|
རྗེས་དཔག་རྣམ་གཉིས་རང་དོན་ནི། །ཚུལ་གསུམ་རྟགས་ལས་དོན་མཐོང་ཡིན། །ཕྱོགས་ནི་ཆོས་དང་ཆོས་ཅན་གྱི།
།ཚོགས་པ་བརྗོད་ལ་
དངོས་མིང་ཡིན། །དེ་ཡི་ཕྱོགས་རེས་ཟིན་པའི་ཕྱིར། །ཡ་གྱལ་གཉིས་ལ་བཏགས་ནས་འཇུག
།བརྗོད་པ་འདོད་པས་སྔོན་སྦྱར་བ། །དེ་ཉིད་གོ་བ་
དངོས་མིང་ཡིན། །དེ་བརྟེན་རྒྱུ་མཚན་འགའ་ལས་གཞན། །རྟོག་པས་བཏགས་པ་མིང་དུ་འདོད།
།ཚོགས་དོན་ལ་ནི་ཕྱོགས་ཀྱི་སྒྲ། །མཁས་པ་
རྣམས་ལ་གདོད་ནས་གྲུབ། །བཏགས་པ་ལ་ནི་འདྲ་བ་དང་། །འབྲེལ་པའི་རྒྱུ་མཚན་གཞན་ལ་ལྟོས།
།ཆོས་ལ་བསྒྲུབ་བྱར་མིང་བཏགས་པ། །
འགལ་བའི་གཏན་ཚིགས་ཡང་དག་ཏུ། །ལོག་པར་རྟོག་པ་སྤང་ཕྱིར་རམ། །སྡེབ་སྦྱོར་ངོར་བྱས་བཏགས་པ་ཡིན།
།ཆོས་ཅན་བརྗོད་ན་འཁྲུལ་གཞི་
ཡོད། །མཐའ་རྣམས་བཀག་ན་ཡུན་རིང་འགོར། །དངོས་མིང་བརྗོད་ན་སྡེབ་སྦྱོར་ཉམས།
།བདེ་བླག་རྟོགས་ཕྱིར་ཕྱོགས་ཞེས་གསུང་། །ཕྱོགས་
དང་ཆོས་ཅན་མཚུངས་ཤེ་ན། །གྲགས་པའི་སྒོ་ནས་ཁྱད་པར་ཡོད། །ཆོས་དང་འབྲེལ་པའི་ཕྱོགས་ཀྱི་སྒྲ།
།རྩོད་གཞི་ཉིད་ཡིན་ལག་ལྡན་བཞིན། །
ཆོས་དང་འབྲེལ་ཡང་ཆོས་ཅན་སྒྲས། །ངེས་པར་མི་ནུས་མགོ་ལྡན་བཞིན། །བསྡུ་བའི་ཚིགས་སུ་བཅད་པའོ།
།ཆོས་དང་ཆོས་ཅན་བསྒྲུབ་བྱ་ཉིད།།
མ་ཡིན་མཚན་ཉིད་མེད་ཕྱིར་རོ། །དཔག་གཞིར་བཟུང་བ་ཤེས་འདོད་ཡིན། །དེ་ལ་གྲུབ་པ་ཕྱོགས་ཆོས་སོ།
།བསྒྲུབ་བྱའི་ཆོས་ལྡན་མི་ལྡན་ལ། །
མཐུན་ཕྱོགས་མི་ལྡན་ཕྱོགས་ཞེས་ཟེར། །ཕྱོགས་གཉིས་དངོས་འགལ་དུ་བསམས་ནས། །ཕུང་གསུམ་བྱུང་བར་དོགས་པ་ལ།
།ཚད་མའི་ཡུལ་མི་
ཤེས་པ་འགའ། །རྫས་ལྡོག་རྣམ་པར་ཕྱེ་སྟེ་སྨྲ། །རྫས་ཆོས་གཅིག་དང་ཐ་དད་ལྡན།
།ལྡོག་ཆོས་རང་ལྡོག་རྟེན་ཞེས་ཟེར། །རྫས་ལྡོག་ཇི་ལྟར་ཕྱེ་ན་
ཡང་། །ཕྱོགས་གཉིས་ཉིད་དུ་ངེས་མི་ནུས། །གཉིས་ལ་འཇུག་པའི་རྫས་ལྡོག་ཀྱང་།
།མཁས་པ་རྣམས་ལ་གྲུབ་པར་མཐོང་། །དོན་ལ་དགག་སྒྲུབ་
བྱེད་ན་ནི། །ཚད་མའི་ཡུལ་མི་ཤེས་པར་འགྱུར། །བློ་ངོར་དགག་སྒྲུབ་བྱེད་ན་ནི།
།ཡོད་མེད་མ་ངེས་གསུམ་དུ་འགྱུར། །ཤེས་འདོད་ཕྱོགས་སུ་མི་
འདོད་ཕྱིར། །ལྟོས་གཞི་དང་པོ་མེད་པར་འགྱུར། །ལྟོས་གཞི་དང་པོ་མི་འདོད་ན།
།འདི་ལ་ཕྱོགས་ཆོས་མཚན་ཉིད་དཀའ། །ལྟོས་གཞི་དང་པོ་
ཕྱོགས་གཉིས་སུ། །དེས་ན་ལྟོས་གཞི་གཞན་གཉིས་ཀྱི། །ཡོད་མེད་ངེས་པའི་འགྲོ་ལྡོག་ཀྱང་།
།བརྗོད་པ་རབ་ཏུ་དཀའ་བ་ཡིན། །ཕྱོགས་ཆོས་
དང་ནི་ཕྱོགས་གཉིས་པོ། །གཅིག་ལ་ལྡོག་པས་འབྱེད་ན་ནི། །རྟགས་ཀུན་ཕྱོགས་སུ་ལྷུང་འགྱུར་བས།
།གཏན་ཚིགས་མ་ངེས་ག་ལ་སྲིད། །ཚོགས་
དོན་མཐུན་ཕྱོགས་ཉིད་ཡིན་ན། །དེ་ཡི་ཡན་ལག་དེ་ལྡན་ཉིད། །ཤེས་བྱ་ཕྱོགས་གཉིས་ངེས་པ་དང་།
།ལྟོས་གཞི་གསུམ་དུ་འདོད་པ་འགལ། །ལྟོས་
གཞི་གཉིས་སུ་འདོད་ན་ནི། །དེ་ལྟོས་རྟགས་ཀྱང་ཚུལ་གཉིས་འགྱུར། །མཐུན་ཕྱོགས་མི་མཐུན་ཕྱོགས་གཉིས་སུ།
།ངེས་པ་སློབ་དཔོན་མི་བཞེད་
དོ། །རྫས་ལྡོག་སོ་སོར་ཕྱེ་བ་ཡིས། །རྗེས་སུ་འཇུག་ན་ཐ་སྙད་འཇིག །རང་ལྡོག་བརྟེན་ནས་སྒྲུབ་པ་ཡི།
།ཚུལ་འདི་བརྟགས་ན་སྙིང་པོ་མེད། །
ཕྱོགས་གཉིས་དངོས་འགལ་མ་ཡིན་ཕྱིར། །དགག་སྒྲུབ་རྣམ་གཞག་འཇིག་ཅེ་ན། །དགག་སྒྲུབ་ཕྱོགས་ཀྱིས་བྱེད་པ་མིན།
།ཚད་མའི་འགལ་འབྲེལ་
ངེས་པས་འགྲུབ། །རྟགས་དང་བསྒྲུབ་བྱ་འབྲེལ་སྟོབས་ཀྱིས། །ཡོད་མེད་ངེས་པ་རྗེས་འགྲོ་ལྡོག
།ཕྱོགས་དང་བསྒྲུབ་བྱའི་ཆོས་ཀྱི་སྤྱིས། །
མཚུངས་དང་མི་མཚུངས་ཕྱོགས་གཉིས་ཡིན། །མཐུན་ཡུལ་ཕྱོགས་ཀྱང་བཏགས་པ་བས། །གཞན་སེལ་ཉིད་ཡིན་གཉིས་པོ་མིན།
།འདི་ལ་
གཞན་གྱི་ཀླན་ཀ་མེད། །གཞུང་གི་དགོངས་པའང་འདི་ཉིད་ཡིན། །རྫས་ནི་དངོས་པོ་ལས་གཞན་མིན།
།གཞན་སེལ་ལས་གཞན་ལྡོག་པ་མེད། །
དེས་ན་རྫས་ལྡོག་གཅིག་ཉིད་དུ། །འཁྲུལ་པ་ཉིད་ལ་དགག་སྒྲུབ་བྱེད། །ཡོད་མེད་གཉིས་ཀ་ལ་བརྟེན་ནས།
།སྒྲ་དོན་གསུམ་གྱི་ཆོས་གཉིས་སྒྲུབ།།
དུ་བའི་རྟགས་ལས་སྐྱ་བོའི་རྫས། །ཚུལ་གསུམ་རྟགས་ལ་ཤེས་བྱ་ཙམ། །མཐུན་ཕྱོགས་མི་མཐུན་ཕྱོགས་གཉིས་སུ།
།དཔྱད་ན་ཚད་མ་འཇིག་ཅེ་
ན། །དུ་བ་དང་ནི་ཚུལ་གསུམ་གྱི། །གཞན་སེལ་གཉིས་པོ་སྐྱ་བོ་དང་། །ཤེས་བྱ་གཉིས་ཀྱི་བཟློག་པ་དང་།
།ལྡོག་པ་གཉིས་ལ་འབྲེལ་ཕྱིར་འཐད།།
ལྡོག་འགོག་ཆོས་རྟགས་ཕྱོགས་གཉིས་ཀྱི། །རྩོད་བ་བཞི་ཡི་གཞན་ལན་འཁྲུལ། །མེད་དགག་ཐ་སྙད་མེད་དགག་དང་།
།སྤྱི་ལྡོག་ཕུང་གསུམ་ཡིན་
ཕྱིར་འཐད། །ཇི་སྙེད་རྟགས་སུ་བཀོད་གྱུར་པ། །དེ་སྙེད་ཕྱོགས་གསུམ་ལ་བལྟོས་པས།
།དངོས་སུ་གང་རུང་མ་ཚང་ཡང་། །ལྟོས་གཞི་ཉིད་དུ་
འདོད་པ་ཡིན། །དགག་སྒྲུབ་སེལ་བས་བྱེད་འདི་ལ། །རྫས་ལྡོག་ཕྱེ་ནས་ཕྱོགས་གཉིས་སུ།
།རྩོད་པའི་ཉེས་པས་མི་གནོད་དེ། །ཚད་མའི་ཡུལ་ལ་
མཁས་ཕྱིར་རོ། །བར་སྐབས་ཀྱི་ཚིགས་སུ་བཅད་པའོ། །ཚུལ་གཅིག་ནས་ནི་དྲུག་གི་བར།
།ཉི་ཚེའི་ཚུལ་གཞན་འདོད་པ་འཁྲུལ། །ཕྱོགས་ཆོས་
གྲུབ་ཅིང་འབྲེལ་པ་ངེས། །གཏན་ཚིགས་མཚན་ཉིད་སྐྱོན་མེད་ཡིན། །ཕྱོགས་ཆོས་གྲུབ་པ་ཚུལ་དང་པོ།
།ཚུལ་གཉིས་པ་དང་རྗེས་འགྲོ་ཡིས། །
ལྡོག་པ་འཕེན་པའི་སྐྱོན་གཉིས་མེད། །ངེས་རུང་རྟགས་མིན་ཐེ་ཚོམ་ཕྱིར། །ངེས་པ་རྟགས་ཡིན་གོ་བྱེད་ཕྱིར།
།འདི་ལ་གཞན་གྱི་ཀླན་ཀ་མེད། །ཁ་
ཅིག་རྩོད་གཞིས་ཁྱད་པར་དུ། །བྱས་པ་རྟགས་ཀྱི་མཚན་གཞིར་འདོད། །མི་ལྡན་གཅོད་པ་རྩོད་གཞི་ཡིས།
།ཡིན་ན་ཡུ་བུ་རྩོད་པ་མེད། །གཞན་
ལྡན་གཅོད་ན་རྗེས་འགྲོ་མེད། །བསྒྲུབ་བྱའི་ཆོས་ཀྱང་དེ་དང་འདྲ། །རྟགས་ཀྱི་མཚན་གཞི་གཞན་སེལ་ཡིན།
།འདི་ལ་གཞན་གྱི་ཀླན་ཀ་མེད། །
མཚན་ཉིད་དེ་དང་ལྡན་པ་ཡི། །གཏན་ཚིགས་དབྱེ་སྒོས་དུ་མར་འགྱུར། །ཆོས་ཀྱི་གྲགས་པས་སྦྱོར་བ་ཡི།
།སྒོ་ནས་གསུམ་དུ་ངེས་པ་མཛད། །
དགག་བྱ་འགོག་ལ་ཚུལ་གསུམ་ཚང་། །ངོ་བོ་མི་དམིགས་པ་ལ་བཞི། །འགལ་བ་དམིགས་པ་རྣམ་པ་གཉིས།
།ཚ་རེག་སྐོར་བཞིས་གྲང་རེག་བཞི།།
བཀག་པས་སྦྱོར་བ་བཅུ་དྲུག་ཟེར། །ནུས་པ་ཐོགས་མེད་མེ་མིན་ཞིང་། །རྒྱུན་མེད་ཕྱིར་ན་འགོག་མི་ནུས།
།གཞུང་ལས་རྣམ་གཞག་མང་བཤད་
ཀྱང་། །འགོག་ནུས་སྔ་མ་བཅུ་གཉིས་ཡིན། །ཕན་ཚུན་སྤངས་པ་དངོས་ལ་ནི། །རྟགས་དང་རྟགས་ཅན་ཡོད་མ་ཡིན།
།དེ་ཡི་ཁྱད་པར་བྱས་པ་ནི།།
ཁྱབ་བྱེད་འགལ་བ་དམིགས་པ་ཡིན། །ཚད་མས་གནོད་པའི་འགལ་བ་ཡང་། །ཁྱབ་བྱེད་འགལ་བ་དམིགས་པར་འདུས།
།དངོས་འབྲེལ་བཀག་
ཟིན་ལྷན་ཅིག་ན། །མི་གནས་ཚོགས་པས་བསྐྱེད་པ་འཁྲུལ། །འབྲེལ་ཡུལ་ལོག་པས་འབྲེལ་ཆོས་ཉིད།
།ལྡོག་པས་བཟློག་འབྲེལ་བློ་ངོར་གྲུབ། །
ཡིན་པ་སྒྲུབ་ལ་ཚུལ་གསུམ་ཚང་། །ངོ་བོ་དབྱེར་མེད་རང་བཞིན་རྟགས། །དེ་དང་ཆ་མཐུན་ཁོངས་སུ་བསྡུ།
།གཅིག་ཕྱིར་ཐ་དད་སྐྱོན་མི་འགོ། །
ཡོད་པ་སྒྲུབ་ལ་ཚུལ་གསུམ་ཚང་། །དེ་བྱུང་བ་ལ་འབྲས་བུའི་རྟགས། །དེ་ཡི་ཆ་མཐུན་ཁོངས་སུ་བསྡུ།
།ཐ་དད་སྒྲུབ་ཕྱིར་སྐྱོན་ལས་གྲོལ། །ཁ་ཅིག་
འབྲེལ་བ་མུ་དགུ་ལ། །གོ་བྱེད་འབྲེལ་བ་བཞི་ཡོད་ལོ། །འདི་ནི་རྣམ་གཞག་འགལ་བ་དང་།
།གཞུང་གི་དགོངས་པར་འཐད་མ་ཡིན། །ཁྱད་པར་བྱ་
བྱེད་འབྲེལ་བ་ཡི། །སྟོབས་ཀྱིས་བསྒྲུབ་བྱ་གོ་བ་མིན། །དེ་ཡི་ངོ་བོའམ་དོན་གཞན་གྱི།
།འབྲེལ་པའི་སྟོབས་ཀྱིས་རྟོགས་པར་ཟད། །བར་སྐབས་
ཀྱི་ཚིགས་སུ་བཅད་པའོ། །རྟགས་གང་ཚུལ་གསུམ་མ་གྲུབ་པ། །ཕྱོགས་ལ་རྟགས་མེད་མ་གྲུབ་པ།
།ཕྱོགས་ཆོས་དོན་ནམ་བློ་ངོ་ལ། །མི་གནས་
མ་གྲུབ་པ་ཉིད་ཡིན། །ཕྱོགས་རེའམ་རྒོལ་བ་རྣམ་གཉིས་ལ། །མ་གྲུབ་རྣམ་པར་ཕྱེ་སྟེ་བཤད།
།བསྡུ་བའི་ཚིགས་སུ་བཅད་པའོ། །མ་ངེས་ཐེ་ཚོམ་
བསྐྱེད་པའི་རྟགས། །ཕྱོགས་མིན་གཞན་ལ་མ་གྲུབ་པ། །ཐུན་མོང་མ་ཡིན་དབྱེ་ན་བཞི།
།ཕྱོགས་ལས་གཞན་འཇུག་ཐུན་མོངས་བ། །དབྱེ་ན་
དངོས་དང་ལྷག་ལྡན་གཉིས། །གཉིས་ཀ་ལ་མཐོང་བཟློག་མི་ཆོད། །ཡང་དག་ལྷག་ལྡན་མཐུན་ཕྱོགས་མཐོང་།
།མི་མཐུན་ཕྱོགས་ལ་མ་མཐོང་
བའོ། །མི་མཐུན་ཕྱོགས་མཐོང་མཐུན་ཕྱོགས་ལ། །མ་མཐོང་འགལ་བའི་ལྷག་ལྡན་ཡིན།
།རྟགས་གྲུབ་བཟློག་པས་ཁྱབ་ན་འགལ། །མི་དམིགས་
རང་བཞིན་གཏན་ཚིགས་སུ། །བསྡུས་པས་འགལ་བ་གཉིས་ཉིད་ཡིན། །བཙལ་མ་ཐག་བྱུང་མི་རྟག་འབྲས།
།རྟག་ལ་འགྱུར་པ་མེད་ཕྱིར་འགལ།།
མི་རྟག་འགྱུར་ཕྱིར་འདི་མི་མཚུངས་། །དེ་འདྲ་འགྱུར་མེད་ལ་མི་འཐད། །མི་དམིགས་གསུམ་པར་འབྱེད་ན་ནི།
།དེ་བཟློག་འགལ་བའང་གསུམ་དུ་
འགྱུར། །འགའ་ཞིག་ཆོས་དང་ཆོས་ཅན་གྱི། །དབྱེ་བས་འགལ་བ་བཞི་ཞེས་ཟེར། །དངོས་ཤུགས་ཆོས་དང་ཆོས་ཅན་གྱི།
།འགལ་བ་བརྗོད་
འདོད་སྟོབས་ཀྱིས་ཡིན། །ཡང་དག་ལ་ཡང་མཚུངས་ཤེ་ན། །བྱེད་པ་ཆུང་ཕྱིར་བཏང་སྙོམས་མཛད།
།ཞེ་འདོད་དང་ནི་སྨྲས་པ་གཉིས། །བསྒྲུབ་
བྱ་ཉིད་དུ་མཚུངས་པའི་ཕྱིར། །གཞན་དོན་སྒྲུབ་པའི་འགལ་བ་སོགས། །འགལ་བ་གསུམ་པ་འདིར་མི་བཞེད།
།མཐའ་གཞན་འགོག་པའི་ངེས་པ་
ཡིས། །རྟགས་སུ་བཀོད་པ་བཞི་རུ་ངེས། །རྟགས་སུ་བཀོད་པ་བཞི་པོ་ལ། །ནུས་པ་དེ་ཡང་རྣམ་བཞི་ཡོད།
།མདོ་ལས་མཚན་ཉིད་ལྔ་ལྡན་
གསུངས། །བསྒྲུབ་བྱར་འདོད་པ་རིགས་པའི་སྒོར། འདི་ལ་མ་ཁྱབ་ཁྱབ་ཆེས་དང་། །རྟགས་ལ་མཚུངས་པའི་རྩོད་པ་མེད།
།བསྒྲུབ་བྱའི་མཚན་
གཞི་དངོས་པོའམ། །བཏགས་པར་ཕྱེ་སྟེ་སྒྲུབ་པ་འཁྲུལ། །སྒྲ་ཡི་དོན་ལ་རང་མཚན་དུ།
།འཁྲུལ་པ་བསྒྲུབ་བྱའི་མཚན་གཞི་ཡིན། །འདི་ལ་དངོས་
པོ་དངོས་མེད་དུ། །སྒྲུབ་ལ་རྩོད་པའི་གོ་སྐབས་མེད། །བསལ་བ་ཕྱོགས་དང་འགལ་བ་གྲུབ།
།ལྔ་པོ་བཞི་རུ་བསྡུས་ཏེ་བཤད། །ཡུལ་གྱི་སྒོ་ནས་
རྗེས་དཔག་ལ། །ཕྱེ་སྟེ་བསལ་བ་བཞི་རུ་གསུངས། །མངོན་སུམ་རྗེས་དཔག་དངོས་སྟོབས་ཀྱི།
།ཚད་ཡིན་ཁས་བླངས་གྲགས་པ་གཉིས། །སྒྲོ་
བཏགས་ཡིན་ཕྱིར་ཁོངས་སུ་སྡུད། །རྗེས་དཔག་བཞིན་དུ་མངོན་སུམ་ལའང་། །བསལ་བ་གཉིས་པོ་འཇུག་ཅེ་ན།
།ཁས་བླངས་འབྲས་རྟགས་
ལས་གཞན་མིན། །རུང་བ་མངོན་སུམ་གྱིས་མི་འགྲུབ། །དམ་བཅས་ཉིད་ནས་མྱོང་བ་དང་།
།འགལ་བ་མངོན་སུམ་བསལ་པ་ཡིན། །ཚུལ་གསུམ་
དངོས་པོ་སྟོབས་ཞུགས་དང་། །དམ་བཅས་འགལ་ན་རྟགས་བསལ་ཡིན། །ཡིད་ཆེས་ཚིག་དང་དམ་བཅས་པ།
།འགལ་བ་ཁས་བླངས་བསལ་བ་
ཡིན། །དེ་ལ་ཁས་བླངས་རང་ཚིག་གཉིས། །གཞན་དག་ལུང་དང་རང་ཚིག་ཟེར། །སློབ་དཔོན་ངག་གི་དབྱེ་བར་བཞེད།
།ཀུན་ལས་བཏུས་སུ་
གཉིས་ཀ་ཡང་། །དཔེ་གཅིག་གིས་བསྟན་རིགས་པའི་སྒོར། །ལུང་ལ་དཔེར་བརྗོད་གཞན་དུ་གསུངས།
།གཞལ་བྱ་གཉིས་ལ་ཚད་མ་གཉིས། །
བསྐལ་བའི་དོན་ལ་རང་ཚིག་གིས། །མི་གནོད་གསུང་རབ་ངེད་ཀྱི་ལུང་། །རྗེས་སུ་དཔག་པར་བསྡུས་ཏེ་གསུངས།
།དེས་ན་རིགས་པས་གྲུབ་པའི་
ལུང་། །ཚད་མ་ཉིད་ཡིན་མ་གྲུབ་ན། །རང་གི་ཚིག་དང་མཚུངས་པའི་ཕྱིར། །གེགས་བྱེད་ཉིད་དུ་བཞེད་པ་ཡིན།
།ལུང་དུ་གྲགས་ཚད་ཚད་མ་མིན།།
ཚད་མས་གྲུབ་པ་དེ་ལུང་ཡིན། །ཁས་བླངས་ནས་ནི་དཔྱོད་པ་བླུན། །དཔྱད་ན་ཁས་ལེན་མཛངས་པའི་ལུགས།
།བར་སྐབས་ཀྱི་ཚིགས་བཅད་དོ།།
ལུང་གཞན་འགའ་བའང་དེར་འགྱུར་ལོ། །ཆགས་སོགས་ཆོས་མིན་ཆགས་བྲལ་སོགས། །ཆོས་སུ་ཆད་ལྟ་མིན་རྣམས་འཆད།
།ཁྲུས་དང་ཆགས་
སོགས་རྒྱུ་མི་འགལ། །དེ་ལྟའི་གཞུང་རྣམས་ལུང་མ་ཡིན། །གལ་ཏེ་རང་ཚིག་བསྟན་བཅོས་ཀྱི།
།གེགས་ལས་ཐེ་ཚོམ་ཙམ་ཡིན་ལ། །དེ་ནི་བསྒྲུབ་
བྱ་སྐྱོན་མེད་ཉིད། །ཡིན་ཕྱིར་ཕྱོགས་སྐྱོན་མིན་ཞེ་ན། །གེགས་ཀྱི་ཐེ་ཚོམ་བསྐྱེད་པ་ཡི།
།སྒོ་ནས་སྐྱོན་དུ་སོང་བ་མིན། །ཚིག་དེས་བསྒྲུབ་བྱ་མི་
འགྲུབ་པའི། །སྒོ་ནས་སྐྱོན་དུ་འཇོག་པ་ཡིན། །དམ་བཅས་རང་གི་བསམ་པ་སྟོན། །འགལ་བ་འདུས་ན་དམ་བཅའ་འཇིག
།དེས་ན་བརྗོད་པ་
སྐྱོན་ཅན་གྱིས། །རྩོད་པའི་སྐབས་སུ་ཕམ་པ་བསྐྱེད། །དམ་བཅས་ཉིད་ན་འཇིག་རྟེན་དང་།
།འགལ་བ་གྲགས་པས་བསལ་བ་ཡིན། །བརྡ་སྤྲོད་
པ་དག་སྒྲ་དོན་ལ། །དངོས་འབྲེལ་འདོད་པ་སྔར་བཀག་ཅིང་། །བརྗོད་འདོད་དབང་གིས་འཇུག་པ་ཡང་།
།བསྒྲུབས་ཟིན་དེས་ན་གྲགས་པའང་
འགྲུབ། །ཡོད་པའི་རྟགས་ཀྱིས་རི་བོང་ཅན། །ཟླ་བ་ཡིན་པ་འགོག་པ་ལ། །འདི་ལ་དཔེ་མེད་ཡོད་རྣམས་ལ།
།སྒྲ་ཀུན་བརྗོད་དུ་རུང་ཕྱིར་རོ། །སྒྲ་
ཡི་དོན་གྱི་ཡོད་པ་ལ། །ཟླ་བར་རུང་ཕྱིར་འགལ་བ་ཡིན། །འཇིག་རྟེན་སྤྱོད་པའི་སྒྲ་ལས་བྱུང་།
།དེ་ཉིད་གྲགས་པ་ཡིན་པར་བཞེད། །དེ་ཡང་ཤེས་
བྱ་ཐམས་ཅད་ལ། །རུང་ཕྱིར་གྲགས་པས་ཀུན་ལ་ཁྱབ། །མ་གྲགས་པ་ལ་གྲགས་པའི་སྒྲ།
།འཇིག་རྟེན་པ་དང་འགལ་ཞེ་ན། །ཤེས་བྱ་ཀུན་ལ་རུང་
བ་ལ། །གྲགས་པའི་སྒྲ་མཛད་འཚེད་པ་བཞིན། །གྲགས་རུང་དོན་ལ་གྲུབ་ནའང་། །བརྡ་དང་བརྗོད་འདོད་ལ་བརྟེན་པའི།
།སྒྲ་གྲུབ་ན་ནི་གྲུབ་བོ་
ཞེས། །བསྟན་ཕྱིར་སྒྲ་བྱུང་གྲགས་པ་གསུངས། །གྲགས་པའི་རྗེས་དཔག་གིས་འགྲུབ་པས།
།འགལ་བ་མི་འཁྲུལ་མི་སྲིད་ལོ། །གྲགས་པ་དངོས་
པོས་བསྐྱེད་ན་ནི། །རྗེས་དཔག་བཞིན་དུ་ཡུལ་ངེས་འགྱུར། །བརྗོད་འདོད་དབང་གིས་སྦྱར་བ་ལ།
།སྒྲ་རྣམས་གང་ལའང་མི་འཇུག་མེད། །དེས་
ན་ཀུན་ལ་འཇུག་པ་ཡི། །གྲགས་པ་ཡུལ་འདིར་མི་འཇུག་ཅེས། །བརྗོད་པའི་དཔེ་གཞན་རྙེད་དཀའ་བས།
།ཐུན་མོང་ཉིད་མིན་མཉན་བྱ་བཞིན། །
སྤྱི་མཚན་འཆད་པའི་སྐབས་ཡིན་པས། །རི་བོང་ཅན་ལ་དཔེར་མཛད་ནས། །ཤེས་བྱ་ཀུན་ལ་ཁྱབ་པར་བསྟན།
།ད་ཏྲིག་ཤིང་མིན་སོགས་ལའང་
མཚུངས། །ག་པུར་དང་ནི་དངུལ་སོགས་ལ། །ཟླ་བའི་སྒྲ་ནི་གཞན་དུ་གྲགས། །དེ་ཉིད་དཔེར་བྱས་བསིལ་ཟེར་ཅན།
།ཟླ་བར་གྲུབ་པར་ཐུན་མོང་
རྟགས། །བརྡ་ལ་འཇུག་རྣམས་ཐུན་མོང་བ། །གཅིག་ལ་གྲུབ་ན་ཀུན་ལ་འགྲུབ། །འདི་ནི་དངོས་པོ་སྟོབས་ཞུགས་ཡིན།
།གྲགས་པ་འགོག་ན་
ཁྱེད་ཀྱིའང་འཇིག །དེས་ན་འདོད་པས་སྦྱར་བའི་བརྡ། །ཀུན་ལ་འཇུག་ཏུ་རུང་བཞིན་དུ།
།འགོག་ན་འཇིག་རྟེན་གྱིས་གནོད་པས། །གྲགས་པ་
དག་དང་འགལ་བར་དགོངས། །ལ་ལ་བརྡ་དང་ཐ་སྙད་ཀྱི། །གྲགས་པ་གཉིས་སུ་འབྱེད་པ་ཡོད།
།ཐ་སྙད་འདི་ཡི་སྐབས་དོན་མིན། །མཚན་ཉིད་
དེ་འདྲ་སྔར་བཀག་ཟིན། །དངོས་དང་ཞེན་པའི་བརྗོད་རུང་གིས། །བརྡ་ཡི་གྲགས་པ་གཉིས་ཞེས་ཟེར།
།འཆད་ན་གཉིས་སུ་ཡོད་མོད་ཀྱི། །འཇུག་
པའི་ཚེ་ན་རྣམ་དབྱེ་མེད། །དེས་ན་བཤད་ཚུལ་རྣམ་པ་གཉིས། །དངོས་དང་ཞེན་པར་འཆད་པ་འཁྲུལ།
།སྔ་མས་སྒྲ་བྱུང་གྲགས་པ་ལ། །རྗེས་
དཔག་མེད་ཕྱིར་མི་ཁེགས་པའམ། །ཡང་ན་དེ་ལ་འགལ་ཟླ་མེད། །དེས་ན་ངེས་ཕྱིར་གནོད་བྱེད་ཡིན།
།ཕྱི་མ་གྲགས་པའི་རྗེས་དཔག་ལས། །ཡུལ་
གྱི་དབྱེ་བ་བསྟན་པ་ཡིན། །དེ་ལྟར་ཤེས་ན་གྲགས་པ་ཡི། །བསལ་བ་མཁས་པའི་དགོངས་པ་འགྲུབ།
ཚད་མ་རིགས་པའི་གཏེར་ལས་རང་དོན་
རྗེས་དཔག་བརྟག་པའི་རབ་ཏུ་བྱེད་པ་སྟེ་བཅུ་པའོ།། །།
กก |