྱུ་གུ་རང་རང་རྒྱུ་ལ་བལྟོས། །དངོས་འཇིག་རྒྱུ་
གཞན་ལ་མི་ལྟོས། །འཇིག་པ་དངོས་མེད་རྒྱུ་མི་དགོས། །དེས་ན་འཇིག་བྱེད་གཞན་མི་དགོས།
།དངོས་འགལ་རྫས་གཅིག་འགྱུར་པ་དང་། །དེ་
ཉིད་གཞན་དུ་མི་འཐད་དང་། །ཐོགས་བཅས་ཐོགས་མེད་མཚུངས་པ་ཡི། །ཐལ་བ་གསུམ་གྱིས་འདིར་མི་འགོག
།བྱ་རོག་དཀར་པོ་སྲིད་པ་
ལྟར། །དངོས་པ་རྟག་པ་མི་འགལ་ཟེར། །རྟག་དེས་དོན་བྱེད་མི་ནུས་ན། །དངོས་མེད་ཡིན་ཕྱིར་དོན་ལ་མཐུན།
།ནུས་དེ་འགྱུར་ན་རྟག་པ་
ཉམས། །འགྱུར་བ་མེད་ན་བྱེད་པ་འགལ། །གང་གང་བྱེད་མིན་དེ་དངོས་མེད། །མཁའ་བཞིན་རྟག་པའང་བྱེད་པས་སྟོང་།
།ཆོས་ཅན་རྟག་པའི་
གཞན་སེལ་ཡིན། །དངོས་པོ་བཀག་ཉིད་བསྒྲུབ་བྱའི་ཆོས། །ཕྱོགས་ཆོས་མངོན་སུམ་གྱིས་གྲུབ་ཟེར།
།དགག་བྱ་འཛིན་པ་སྐྱེ་མི་དགོས། །ལ་ལ་
རྟོག་མྱོང་གཅིག་ཡིན་ལོ། །ལོག་རྟོག་ཉིད་ཀྱང་མི་སྲིད་འགྱུར། །དེས་ན་སྐད་ཅིག་གིས་སྟོང་ལ།
།དོན་བྱེད་འགོག་པའི་རྟགས་ཀྱིས་འགྲུབ། །རང་
བཞིན་རྟགས་ཀྱང་གནས་སྐབས་རྣམས། །འགྱུར་ཕྱིར་དོན་བྱེད་འཐད་ཅེ་ན། །གཉིས་པོ་གཅིག་ན་ཆོས་གཉིས་འགལ།
།ཐ་དད་ཡིན་ན་བྱེད་པ་
འགལ། །སྐད་ཅིག་འཇིག་པ་མེད་ན་ཡང་། །རགས་པའི་འགྱུར་བ་ཡོད་ཅེ་ན། །དང་པོ་སྐད་ཅིག་མི་འཇིག་ན།
།རགས་པའི་འགྱུར་བ་ག་ལ་
སྲིད། །དོན་བྱེད་ནུས་པ་བཀག་པ་ལ། །དངོས་པོ་མེད་པས་ཁྱབ་པ་འགྲུབ། །གནོད་པ་ཅན་གྱི་ལམ་སྦྱོང་དུ།
།ལྟོས་མེད་འཆད་པ་དགོངས་པ་
མིན། །དེས་ན་ལོག་རྟོག་རྣམ་གཉིས་ཀྱི། །གཉེན་པོ་གཏན་ཚིགས་རྣམ་གཉིས་གསུངས།
།རྒྱུ་འབྲས་ཕྲུགས་ལྔས་ངེས་ཞེས་ཟེར། །ཧ་ཅང་ཐལ་ཕྱིར་
འདི་མི་འཐད། །རྒྱུ་འབྲས་ཕན་འདོགས་བྱ་བྱེད་ཡིན། །རྒྱུ་ཡང་ཉེར་ལེན་ལྷན་ཅིག་བྱེད།
།དེ་ཡང་རྗེས་སུ་འགྲོ་ལྡོག་གི། །སྒོ་ནས་ཕྲུགས་གསུམ་
རྣམ་པ་གཉིས། །མཚན་ཉིད་མི་འགྲུབ་ཧ་ཅང་ཐལ། །གཞན་དུ་འཁྲུལ་པས་འདིར་མི་གནོད།
།གང་དག་རྒྱུ་མིན་ལས་སྐྱེས་པ། །དེ་ནི་དེ་ཡི་
འབྲས་བུ་མིན། །རྣམ་པ་འདྲ་བས་འཁྲུལ་པ་ལ། །དེ་ཡི་མིང་གིས་བཏགས་པར་ཟད། །རྡོ་དང་ཤིང་སོགས་མེ་རྒྱུ་མིན།
།མེ་རྒྱུ་མེ་ཡི་རྡུལ་ཕྲན་
ཡིན། །རྡུལ་ཕྲན་གཅིག་ཏུ་སྡུད་པའི་རྒྱུ། །རྡོ་ཤིང་སོགས་ཡིན་དབང་པོ་བཞིན།
།ཡང་ན་སྔོན་དང་ཕྱི་མ་ཡི། །རྒྱུ་དང་འབྲས་བུ་ཐ་དད་ཡོད། །
མེ་དང་དུ་བས་བསྐྱེད་པ་ཡི། །འབྲས་བུ་དུ་བའི་ཁྱད་པར་བཞིན། །རང་མཚན་དང་ནི་སྒྲ་དོན་གཉིས།
།འབྲེལ་པ་མཚན་གཞིར་མི་འཐད་པས། །
སྒྲ་ཡི་དོན་ལ་རང་མཚན་དུ། །འཁྲུལ་པའི་གཞན་སེལ་ཁོ་ན་ཡིན། །བདེ་བྱེད་དགའ་བ་དཔྱོད་པ་ཡིས།
།འབྲེལ་པ་ངེས་པར་བྱེད་ཅེས་གྲག །ཉི་
འོག་པ་རྣམས་ཚད་མ་ཡིས། །འབྲེལ་པ་ངེས་པར་བྱེད་པར་འདོད། །ཚད་མའི་སྟོབས་ཀྱིས་བསྐྱེད་པ་ཡི།
།གཞན་སེལ་ངེས་པའི་བདག་ཉིད་
ཅན། །འཁྲུལ་པས་དངོས་པོ་གཅིག་ཉིད་དུ། །རྟོག་དཔྱོད་དེ་ཡིས་འབྲེལ་པ་ངེས། །དངོས་པོའི་དོན་ལ་འབྲེལ་པ་མེད།
།འབྲེལ་པ་གཉིས་ཀྱང་སྒྲོ་
བཏགས་ཡིན། །སྒྲ་ཡི་དོན་ལ་རང་མཚན་དུ། །འཁྲུལ་པས་འབྲེལ་པའི་རྟོག་པ་སྐྱེ།
།ཞེས་བྱ་བ་བསྡུ་བའི་ཚིགས་སུ་བཅད་པའོ། །ཚད་མ་རིགས་
པའི་གཏེར་ལས་འབྲེལ་པ་བརྟག་པའི་རབ་ཏུ་བྱེད་པ་སྟེ་དྲུག་པའོ།། །།
กก |