|
གཞན་དོན་རྗེས་དཔག་རང་ཉིད་ཀྱིས། །མཐོང་བ་གཞན་ལ་སྟོན་པའི་ངག །རྒོལ་དང་ཕྱིར་རྒོལ་དཔང་པོ་གསུམ།
།སྒྲུབ་དང་སུན་འབྱིན་བརྡ་
སྤྲོད་པའོ། །རྒོལ་བ་གཉིས་ལ་སྐྱོན་ཡོན་ཀྱིས། །ཚར་གཅད་པ་དང་རྗེས་འཛིན་འཇུག
།དེ་ལྟར་སྟོན་ན་རྒྱལ་ཕམ་ཡོད། །མིན་ན་གཉིས་ཀ་མེད་
པར་གསུངས། །རྫུན་དང་གཡོ་སྒྱུས་ཚར་གཅད་ཀྱང་། །དེ་ལ་རྒྱལ་ཕམ་མི་བཞེད་དོ།
།འཕྲོག་དང་སྦྱིན་པས་འཇིག་རྟེན་པ། །ཚར་གཅད་པ་དང་
རྗེས་འཛིན་འདོད། །གྲུབ་མཐའ་བླང་དོར་བྱེད་པ་ལ། །དམ་པའི་ཚར་གཅད་རྗེས་འཛིན་འདོད།
།ཚར་གཅད་གཉིས་ལས་ཕྱེ་བའི་བཞི། །རིགས་
པ་མཁྱེན་པའི་དགོངས་པ་ཡིན། །རྒོལ་བ་ལ་ནི་གསུམ་གཉིས་དྲུག །ཕྱིར་རྒོལ་ལ་ཡང་གསུམ་གཉིས་དྲུག
།དཔང་པོ་ལ་གསུམ་ཀུན་ལ་གཅིག །
གངས་ཅན་པ་རྣམས་བཅུ་དྲུག་འདོད། །ཚར་གཅད་ཡིན་ན་སྔ་མར་འདུས། །མིན་ན་ཚར་གཅད་ཉིད་མ་ཡིན།
།དཔང་པོ་ལ་ནི་ཚར་གཅད་མེད། །
ཅི་ནས་བྱེད་ན་ཧ་ཅང་ཐལ། །དམ་བཅའ་ལ་གནོད་དམ་བཅའ་གཞན། །དམ་བཅའ་འགལ་དང་དམ་བཅའ་སེལ།
།གཏན་ཚིགས་གཞན་དང་
དོན་གཞན་དང་། །དོན་མེད་པ་དང་དོན་མི་ཤེས། །དོན་བྲལ་དུས་ལ་མ་བབ་དང་། །མ་ཚང་ལྷག་དང་ཡང་བརྗོད་དང་།
།རྗེས་སུ་མི་སྨྲ་མི་ཤེས་
དང་། །སྤོབས་པ་མེད་དང་རྣམ་གཡེང་དང་། །འདོད་པ་ཁས་ལེན་བརྒལ་བརྟག་འདོར། །རྗེས་སུ་སྦྱོར་མེད་ལ་སྦྱོར་དང་།
།གྲུབ་མཐའ་ཉམས་
དང་རྟགས་ལྟར་སྣང་། །ཐུབ་པ་རྐང་མིག་གིས་བཤད་བའི། །ཚར་གཅད་ཉི་ཤུ་རྩ་གཉིས་ཡིན།
།དེ་ལ་དཔལ་ལྡན་གྲགས་པ་ཡིས། །འགའ་ཞིག་
ཚར་གཅད་མིན་པར་བཤད། །ཚར་གཅད་ཡིན་ན་གཉིས་པོར་སྡུད། །དམ་བཅའ་ལ་གནོད་ཚར་གཅད་ནི།
།སྒྲུབ་པའི་ཡན་ལག་མིན་བརྗོད་ཡིན།།
དམ་བཅའ་གཞན་པའི་ཚར་གཅད་ནི། །སུན་འབྱིན་ཤེས་ན་མ་ངེས་འདུས། །དམ་བཅའ་རྟགས་སོགས་འགལ་བ་ནི།
།དམ་བཅའ་བརྗོད་ན་ལྷག་
པའི་སྐྱོན། །མ་བརྗོད་རྟགས་ཀྱི་སྐྱོན་གསུམ་འགྱུར། །རྟགས་ལ་སྐྱོན་མེད་ཚར་གཅད་མིན།
།དམ་བཅའ་སེལ་བ་མ་ངེས་འདུས། །ཚར་གཅད་
གཉིས་པ་དོན་མེད་ཡིན། །གཏན་ཚིགས་གཞན་པ་ངག་རྫོགས་ན། །མ་ངེས་མ་རྫོགས་ཚར་གཅད་མིན།
།དོན་གཞན་རྒོལ་བ་མ་ངེས་པས། །ཚར་
གཅད་ཕྱིར་རྒོལ་སྐྱོན་མིན་པ། །བརྗོད་པའི་སྒོ་ནས་ཚར་གཅད་ཀྱི། །དེ་ལས་གཞན་པའི་ཚར་གཅད་མིན།
།དོན་མེད་པ་ནི་སྒྲུབ་པ་ཡི། །ཡན་ལག་
མིན་བརྗོད་ལས་གཞན་མིན། །དོན་མི་ཤེས་པ་དོན་མེད་འདྲ། །སྒྲུབ་པའི་ཡན་ལག་མིན་པར་འདུས།
།དོན་ལྡན་གསུམ་བརྗོད་ཕྱིར་རྒོལ་གྱིས། །
མ་རྟོགས་རྒོལ་བ་ཚར་གཅད་མིན། །དོན་བྲལ་བསྙོན་ཚིག་མ་འབྲེལ་བ། །སྒྲུབ་པའི་ཡན་ལག་མིན་པར་འདུས།
།དུས་ལ་མ་བབ་གོ་རིམ་བཟློག །
དེ་ལས་གོ་ན་ཚར་གཅད་མིན། །དོན་མི་གོ་ན་སྒྲུབ་པ་ཡི། །ཡན་ལག་མིན་པ་བརྗོད་པར་འདུས།
།མ་ཚང་ཡན་ལག་གཉིས་པའི་སྐྱོན། །དམ་བཅའ་
མེད་སོགས་ཚར་གཅད་མིན། །ལྷག་བརྗོད་སྒྲུབ་བྱེད་མིན་པར་འདུས། །ཁྱེད་ཀྱི་ལུགས་ལ་ཚར་གཅད་མིན།
།ཡང་བརྗོད་སྒྲ་ཟློས་སྐྱོན་མ་ཡིན། །
དོན་ཟློག་སྒྲུབ་བྱེད་མིན་པར་འདུས། །དེ་ཡང་སྒྲུབ་པའི་ངག་ལ་ཡིན། །གཏམ་རྒྱུད་རྒྱས་ལ་འདིར་སྐྱོན་མིན།
རྗེས་སུ་མི་སྨྲ་ཕྱིར་རྒོལ་གྱིས། །རྒོལ་
བའི་ངག་ཀུན་མ་བརྗོད་པ། །སྐྱོན་མི་དགོས་པ་མ་བརྗོད་ན། །སྤོབས་པ་མེད་པའི་ནང་དུ་འདུས།
།ཁྱེད་ཀྱང་ཚར་གཅོད་དེར་འགྱུར་མོད། །དོན་
མི་ཤེས་པ་ཕྱིར་རྒོལ་ནི། །སྤོབས་པ་མེད་ལས་གཞན་དུ་མིན། །མི་སྤོབས་ཡན་ལག་མི་བརྗོད་པའམ།
།སྐྱོན་མི་བརྗོད་པའི་ཁོངས་སུ་འདུས། །
རྣམ་གཡེང་དྲང་པོ་ཚར་གཅད་མིན། །གཡོན་ཅན་སྤོབས་པ་མེད་པར་འདུས། །འདོད་པ་ཁས་ལེན་ཤེས་མི་ཤེས།
།རིམ་བཞིན་མ་ངེས་སྐྱོན་མི་
བརྗོད། །བརྒལ་བརྟག་འདོར་བ་རྒོལ་བ་གཉིས། །སྤོབས་པ་མེད་པའི་ནང་དུ་འདུས། །རྗེས་སུ་སྦྱོར་མེད་ལ་སྦྱོར་བའང་།
།སྤོབས་པ་མེད་པ་ལས་
གཞན་མིན། །གྲུབ་མཐའ་ཉམས་པ་སྒྲུབ་པ་ཡི། །ཡན་ལག་མི་བརྗོད་པ་ཉིད་ཡིན། །གཏན་ཚིགས་ལྟར་སྣང་ཚར་གཅད་གནས།
།དཔེར་ན་ལྟག་
ཆོད་བརྗོད་པ་བཞིན། །ཕྲད་དང་མ་ཕྲད་གཏན་ཚིགས་དང་། །རྟག་དང་མ་སྨྲས་མ་སྐྱེས་དང་།
།འབྲས་བུ་ཆོས་མཐུན་མི་མཐུན་དང་། །རྣམ་རྟོག་
ཁྱད་མེད་དམིགས་པ་དང་། །ཐེ་ཚོམ་དོན་གོ་ཐལ་འགྱུར་རྣམས། །ཀུན་ལས་བཏུས་ཡིན་རིགས་བརྟག་ལས།
།འཕེལ་འགྲིབ་བརྗོད་དང་མ་
བརྗོད་དང་། །རིགས་པ་དང་ནི་སོ་སོའི་དཔེ། །བསྒྲུབ་བྱ་མི་རྟག་རབ་བྱེད་དང་།
།དུས་འདས་མཚུངས་པའི་ལྟག་ཆོད་ནི། །ཉི་ཤུ་རྩ་བཞི་ཕྱོགས་
གླང་གིས། །བཀག་ཕྱིར་གྲགས་པས་བཏང་སྙོམས་མཛད། །ལྟག་ཆོད་འདི་དག་མ་ཤེས་ན། །གཞུང་ལུགས་ཆེན་པོ་འཆད་པ་ཡི།
།ཕྱོགས་སྔ་ཕལ་
ཆེར་མི་རྟོགས་པས། །ཕྱོགས་ཙམ་ཕྱེ་སྟེ་བཤད་པ་ཡི། །བར་སྐབས་ཀྱི་ཚིགས་བཅད་དོ།
།གང་ཟགས་གསུམ་ལ་བརྗོད་ཚུལ་དྲུག །ཚུལ་གསུམ་
སྟོན་པ་སྒྲུབ་པའི་ངག །ཡན་ལག་ལྔ་ལ་དམ་བཅའ་དང་། །ཉེར་སྦྱོར་འཇུག་སྡུད་གསུམ་པོ་ལྟག
།སྤྱི་ཁྱབ་མ་ཚང་ཕྱིར་མི་འཐད། །ཡན་ལག་གཉིས་
ལའང་གསུམ་པ་དང་། །ལྔ་པ་སྦྱར་ན་དམ་བཅའ་དྲེན། །གལ་ཏེ་དམ་བཅའ་མ་བརྗོད་ན། །ངག་མ་རྫོགས་ཕྱིར་དྲི་དགོས་འགྱུར།
།བླུན་པོ་ལ་ནི་
ཉུང་རྒྱས་སྦྱར། །གཉིས་པོ་སྔ་ཕྱི་ཁྱད་པར་མེད། །མཐའ་རྟེན་རྫོགས་པའི་ཚིག་ཏུ་སྦྱར།
།མཁས་པ་ལ་ནི་གཏན་ཚིགས་ཉིད། །ཀུན་ལས་བཏུས་
ཀྱི་ཚིག་བསྡུ་བ། །ཟླས་དབྱེར་བཤད་ན་འགལ་ཞེས་ཟེར། །གསུམ་པ་དེ་ཡི་སྐྱེས་བུ་ཡི།
།བསྡུ་བ་ཡིན་ཕྱིར་འགལ་བ་མེད། །འབྲས་བུའི་རྗེས་
དཔག་བསྐྱེད་པ་ཡིན། །སྒྲུབ་བྱེད་ཡན་ལག་མ་ཡིན་པ། །བཀོད་པ་སྒྲུབ་པ་ལྟར་སྣང་ཡིན།
།དོན་བློ་སྒྲ་ཡི་དབྱེ་བ་ཡིས། །ལྟར་སྣང་དེ་ཡང་རྣམ་པ་
གསུམ། །སྐྱོན་བརྗོད་སྒོ་ནས་ལོག་རྟོགས་སེལ། །ཡུལ་དང་ངོ་བོ་བརྗོད་ཚུལ་གྱིས།
།དབྱེ་བས་སུན་འབྱིན་རྣམ་པ་གསུམ། །ལྟར་སྣང་སྐྱོན་ལ་
སྐྱོན་མི་བརྗོད། །མུ་སྟེགས་བྱེད་དང་བོད་འགའ་ཞིག །གྲངས་ངེས་བྱེད་མོད་དེ་མི་འཐད།
།སྐྱོན་མི་བརྗོད་དང་སྐྱོན་མིན་བརྗོད། །གཉིས་ཡིན་
དབྱེ་བས་བསམ་མི་ཁྱབ། །བརྗོད་པའི་ཚུལ་ལ་རང་རྒྱུད་དང་། །ཐལ་འགྱུར་གཉིས་ཡིན་རང་རྒྱུད་བཤད།
།ཐལ་འགྱུར་བཞི་ལས་བཅུ་བཞི་
ཞེས། །གངས་ཅན་པ་དག་དེ་ལྟར་འདོད། །བཟློག་པར་ནུས་དང་མི་ནུས་ལས། །ཡང་དག་ལྟར་སྣང་བདུན་བདུན་ཡིན།
།དྲུག་དང་ཕྱེད་ཀྱིས་མི་
འཕེན་ལ། །བདུན་པའི་ཕྱེད་ཀྱིས་འཕེན་ཞེས་ཟེར། །རང་རྒྱུད་ལ་ཡང་མཚུངས་ཕྱིར་དང་།
།རྟགས་མེད་ཁྱབ་པ་འགལ་ཕྱིར་དང་། །ལྟག་ཆོད་ངེས་
པ་མི་རུང་ཕྱིར། །ཐལ་འགྱུར་བཞིར་དབྱེ་མི་འཐད་དོ། །མ་གྲུབ་གཉིས་སུ་ཕྱེ་བ་ལྷག
།འགལ་པའི་ཐལ་འགྱུར་ལྟར་སྣང་ཆད། །རྟགས་མེད་ཁྱབ་
གྲུབ་པ་འཁྲུལ། །དེས་ན་ཐལ་འགྱུར་བཅུ་བཞི་མིན། །འདོད་པ་བརྗོད་ནས་མི་འདོད་སྒྲུབ།
།སྒྲུབ་པའི་ཐལ་འགྱུར་ཆོས་གསུམ་ལྡན། །དངོས་སུ་
སྒྲུབ་པའི་ངག་མིན་ཡང་། །བཟློག་ན་སྒྲུབ་བའི་མཚན་ཉིད་ཡོད། །ཁ་ཅིག་ཐལ་བའི་ཆོས་བཟློག་པས།
།སྒྲུབ་པའི་ངག་ཉིད་འཕེན་ཞེས་ཟེར། །
ཐལ་བའི་ངག་གིས་རང་རྒྱུད་ཀྱི། །ཕྱོགས་ཆོས་འཕེན་ན་སྦྱོར་བ་འཇིག །ཐལ་བའི་ངག་ལས་རང་རྒྱུད་ཀྱི།
།དོན་འཕེན་ཇི་ལྟར་བཟློག་བཞིན་
མིན། །ཡང་དག་ཐལ་བ་བཟློག་མི་འཕེན། །རང་བཞིན་འབྲས་བུ་མཚན་ཉིད་དེ། །མི་དམིགས་གསུམ་གྱིས་སྒྲུབ་མི་འཕེན།
།ལྷག་མ་ཡང་དག་
གཏན་ཚིགས་ཀུན། །སྒྲུབ་བྱེད་འཕེན་པར་ཤེས་པར་བྱ། །བཟློག་པས་རང་རིགས་འཕེན་བ་བཞི།
།གཞན་རིགས་འཕེན་པ་བཅུ་དྲུག་ཡོད། །
འདོད་བརྗོད་མི་འདོད་སྒྲུབ་པ་མེད། །ཁས་བླངས་གཏན་ཚིགས་ཡིན་ན་ནི། །གཏན་ཚིགས་བཞི་པ་སྲིད་པར་གྱུར།
།ཁས་བླངས་རྟགས་སུ་མི་རུང་
ན། །ཐལ་བས་སྒྲུབ་པ་མི་འཐད་ལོ། །གཞན་གྱིས་ཀུན་ཏུ་བཏགས་པ་ལ། །ཐལ་བས་སྒྲུབ་པ་སྐྱོན་ཡོད་མིན།
།ཐལ་འགྱུར་ལན་ནི་སྒོ་གསུམ་
ཞེས། །ཁ་བ་ཅན་པ་དེ་སྐད་སྨྲ། །འགལ་དང་མ་ངེས་གཅིག་ཏུ་འགྱུར། །འདོད་ན་ལྟར་སྣང་གཉིས་སུ་འགྱུར།
།དེ་མཐར་གཏན་ཚིགས་ལྟར་སྣང་
ཀུན། །མ་གྲུབ་གཅིག་ཏུ་འདུ་བར་འགྱུར། །མ་གྲུབ་གཉིས་སུ་འབྱེད་ན་མཚུངས། །ཡང་ན་འགལ་ལ་དེ་འཁྲུལ་འགྱུར།
།དེས་ན་མཁས་པས་ཐལ་
འགྱུར་ལན། །རྣམ་པར་ཐར་པའི་སྒོ་བཞིས་གདབ། །ལན་གྱིས་བཟློག་པར་མི་ནུས་ན། །དེ་ཡི་རྗེས་འབྲང་དམ་པའི་ལུགས།
།དེ་ལྟར་སྒྲུབ་དང་སུན
་འབྱིན་གྱི། །རིགས་པའི་གཞུང་ལུགས་གང་གིས་ཤེས། །མཁས་པ་དེ་ནི་རྫོགས་པ་ཡི།
།སངས་རྒྱས་རྣམས་ཀྱི་བསྟན་པ་འཛིན། །ཚད་མ་རིགས་
པའི་གཏེར་ལས།
གཞན་དོན་རྗེས་སུ་དཔག་པ་བརྟག་པའི་རབ་ཏུ་བྱེད་པ་སྟེ་བཅུ་གཅིག་པའོ།། །།སྐྱེ་བ་སྐྱེ་བ་རྣམས་སུ་ཡང་དང་ཡང་།
།མཁས་
པ་མཁས་པ་རྣམས་ལ་སྔོན་སྦྱངས་པས། །ཚེ་འདིར་ལན་རེ་ཟུང་རེ་ཐོས་ཙམ་གྱིས། །གཞུང་ལུགས་ཀུན་ཤེས་ཀུན་དགའ་རྒྱལ་མཚན་དཔལ།
།
ཕྱོགས་ལས་རྣམ་རྒྱལ་ཕྱོགས་གླང་གྲགས་པའི་གཞུང་། །མདོ་དང་རྣམ་འགྲེལ་དེ་འགྲེལ་དང་བཅས་རྣམས།
།ལེགས་པར་རྟོགས་ཤིང་རྟོག་གེའི་
ཚུལ་ཤེས་ནས། །ཡང་དག་རིགས་མཆོག་རིགས་པའི་གཏེར་འདི་བསྒྲུབས། །ཐུབ་པ་སེར་སྐྱ་རྐང་མིག་པ་དང་འུག་པའི་བུ།
།མཁའ་གོས་ཅན་
དང་ཚུ་རོལ་མཛེས་བའི་གཞུང་འཛིན་པ། །ཐོས་སྒྲོགས་པ་དང་གངས་རིའི་ཁྲོད་གནས་སྨྲ་རྣམས་ཀྱི།
།རྟོག་གེ་ངན་འཇོམས་བསྟན་བཅོས་
ཆེན་པོ་འདི་བྱས་སོ། །བློ་ཡི་ནུས་པ་ཅུང་ཟད་ཡོད་ཀྱང་ལེགས་བཤད་སྙིང་པོ་མ་རྙེད་ཅིང་།
།ཉིན་དང་མཚན་དུ་འབད་པ་བྱས་ཀྱང་གཞུང་
ལུགས་ཕྱོགས་རེ་དཔྱིས་མ་ཕྱིན། །རྟག་ཏུ་བརྩོན་པས་ཏིང་འཛིན་བསྒྲུབ་ཀྱང་སངས་རྒྱས་དགྱེས་པའི་ལམ་ལས་གོལ།
།སྙིགས་དུས་སྐྱེ་བོ་ཆོག་
ཤེས་རྣམས་ཀྱང་ལེགས་པར་སོམས་ལ་མཁས་པ་བསྟེན། །སྡེ་བདུན་རིགས་པའི་དེ་ཉིད་འདི་ཡིན་ཞེས།
།རྒན་པོའི་ལུགས་ངན་དོར་ནས་ངས་
འདི་བཤད། །རིགས་པ་མཁྱེན་པ་དེ་དག་འདི་བཞེད་མོད། །ལན་མང་ཐོས་ཀྱང་བླུན་པོའི་སྤྱོད་ཡུལ་མིན།
།ལེགས་པར་བཤད་པས་བློ་གྲོས་མིག་
ཕྱེ་ནས། །ཤེས་བྱའི་དེ་ཉིད་ཇི་བཞིན་ལེགས་བསྟན་པའི། །དགེ་བ་འདི་ཡིས་ཐམས་ཅད་གཟིགས་བ་ཉིད།
།ཐོབ་ནས་འགྲོ་བ་ཀུན་གྱི་སྐྱབ་གྱུར་
ཅིག །ཚད་མ་རིགས་པའི་གཏེར་ཞེས་བྱ་བའི་བསྟན་བཅོས་འདི་ནི།
ཡུལ་བྱང་ཕྱོགས་ཀྱི་རྒྱུད་དུ་བྱུང་བ། སྒྲ་དང་། ཚད་མ་དང་། སྡེབ་སྦྱོར་དང་།
སྙན་ངག་དང་། ཚིག་གི་རྒྱན་དང་། མིང་གི་མངོན་བརྗོད་དང་།
ཐ་སྙད་ཀྱི་གཙུག་ལག་རྣམས་ལེགས་པར་ཤེས་པས་འཆད་པ་དང་། རྩོམ་པ་
དང་། རྩོད་པའི་ཡུལ་ལ་སྤོབས་བ་དགེ་བ་ཅན།
ཀུན་ལས་བཏུས་དང་སྡེ་བདུན་ཕྱིན་ཅི་མ་ལོག་པར་ཁོང་དུ་ཆུད་ཅིང་། ལུང་དང་།
རིགས་པ་
དང་། མན་ངག་གི་ཚུལ་མཐའ་དག་ལ་བློའི་སྣང་བ་ཐོབ་པ།
ཤཱཀྱའི་དགེ་སློང་ཀུན་དགའ་རྒྱལ་མཚན་དཔལ་བཟང་པོ་ཞེས་བྱ་བས། སྡེབ་སྦྱོར་
སྤངས་ནས་གོ་བདེ་བར་བཀྲོལ་ཏེ། །དཔལ་ས་སྐྱའི་གཙུག་ལག་ཁང་དུ་སྦྱར་བའོ། །
กก |