༄༅། །རྒྱ་གར་སྐད་དུ།
ཤྲཱི་ཙ་ཏུརྤཱི་ཋ་བི་ཁྱཱ་ཧ་ཏནྟྲ་རཱ་ཛ་ནཱ་མ། བོད་སྐད་དུ།
དཔལ་གདན་བཞི་པའི་རྣམ་པར་བཤད་པའི་རྒྱུད་ཀྱི་རྒྱལ་པོ་ཞེས་བྱ་
བ། བཅོམ་ལྡན་འདས་རྣལ་འབྱོར་ནམ་མཁའ་དང་། རྡོ་རྗེ་རྣལ་འབྱོར་དང་།
རྡོ་རྗེ་རྣལ་འབྱོར་མའི་ཚོགས་གང་གཱ་ཀླུང་གི་བྱེ་མ་སྙེད་ཀྱི་གངས་
དང་མཉམ་པ་ཐམས་ཅད་ལ་གུས་པས་ཕྱག་འཚལ་ལོ།
།བྱང་ཆུབ་སེམས་དཔའ་སེམས་དཔའ་ཆེན་པོ་ཐུགས་རྗེ་ཆེན་པོ་དང་ལྡན་པ་འཕགས་པ་
སྤྱན་རས་གཟིགས་དབང་ཕྱུག་ལ་གུས་པར་ཕྱག་འཚལ་ལོ།
།དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །རྣལ་འབྱོར་རྣལ་འབྱོར་དབང་ཕྱུག་
ཉིད། །དེ་བཞིན་རྣལ་འབྱོར་མཆོག་ཉིད་དང་།
།དྲང་སྲོང་རྣམས་ཀྱི་ཡེ་ཤེས་དབང་། །རྣལ་འབྱོར་མ་ཡི་དྲ་མཆོག་བདེ།
།གནས་གཙང་མ་ན་
བཞུགས་ནས་སུ། །ཐམས་ཅད་མཁྱེན་པས་འདི་སྐད་གསུངས།
།རྣལ་འབྱོར་གྱི་དབང་ཕྱུག་བྱེ་བཕྲག་བརྒྱད་ཅུའི་དབུས་ནས་ཕྱག་ན་རྡོ་རྗེ་ཐལ་མོ་
སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ།
།གསང་བ་སྦྱོར་བའི་ཁྱད་པར་དང་། །བདག་ནི་དེ་ཉིད་ཇི་ལྟར་ལྷ།
།ཆུ་དང་མེ་ནི་ཇི་ལྟར་
ལགས། །ཇི་ལྟར་རབ་མཛེས་ནམ་མཁའ་དང་། །ཡེ་ཤེས་ཇི་ལྟར་འཚལ་བགྱི་བ།
།ཡེ་ཤེས་དབང་ལ་ཉན་པར་འཚལ། །འཁོར་བ་ལས་བསྒྲལ་མཚན་
ཉིད་དག །ཉོན་ཅིག་དཔལ་ལྡན་རྡོ་རྗེ་འཆང་། །དང་པོར་དབང་གི་མཚན་ཉིད་དང་།
།གཉིས་པར་ཡི་གེ་གཅིག་པ་ནི། །གསུམ་ས་བོན་བརྒྱད་པ་
དང་། །བཞི་བར་རྩ་ཡི་ལྷ་ཉིད་དོ། །བདག་ཉིད་ལུས་ཀྱི་ཡེ་ཤེས་མེ།
།བློ་ལྡན་རྣལ་འབྱོར་པས་ཤེས་བྱ། །ལྟོ་བ་མེ་ཡི་ཐབ་ཁུང་དུ།
།དེ་ཡི་མེ་ལ་སྦྱིན་
སྲེག་བྱ། །སྟེང་དང་འོག་དང་དབུས་སུ་ནི། །རྣམ་ཤེས་རྩ་ནི་བསྡམ་པར་བྱ།
།ཐོག་མར་བདག་ཉིད་ལྟོ་བ་རུ། །རྩ་ཡི་ལྷ་ནི་རྣམ་པར་བསྒོམ། །ལྟོ་བའི་
མེ་ནི་འབར་ལ། ཁྱད་པར་ཁ་དོག་བསྒོམ་པ་ནི། །ལྟེ་བའི་མེ་ནི་དཀར་པོའོ།
།གཡོན་བའི་མེ་ནི་དེ་བཞིན་སེར། །ལྷོ་ནི་སྔོན་པོའི་མིང་ཅན་ཏེ། །ལྷག་
མ་འདི་ནི་དམར་པོར་སྦྱང་། །དེ་དབུས་ཁ་དོག་སྔོ་བསངས་སུ།
།མེ་ཡི་དུ་བར་རབ་ཏུ་གྲགས། །མེ་ཡི་དབུས་སུ་པདྨ་ཉིད། །ཉི་མའི་དཀྱིལ་འཁོར་
གྱིས་བརྒྱན་པ། །དེ་ཡི་དབུས་སུ་ཡེ་ཤེས་ལྷ། །འཁོར་བ་ཀུན་ལས་གྲོལ་བར་མཛད།
།ཕྱག་གཉིས་སྦྱོར་བའི་གནད་ལ་ནི། །རྡོ་རྗེ་དྲིལ་བུས་རྣམ་པར་
བརྒྱན། །གཡས་ཀྱི་ལག་ན་རྡོ་རྗེ་དང་། །རྒྱན་རྣམས་མཐོན་ཀའི་རྩེ་མོ་ཅན།
།བཞད་དང་ཁྲོ་བས་ཧཱུྃ་སྒྲོགས་ཤིང་། །འདི་ཡི་ཡེ་ཤེས་དབང་ཕྱུག་
ལྷ། །དེ་ཡི་དབུས་སུ་རབ་ཏུ་གྲགས། །ཤར་དུ་ལྷ་མོ་སྒྲོལ་མ་དང་།
།བྱང་དུ་དེ་བཞིན་གོས་དཀར་མོ༈ །ནུབ་ཏུ་ལྷ་མོ་མཱ་མ་ཀཱི།
།སངས་རྒྱས་སྤྱན་ནི་ལྷོ་
རུའོ། །གཟུགས་ནི་མཐེ་བོའི་ཚད་ཙམ་དུ། །བདག་ཉིད་ལྷ་ཡི་ལྷ་ཉིད་དོ།
།ལྕེ་ལ་མཆུ་ནི་སྦྱར་བར་བྱ། །ནམ་མཁའ་རྣ་བ་སྣ་དག་ལའོ། །མིག་ལས་
འདི་རྣམ་པར་ཤེས། །དེ་བཞིན་ཚངས་པར་འབར་བའི་མེ།
།མགྲིན་པར་རྨོངས་པའི་ས་ཉིད་དང་། །གཡོ་བ་སྙིང་ལ་གནས་པ་ཉིད། །ཐམས་ཅད་
ཉོན་མོངས་བྲང་དང་ནི། །ཕྱུགས་གཉིས་ལྟེ་བའི་རྩ་བར་རོ།
།ཡན་ལག་བརྒྱད་དུ་བཀོད་ནས་ནི། །འདི་ཉིད་ལྷ་ནི་ཤེས་པར་བྱ།
།རྣམ་ཤེས་རྩ་ནས་
དྲངས་པ་ཡི། །དེ་བཞིན་དུ་ནི་བདུད་རྩི་དགུ། །སྟེང་གི་མཆེ་བ་གཉིས་པའི་རྩ།
།ཀུན་ཏུ་ཚྭ་བཞིན་ཞུ་ལྟར་བབས། །ཇི་བཞིན་ཆུ་ནི་འོ་མའི་མིང་། །ལྕེ་
ཡི་སྟེང་དུ་བསྟེན་པ་ཡི། །ཉི་མ་ཐིག་ལེ་འབར་བ་ཡིས།
།འཁོར་ལོ་ཕྲར་བ་རྡུལ་བཞིན་ནོ། །སྟེང་གི་ནམ་མཁའ་ནམ་མཁའ་ནི།
།བསྲེག་པའི་བདག་
ཉིད་དུ་ནི་ཐིམ། །གཡོན་པའི་དབུགས་ནི་བུད་མེད་ཉིད།
།གཡས་པ་དེ་བཞིན་སྐྱེས་བུའོ། །འོག་དང་སྟེང་ནི་འདི་ཡི་རྩ།
།འོག་ནི་སྔོན་དུ་རབ་ཏུ་
གྲགས། །དབུགས་དང་དྲི་ནི་མཉམ་དྲངས་ནས༈ །རྒྱས་པའི་ལྔ་ཡི་སྟེང་དུ་ནི།
།རྣམ་ཤེས་གཉིས་ཀྱི་རྩ་ནས་དྲང་། །བདུད་རྩི་དེ་ལ་རྣམ་པར་
ཐིམ། །ཡེ་ཤེས་དབང་ཕྱུག་དེའི་སྟེང་དུ། །དེ་ལ་བདུད་རྩིས་བཀྲུ་བར་བྱ།
།དེ་ལྟར་ཀུན་ཏུ་བཞིན་རྡུབས་ནས། །དབུགས་མི་གཡོ་བར་བསྒོམ་པར་
བྱ། །ལག་མཐིལ་ཟླ་བ་ཉི་མ་བསྒོམ། །ཡེ་ཤེས་ཡི་གེས་དེ་དབུས་སོ།
།རི་དགས་མགོ་བོའི་ཕྱག་རྒྱ་ཡིས། ཁམས་ལྔའི་བདག་ཉིད་བསྲེག་པའོ། །སྔོན་དུ་
ས་བོན་ཧཱུྃ་བྱས་ནས། །གཉིས་པར་དེ་བཞིན་གསུམ་དང་ནི།
།གསུམ་པར་བཟོད་པས་བཟའ་བའོ། །དེ་བཞིན་རླུང་མིན་བཞི་པ་དང་། །ལྔ་པར་ངང་
བའི་ས་བོན་གྱིས། །མཁས་པས་ཁམས་ལྔའི་སྦྱིན་སྲེག་བྱ།
།བདག་གི་དེ་ཉིད་མེ་ལ་ནི། །བདག་ཉིད་སྦྱོར་བས་བསྲེགས་པ་ཉིད།
།ཇི་ལྟར་ཡེ་ཤེས་མི་དེ་
ནི། །བསྲེག་པའི་བདག་ཉིད་རབ་ཏུ་གྲགས།
།སྦྱིན་སྲེག་བྱས་པའི་སྦྱོར་བའི་ལེའུ་ཞེས་བྱ་དང་པོ་རྫོགས་སོ།། །།
སྟོང་པའི་བདག་ཉིད་དགེ་བ་ཡིས། །སྐྱེ་བའི་དྲ་བ་རྣམ་འཇིག་པས།
།འཁོར་བ་རུ་ནི་མི་གནས་པ། །བཅོམ་ལྡན་འདས་ལ་གཉན་པར་འཚལ། །སྟོང་
པའི་དེ་ཉིད་རང་བཞིན་གྱིས། །ཉོན་ཅིག་རྒྱལ་པོ་རྡོ་རྗེ་འཆང་།
།གླིང་གཞན་དེ་བཞིན་རི་རབ་དང་། །ས་ནི་ནམ་མཁར་ཀུན་ཏུ་བསམ། །རྒྱ་མཚོ་ཆུ་
ཡི་དབྱིབས་དང་ནི། །ཡིད་འོང་པདྨ་འབྱུང་བར་ལྡན།
།སྟོང་པའི་མཚན་ཉིད་སྔོན་འགྲོ་བས། །མེ་ཡི་བདག་ཉིད་བསྒོམ་པར་བྱ།
།ཤར་དུ་ལྷ་མོ་སྒྲོལ་
མ་འདི། །དེ་བཞིན་བྱང་དུ་གོས་དཀར་མོ། །མཱ་མ་ཀཱི་ནི་ནུབ་ཕྱོགས་སུ།
།ལྷོར་ནི་ལྷ་མོ་སངས་རྒྱས་སྤྱན། །ཆུ་ནི་སྒྲོལ་མར་ཀུན་ཏུ་ཐིམ།
།མེ་ནི་གོས་
དཀར་མ་ལ་ཐིམ། །མཱ་མ་ཀཱི་ནི་ནུབ་ནས་ས། །རླུང་ནི་སངས་རྒྱས་སྤྱན་ལ་ཐིམ།
།རྒྱ་ཤིང་མེ་ཏོག་པད་མ་འདི། །སྒོང་སྐྱེས་ཡེ་ཤེས་ཀྱི་ནི་གདན། །དེ་ཡི་
ཡེ་ཤེས་རྒྱལ་དབང་མོ། །སྒོང་སྐྱེས་འོག་ཏུ་འབྱེད་པ་ཅན། འབྱེད་པ་ཅན།
གཟུགས་མེད་སྲིད་པའི་དབྱིབས་ཅན་ན། །ཡེ་ཤེས་རྒྱལ་པོ་ཉིད་དུ་
ཐིམ། །དེ་ལྟར་བདག་ཉིད་སྟོང་པ་ཉིད། །དེ་ཉིད་དེ་ཉིད་སྟོང་པ་ཉིད།
།འཇིགས་པ་མེད་ཅིང་འཚེ་མེད་པར། །དངོས་པོས་དངོས་པོ་བསྒོམ་པར་
བྱ། །ཇི་ལྟར་སྟོང་ཉིད་དེ་བསྒོམས་ལ། །ལུས་ཀྱི་དྲི་མ་རབ་ཏུ་བཀྲུ།
།ཕྱིས་ནི་ཆུ་ཡི་གཟུགས་སུ་བསྒོམ། །དམར་པོ་འདབ་མ་བརྒྱད་དང་ནི།
།གེ་སར་ལྟེ་
བར་བཅས་པ་ཡིས། །དབུས་སུ་པད་མས་རྣམ་པར་བརྒྱན། །འདབ་བརྒྱད་ལ་ནི་ལྷ་མོ་ཡི།
།ས་བོན་བརྒྱད་ཀྱིས་རྣམ་པར་བརྒྱན། །ཤར་དུ་སི་ཀ་ཞེས་
བྱ་དང་། །བྱང་དུ་བཟོད་པའི་ས་བོན་བཞིན། །ནུབ་ཏུ་རླུང་གི་ས་བོན་གསུངས།
།ལྷོ་རུ་ཧཱུྃ་གིས་དབང་ཕྱུག་གོ །དབང་ལྡན་དུ་ནི་དབང་པོའི་
དབྱངས། །མེ་ཕྱོགས་སྒྲ་དང་རྣམ་ཤེས་སོ། །བདེན་བྲལ་དབྱངས་ཡིག་བརྒྱད་པ་དང་།
།རླུང་དུ་དབྱངས་ཡིག་ལྔ་པའོ། །དབུས་སུ་ཡེ་ཤེས་རྒྱལ་པོ་
འདི། །སྒོང་སྐྱེས་ཡེ་ཤེས་དབང་ཕྱུག་ནི།
།ཉི་མའི་དཀྱིལ་འཁོར་ཀྱིས་དཀྲིས་པ། བདུད་རྩི་ས་བོན་འབར་བའོ།
ཁ་དོག་བདུན་པའི་མེ་འདི་ནི། །གོ་
འཕང་མཆོག་གི་བསྒོམ་པར་བྱ། །དབུགས་མི་གཡོ་བའི་སེམས་དཔའ་ཡིས།
།དངོས་པོས་དངོས་པོ་བསྒོམ་བྱས་ནས། །ཕྱིས་ནི་རྩ་ཉིད་ལྷ་ཡི་
གདན། །མིག་ལ་ས་ཡིས་ས་བོན་དང་། །ནམ་མཁའ་སྣ་དང་རྣ་བ་ལའོ།
།ལྕེ་ལ་བདུད་རྩིའི་ས་བོན་འདི། །སྙིང་གར་ཧཱུྃ་ཞེས་བྱ་བའི་མིང་། །ཡན་ལག་
དྲུག་འཛིན་ས་བོན་གྱིས། རྣལ་འབྱོར་ལུས་ནི་རྣམ་པར་བསྲུང་།
།ཡེ་ཤེས་ལུས་འདི་ཤེས་བྱས་པས། །ཅི་ཡི་ཕྱིར་ན་སྐྱེ་བོའི་མིང་།
།གཟུགས་མེད་ཡེ་
ཤེས་གཟུགས་ཅན་དང་། ཁ་དོག་མེད་ཅིང་མཚོན་ཀུན་དངོས།
།གནས་མེད་གནས་ཀྱི་དབྱིབས་ཅན་དང་། །མི་རིགས་དེ་བཞིན་རིགས་པ་
ཉིད། །སྟོང་པ་ཉིད་ཀྱི་ལེའུ་ཞེས་བྱ་བ་སྟེ་གཉིས་པ་རྫོགས་སོ། །
བདག་ཉིད་ལྔ་ཡི་བྱེ་བྲག་ཉིད། །བཅོམ་ལྡན་འདས་ལ་མཉན་པར་འཚལ།
།ཉོན་ཅིག་རྒྱལ་པོ་རྡོ་རྗེ་འཆང་། །གཉིས་དང་གཉིས་མེད་ལ་བརྟེན་
ནས། །བསྐལ་པ་བཟང་པོ་བརྒྱ་ཡི་སྔོན། །དག་པའི་གནས་ལ་ཀུན་ཏུ་གནས།
།རི་རབ་ལྷ་མོ་སངས་རྒྱས་སྤྱན། །མཱ་མ་ཀཱི་ནི་ལྷོ་ཕྱོགས་གནས། །ལྷ་མོ་
སྒྲོལ་མ་ནུབ་ཀྱི་གླིང་། །དེ་བཞིན་བྱང་དུ་གོས་དཀར་མོ།
།ཤར་དུ་ལྷ་མོ་སྙན་མ་འདི། །ལྷ་མོ་རྣམ་པ་ལྔ་ཡི་གནས།
།དེ་ལྟར་སྙིང་ག་རི་རབ་དང་། །དེ་
བཞིན་མགོ་བོ་མཱ་མ་ཀཱི། །སྒྲོལ་མ་ལྷོ་ཡི་གནས་དང་ནི།
།གཡོན་པ་དེ་བཞིན་གོས་དཀར་མོ། །སྙན་པ་མོ་འདི་བདག་གིས་གནས།
།ལྷ་མོ་ལྔ་ཡིས་བྱིན་
གྱིས་བརླབ། །པདྨའི་དབུས་སུ་རྡོ་རྗེ་དང་། །རྡོ་རྗེའི་དབུས་སུ་པདྨ་ཅན།
།རྡོ་རྗེ་བདུད་རྩི་ཀུན་ཐིམ་པ། །ལུས་པོ་ཀུན་ནས་དཀྲིས་པའོ། ༈ །ཡན་ལག་
བརྒྱད་ཀྱི་རྩ་ཉིད་དུ། །བདུད་རྩིའི་ཆུ་ནི་རྣམ་པར་ཐིམ།
།ལྷ་ཡི་གནས་ནི་ནམ་མཁའ་ཉིད། །རྡོ་རྗེའི་ས་བོན་དུ་རབ་ཤེས།
།བདག་ཉིད་ལུས་ལ་
བསྒོམས་པ་ནི། །རྡོ་རྗེའི་རྩ་ཞེས་རབ་ཏུ་གྲགས། །དེ་ཡི་ལུས་ཀྱི་ཁྲག་དང་ནི།
།ལུས་དང་ལྷན་ཅིག་བཅས་པར་གནས། །ཁྲག་དང་ཆུ་ནི་ཀུན་སྦྱོར་
བས། །བློ་ལྡན་ཡན་ལག་བརྒྱད་ནས་འཛག །ཇི་ལྟར་བདག་གིས་ས་བོན་ལྔ།
།དེ་ལྟར་པདྨ་ཡི་ཡང་བསྒོམ། །ཇི་ལྟར་བདག་ཉིད་ལུས་འདི་ནི། །ནམ་
མཁའ་རྡོ་རྗེ་འཇིབ་བྱེད་དོ། །རྐང་བས་རྐང་པ་དཀྲི་བྱ་ཞིང་།
།མཆུ་ཡིས་མཆུ་ནི་བཙིར་བྱས་ལ། །གཉི་གའི་ལག་པ་ཕྱག་རྒྱ་ནི།
།རྩེ་མོ་གསུམ་བའི་རྡོ་
རྗེ་བརྟག །རང་བཞིན་གྱིས་ནི་སོ་སྲ་དང་། །སྙིང་གའི་རྣམ་ཤེས་བསྒོམ་པ་ཡི།
།ཡེ་ཤེས་རྒྱལ་པོའི་ལུས་ཅན་འདི། །སྐྱེས་བུས་ཁྲོས་པས་ཧཱུྃ་བྱས་
ནས། །དེ་ལྟར་རྡོ་རྗེ་པདྨ་འདི། །རྣལ་འབྱོར་བསྡུས་པས་བསྐྱོད་པར་བྱ།
།གཉི་ག་དགའ་ཞིང་ཚིམ་པ་ཡིས། །ལྷ་རྣམས་ཐམས་ཅད་མཆོད་པར་བྱ།
ཁྲག་དང་ཁུ་བ་ལས་བྱུང་བའི། །ས་བོན་མྱུ་གུས་འགྲོ་བ་ལ།
།ལྷ་རྣམས་ལུས་ནི་ཡང་དག་འབྱུང་། །འདོད་ལ་དགའ་ཉིད་མ་ཡིན་ཏེ། །ལོངས་སྤྱོད་
ཕྱིར་ཡང་གནས་མི་བྱ། །སེམས་ཅན་དོན་ཕྱིར་འདོད་པའི་ཕྱིར།
།ཡོངས་སུ་རྫོགས་པའི་ཡིད་འོང་སྐུ། །གཉིས་མེད་སྦྱོར་བ་གནས་ལ་པར། །གཏོར་མ་
སྔོན་དུ་སྦྱིན་པར་བྱ། །སྦྱོར་བའི་ལེའུ་ཞེས་བྱ་བ་གསུམ་པ་རྫོགས་སོ།། །།
ཉོན་ཅིག་རྒྱལ་པོ་རྡོ་རྗེ་འཆང་། །དེ་ཉིད་བཅུ་ཡི་བྱེ་བྲག་ཉིད།
།ཡི་གེ་བཅུ་རུ་སྔོན་སྦྱར་བྱ། །ལྔ་ཡི་བདག་ཉིད་དུ་རྟོགས་བྱ།
།ལྔ་པ་ལྔ་ཡི་བདག་ཉིད་
ཀྱི། །ལྔ་ཡིས་ལུས་ནི་ཡོངས་སུ་བསྲུངས། །ཡི་གེ་བཅུ་ནི་ཇི་ལྟར་ལགས།
།ཇི་ལྟར་བདག་ཉིད་ལ་འདི་སྦྱར། །ཇི་ལྟར་སྦྱང་ཞིང་བསྒོམ་པ་དང་། །ཇི་
ལྟར་ས་བོན་མྱུ་གུ་སྟེ། །ཇི་ལྟར་ཐར་པ་ལ་གནས་ཉིད།
།ངོ་མཚར་ལྷ་ལ་ཉན་པར་འཚལ། །གསང་བ་གསང་བ་ཞེས་བྱ་བ།
།རྒྱལ་པོ་ཇི་བཞིན་དེ་ཉིད་
ཉོན། །ཐོག་མར་སྟོང་པ་དེ་ཁོ་ན། །སྟོང་པར་ཆུ་ནི་བསམ་པར་བྱ།
ཁ་དོག་བདུན་གྱི་པདྨ་ནི། །གེ་སར་དང་བཅས་ཡིད་འོང་བ། །སྟོང་ཕྲག་བརྒྱ་ཡི་
ཁྱོན་ཙམ་གྱིས། །པདྨ་གཟུགས་ནི་སྙིང་པོར་བཅས། །པདྨ་རྒྱ་ཆེར་རབ་མཛེས་པ།
།རིན་ཆེན་བདུན་གྱིས་མངོན་པར་སྤྲས། །དྲིལ་བུ་དྲ་བའི་ཕྲེང་བ་
དང་། །དར་དང་ན་བཟའ་མངོན་པར་འཕྱང་། །སེང་གེའི་གདན་ནི་མངོན་པར་བསམ།
།དེ་སྟེང་ཉི་མའི་དཀྱིལ་འཁོར་རོ། །པདྨ་རྡོ་རྗེའི་ངོ་བོ་
འདི། །འོད་ཟེར་ཉི་མ་བྱེ་བ་ཡི། །སངས་རྒྱས་ལྔ་ཡི་ས་བོན་གྱིས།
།རྡོ་རྗེའི་རྩེ་མོ་རྣམ་པར་བསམ། །དབུས་སུ་རྣམ་པར་སྣང་མཛད་དགྱེས།
།ཤར་དུ་དེ་
བཞིན་མི་བསྐྱོད་པ། །རིན་ཆེན་ས་བོན་ལྷོ་ཉིད་དུ།
།དེ་བཞིན་ནུབ་ཏུ་འོད་དཔག་མེད། །བྱང་ཕྱོགས་སུ་ནི་དོན་ཡོད་གྲུབ།
།ས་བོན་ལྔ་ནི་རྣམ་པར་
བསྒོམ། །པདྨ་བྱང་ཆུབ་ཡན་ལག་བརྒྱད། །ཇི་བཞིན་ས་ལ་རབ་ཏུ་བརྟག
།དབུས་སུ་སྙིང་པོ་སྒོ་ང་ལ། །རྣམ་པར་ཤེས་པའི་བདག་ཉིད་ཐིམ། །པདྨ་
བརྒྱད་པའི་རྩེ་མོར་ནི། །མངའ་བདག་དེ་བཞིན་རྣམ་སྣང་མཛད།
།ཤར་དུ་ལྷ་མོ་སྒྲོལ་མ་འདི། །བྱང་དུ་ལྷ་མོ་སངས་རྒྱས་སྤྱན།
།ནུབ་ཏུ་བསམ་པ་
གོས་དཀར་མོ། །དེ་བཞིན་ལྷོ་རུ་མཱ་མ་ཀཱི། །འོད་ཟེར་འབར་བ་རྣམ་མང་པོར།
།འཇིགས་པ་མེད་པར་བསྒོམ་པར་བྱ། །རྡོ་རྗེ་ལས་ནི་ལྷ་ཡི་
ལུས། །བཞུགས་པ་རུ་ནི་རྣམ་པར་བསམ། །སྤྱན་གསུམ་ཕྱག་ནི་དྲུག་པའོ།
ཁ་དོག་སྔོན་པོ་རབ་ཏུ་མཛེས། །རྡོ་རྗེ་ཡི་ནི་ཅོད་པན་ཅན། །དར་གྱིས་
བཅིངས་ཤིང་རྣམ་པར་འཕྱང་། །རྒོད་ཅིང་ཁྲོ་དང་སྒེག་པ་དང་།
།སེམས་དཔའི་སྐྱིལ་མོ་ཀྲུང་གིས་བཞུགས། །སྟེང་དུ་རལ་གྲི་འཕྱར་བ་
དང་། །གཉིས་པ་ལ་ནི་དེ་བཞིན་གཞུ། །གསུམ་པར་རྡོ་རྗེ་གདེངས་པ་གསོར།
།གཡོན་པའི་སྟེང་དུ་ཁ་ཊྭཱྃ་དང་། །གཉིས་པས་ལྷ་མོའི་ནུ་མ་
འཚིར། །གསུམ་པས་དྲིལ་བུའི་སྒྲ་སྒྲོགས་ཤིང་།
།རབ་ཏུ་མཛེས་པའི་ན་བཟའ་མནབས། །སྟག་གི་པགས་པའི་ཤམ་ཐབས་ཅན།
།རྒྱན་ཀུན་ཕུན་སུམ་
ཚོགས་པ་དང་། །མེ་ཏོག་ཕྲེང་བས་རབ་ཏུ་བརྒྱན། །གཡོན་དུ་ལྷ་མོ་སྒྲོལ་མ་ནི།
།ཕྱག་གཅིག་གིས་ནི་འཁྱུད་པ་དང་། །གཅིག་གི་ཕྱག་ན་ཐོད་པ་
ནི། །བདུད་རྩིའི་ཆུ་དང་ཡང་དག་ལྡན། །མཱ་མ་ཀཱི་ཡང་དེ་བཞིན་དུ།
།གཅིག་གི་ཕྱག་གིས་མངོན་པར་འཁྱུད། །གཅིག་གི་ཕྱག་གི་ཐོད་པ་ན། །ཁྲག་
དང་ཤ་ཡིས་གང་བའོ། །སྤྱན་མ་རྒྱབ་ཏུ་ཀུན་ནས་བསམ།
།ཕྲེང་བས་ཕྱག་ནི་བརྒྱན་པ་དང་། །གཏོར་མ་སྦྱངས་པའི་ཕྱག་གཉིས་པ།
མདུན་དུ་སྣོད་
ལ་རྣམ་པར་བལྟ། །དེ་ལྟར་བདག་ཉིད་ལྔ་ཡི་ལུས། །ལུས་ལ་ཀུན་ནས་ཡང་དག་གནས།
།ཤར་དུ་ལྷ་མོ་མེ་ཏོག་མ། །ལྷོ་རུ་སྤོས་དང་ཡང་དག་
ལྡན། །ནུབ་ཏུ་མར་མེའི་ལག་པ་མ། །བྱང་དུ་དྲི་ཡི་ལྷ་མོའོ།
།དབང་ལྡན་དུ་ནི་སྒེག་མོ་ཉིད། །དེ་བཞིན་མེ་ཕྱོགས་ཕྲེང་བ་མ།
།བདེན་བྲལ་ཕྱོགས་སུ་
དབྱངས་མ་དང་། །རླུང་དུ་གར་མ་བརྒྱད་པའོ། །ཉི་མ་བྱེ་བ་བརྒྱ་སྟོང་གི།
།འོད་ཟེར་རྣམ་པ་མང་པོའི་མདོག །སངས་རྒྱས་སྤྲིན་ལྟར་འཕྲོ་པ་
ནི། །སེམས་ཅན་སྒྲོལ་ལ་མཆོག་ཏུ་བརྩོན། །བདག་ཉིད་ལྷ་དང་ལྷ་གཞན་ནི།
།བདག་ཉིད་ལྷ་ནི་མཆོག་ཡིན་ནོ། །བདག་ཉིད་གཟུགས་སུ་མི་ནུས་
པས། །གཟུགས་བརྙན་ལ་སོགས་བསྒོམ་པར་བྱ། ཕྱིས་ནི་དེ་ཡི་མདུན་ཉིད་དུ།
།མཁས་པ་ཡིས་ནི་མཆོད་པར་བྱ། །དེ་ཉིད་པདྨ་བསམ་པ་དང་། །དེ་
ཉིད་གཞལ་ཡས་ཁང་པ་བསམ། །སྔོན་དུ་གསུངས་པའི་གདན་ལ་ནི།
།དེར་ནི་ཉི་མས་མངོན་པར་གཡོགས། །སྣ་ཚོགས་རིན་ཆེན་མཆོད་པ་
དང་། །སྣ་ཚོགས་དར་ནི་མངོན་པར་དཔྱངས། །ལག་གཉིས་ཐལ་མོ་སྦྱར་བྱས་ནས།
།པདྨའི་ཚུལ་དུ་ཁ་ཕྱེ་ལ། །ཨོཾ་ཀ་མ་ལ་ཨུད་བྷ་བེ་ཤྲཱི་སྭཱ་
ཧཱ། །པདྨའི་སྔགས་དང་ཕྱག་རྒྱའོ། །རང་གི་དབུགས་ལས་ཕྱུང་ནས་ནི།
།རྡོ་རྗེ་མདུན་དུ་རྣམ་པར་བསྒོམ། །ལག་གཉིས་ཁུ་ཚུར་བཅངས་ནས་
ནི། །སྡིགས་མཛུབ་གཡོན་པའི་མཐེའུ་ཆུང་དཀྲི། །ལྕགས་ཀྱུ་ཡི་ནི་རྣམ་པའོ།
།ཨོཾ་བཛྲ་ཨོཾ་ཀུ་ཤ་ཛཿ །རྡོ་རྗེ་ལྕགས་ཀྱུའི་སྔགས་དང་ཕྱག་རྒྱའོ། །ལག་
གཉིས་རྡོ་རྗེ་ཁུ་ཚུར་བྱས། །སྡིགས་མཛུབ་གཉིས་ནི་དཀྲི་བྱས་པ།
།ཞགས་པ་ཡི་ནི་རྣམ་པའོ། །ཨོཾ་བཛྲ་པཱ་ཤ་ཧཱུྃ། །ཞགས་པའི་སྔགས་དང་ཕྱག་
རྒྱའོ། །ཇི་ལྟར་བདག་ཉིད་གཟུགས་བརྙན་བཞིན། །དེ་ལྟར་མདུན་དུའང་རབ་བསམ་བྱ།
།ལྷ་མོ་བརྒྱད་ནི་ཀུན་རྫོགས་པ། །ཁྲོ་བོའི་རྒྱལ་པོ་བཞི་པར་
རོ། །ཤར་དུ་གཤིན་རྗེ་མཐར་བྱེད་དངོས། །ལྷོ་རུ་དེ་བཞིན་བགེགས་མཐར་བྱེད།
།ནུབ་ཏུ་པདྨ་མཐར་བྱེད་པ། །བྱང་དུ་ཁྲོ་བོ་སྐྱོང་བའོ། །ལག་གཉིས་
རྡོ་རྗེ་ཁུ་ཚུར་བཅིངས། །རྒྱབ་དང་རྒྱབ་ཏུ་སྦྱར་བར་བྱ། །ཨོཾ་བཛྲ་སྥཊ་བྃ།
།རྡོ་རྗེ་ལྕགས་སྒྲོག་གི་སྔགས་དང་ཕྱག་རྒྱའོ། །ལག་གཉིས་རྡོ་རྗེ་ཁུ་ཚུར་
བཅངས། །མཐེའུ་ཆུང་གཉིས་ནི་སྦྱར་བར་བྱ། །ཨོཾ་བཛྲ་གྷཎྜེ་ཧོཿ
།རྡོ་རྗེ་དྲིལ་བུའི་སྔགས་དང་ཕྱག་རྒྱའོ། །ལག་པ་ལྕགས་སྒྲོག་ཕྱག་རྒྱ་ལས།
།སོར་མོ་
དབུས་མ་བརྐྱང་བྱས་ལ། །ན་མོ་རཏྣ་ཏྲ་ཡཱ་ཡ། །ཨོཾ་བཻ་རོ་ཙ་ན་ས་མཱ་དྷི།
།བི་ཤྭ་ཡེ་གྷུ་ཡ་པ་ཛ་བྷི་ཥཻ་སྭཱ་ཧཱ། །ཨོཾ་ཧཱུྃ་ཧཱུྃ་ཧཱུྃ།
།ཧོ་ཧོ་ཧོ་ཧོ་ཧོ་ཧོ། །ཧྲི་ཧྲི་ཧྲི་
ཧྲི་སྭཱ་ཧཱ། བཅོམ་ལྡན་འདས་རྣལ་འབྱོར་ནམ་མཁའི་སྔགས་དང་ཕྱག་རྒྱའོ།
།ཨོཾ་ཏཱ་རེ་ཏུཏྟཱ་རེ་ས་ཏ་ཀྵི་ཏ་ཧཱུྃ་སྭཱ་ཧཱ། །ལྷ་མོ་སྒྲོལ་མའི་སྔགས་སོ།
།ཨོཾ་ཧི་
ལི་ཧི་ལི་བ་ལི་སྭཱ་ཧཱ། །གོས་དཀར་མོའི་སྔགས་སོ།
།ཨོཾ་ཏ་ར་སརྦ་ཏ་ན་ཧཱུྃ་ཕཊ། །མཱ་མ་ཀཱིའི་སྔགས་སོ།
།ཨོཾ་བུདྡྷ་བི་བུདྡྷ་ཡ་ཧཱུྃ། །སངས་རྒྱས་སྤྱན་གྱི་
སྔགས་སོ། །སྡིགས་མཛུབ་གཉིས་དང་གུང་མོ་ནི། །དབུས་དང་དབུས་སུ་སྦྱར་བྱ།
།མཐེ་བོང་ངོས་སུ་སྦྱར་བ་ནི། །ལྷ་མོ་བཞི་ཡི་ཕྱག་རྒྱའོ། །མ་ནིང་ཡི་
གེ་བཞི་པ་ནི། །མེ་ཏོག་མ་ལ་སོགས་པ་དང་། །སྒེག་མོ་ཡི་ནི་སྔགས་ཉིད་ཡིན།
།གཡས་བརྐྱང་རྐང་བ་ཡང་དག་གནས། །སྡིགས་མཛུབ་སྙིང་གར་
སྦྱིན་བྱས་ནས། །དཔུང་པ་མདུན་ནས་བརྐྱང་བྱས་ནས།
།སེ་གོལ་ཧཱུྃ་གི་རྣམ་པ་དང་། །ལྷན་ཅིག་ཏུ་ནི་སྦྱར་བྱས་པ།
།འདི་ནི་ཁྲོ་བོའི་ཕྱག་རྒྱའོ། །ཨོཾ་
ཨཱ་ཡུཿཔཱ་ལ་པྲ་ཏི་རཀྵ་བན་དྷ་ཡ་ཧཱུྃ་ཕཊ། །ཤར་ཕྱོགས་ཀྱི་སྒོར་ཞི་བ་ཡིའོ།
།ཨོཾ་ཨཱ་ཀརྵ་ཡ་ས་ཏྭ་དྷཱ་ཏུ་ནཱྃ་ཀྲོ་སྭཱ་ཧཱ། །བྱང་དུ་རྒྱས་པ་ཡིའོ།
།ཨོཾ་མོ་ཧ་
ཡ་མོ་ཧ་ཡ། །སརྦ་ས་ཏྭཱ་ནཱྃ་ཤྲཱི་སྭཱ་ཧཱ། །ནུབ་ཏུ་དབང་གིའོ།
།ཨོཾ་ཤཀྵ་སརྦ་དུཤྚ་གྷཱ་ཏ་ཡ་ཧྲི་ཕཊ། །ལྷོ་རུ་མངོན་པར་སྤྱོད་པ་ཡིའོ།
།ཨོཾ་སུ་ག་ན་དྷ་ཧཱུྃ་ཧཾ་
སྭཱ་ཧཱ། །ལག་པ་གཡས་པ་བརྐྱང་བ་དྲིའི་ཕྱག་རྒྱའོ།
།ཨོཾ་སུ་སོ་བིད་པུཥྤེ་བྷྱཿསྭཱ་ཧཱ།
།སྡིགས་མཛུབ་དང་མཐེབ་མོ་སྦྱར་བ་ནི་མེ་ཏོག་གི་སྔགས་དང་
ཕྱག་རྒྱའོ། །ཨོཾ་དྷཱུ་པ་མཱ་ཀུ་ལ་སྭཱ་ཧཱ། །སོར་མོ་དབུས་མ་བསྒྲེང་བ་ནི།
།བདུག་པའི་སྔགས་དང་ཕྱག་རྒྱའོ།
།ཨོཾ་ཏྵིཀྵ་ཎ་དཱི་པེ་པྲ་ཏི་གྲྀ་ཧྞ་སྭཱ་ཧཱ། །ཁུ་ཚུར་
བཅངས་ནས་མཐེ་བོ་བསྒྲེང་བ་ནི། །མར་མེའི་སྔགས་དང་ཕྱག་རྒྱའོ།
།ཨོཾ་ཀུ་རུ་ཀུ་རུ་བི་ཛ་ཡ་སྭཱ་ཧཱ། །ལག་པ་གཉིས་བརྐྱང་ནས་དབུས་སུ་སྦྱར་བ་
ནི། །གཏོར་མའི་སྔགས་དང་ཕྱག་རྒྱའོ། །ཇི་ལྟར་སྔོན་དུ་སྦྱོར་བ་ཡིས།
།མཁས་པ་ཡིས་ནི་མཆོད་པར་བྱ། །ཧཱུྃ་གི་གླུ་ཡི་རྣམ་པ་ཡིས། །སངས་རྒྱས་ཀུན་
ནས་མཉེས་བར་བྱ། །ལག་གཉིས་རྡོ་རྗེ་ཁུ་ཚུར་བྱས།
།རྐེད་པའི་ཕྱོགས་སུ་བཟུང་བྱས་ལ། །པི་ཝང་ཚུལ་གྱིས་བསྒྲེང་བ་དང་།
གླིང་བུའི་ཚུལ་གྱིས་
འབུད་པ་དང་། །སིལ་སྙན་ཚུལ་གྱིས་དཀྲོལ་བ་དང་།
།བརྡབ་པའི་ཚུལ་གྱིས་རྡེགས་པ་དང་། །གར་གྱི་ཚུལ་གྱིས་བསྐྱོད་པ་དང་།
།རླུང་གཡབ་ཚུལ་
གྱིས་གཡོབ་པ་དང་། །རྒྱལ་མཚན་ཚུལ་གྱིས་བསྒྲེང་བ་དང་།
།བླ་རེའི་ཚུལ་གྱིས་བྲེ་བ་དང་། །བ་དན་ཚུལ་གྱིས་འཕྱར་བ་དང་།
།གདུགས་ཀྱི་ཚུལ་
གྱིས་དགབ་པ་དང་། །ཅང་ཏེའུའི་ཚུལ་གྱིས་འཁྲོལ་བ་དང་།
ཁར་རྡའི་ཚུལ་གྱིས་བརྡུད་པ་དང་། །བཞད་པའི་ཚུལ་གྱིས་འཛུམ་པ་དང་།
།ཁྲོ་བོའི་
སྟངས་སྟབས་ཡན་ལག་བསྐྱོད། །དེ་ལྟར་དེ་ཉིད་རྣལ་འབྱོར་པས།
།གླུ་ཡི་མཆོད་པའི་ཁྱད་པར་ཉིད། །ཧཱུྃ་ཧཱུྃ་ཧཱུྃ།
བདག་མེད་རྣལ་འབྱོར་བསྒོམས་པ་
ཡིས། །འབྱིན་པའི་ས་བོན་གཟུང་བྱས་པ། །སྤྱི་ཡི་རྣལ་འབྱོར་སྟོན་པའོ།
།དབང་པོ་མཆོག་གི་མཆོད་པ་ཆེ། །ཐར་པ་ཆེན་པོ་གནས་ཆེན་པོ། །གསང་
ཞིང་དེ་ཉིད་གསང་བ་ཡི། །གསང་བའི་བདག་པོ་དགའ་ཆེན་པོ།
།རྣམ་སྣང་མཛད་ལ་ཕྱག་འཚལ་འདུད། །ལུས་ཀྱི་རྩ་ནི་ལྔ་ཉིད་ལས། །ལྷ་དང་ལྷ་
མིན་མངོན་པར་སྤྲུལ། །བདེ་བ་བསྒྲུབ་པ་ཞེས་བྱ་བ།
།སྦྱོར་བའི་སྐུལ་ཕྱག་འཚལ་འདུད། །གླུ་དང་བསྟོད་པས་ཉེར་མཆོད་ནས།
།ཇི་ལྟར་ལས་ལ་
མངོན་བདེ་བར། །རང་གི་སྔགས་ཀྱི་ཡི་གེ་ཡིས། ཕྲེང་བ་ལ་ནི་བཟླས་པར་བྱ།
།ཇི་ལྟར་ནུས་པས་མཆོད་བྱས་ལ། །སླར་ཡང་གཤེགས་སུ་གསོལ་
བའོ། །དབུགས་ཀྱིས་བདག་ཉིད་ལུས་བཀང་སྟེ། །ལྷན་ཅིག་ཐིམ་པར་བསམ་པར་བྱ།
།ཇི་ལྟར་རྣལ་འབྱོར་ནམ་མཁའ་ཉིད། །དེ་ལྟར་རྣམ་པར་སྣང་
མཛད་པ་བདག །ཇི་ལྟར་རྣམ་པར་སྣང་མཛད་ལྷ། །དེ་བཞིན་རྒྱབ་ཀྱི་རྩ་ཉིད་དོ།
།ཇི་ལྟར་སྔོན་གྱི་རྩ་ཉིད་ལས། །དེ་བཞིན་ཡེ་ཤེས་སྐྱེ་བ་འདི། །ཆུ་
ནི་སྒྲོལ་མ་ཞེས་སུ་བཤད། །མེ་ལ་གོས་དཀར་ཡང་དག་ལྡན།
།རླུང་ལ་ལྷ་མོ་སངས་རྒྱས་འདི། །དེ་བཞིན་རབ་མཛེས་མཱ་མ་ཀཱི།
།དཀར་པོ་ཆུ་ཡི་རྩ་
དང་ནི། །དུད་པ་ཡང་ནི་མེ་ཡི་གནས། །དུང་གི་རྩ་འདི་རླུང་གིའོ།
།དེ་བཞིན་དུ་ནི་པདྨ་དང་། །ཡེ་ཤེས་འབྱིན་པ་ཡི་ནི་རྩ།
།ལྔ་ཡི་བདག་ཉིད་ཁྱད་
པར་ནི། །གདན་བཞི་ཉན་པར་མི་ནུས་པ། །གཞུང་ཉུང་པ་ནི་བསྟན་པ་ཡིན།
།གཟུགས་བརྙན་གྱི་རབ་ཏུ་སྦྱོར་བའི་ལེའུ་ཞེས་བྱ་བ་བཞི་པ་རྫོགས་
སོ།། །།
རྡོ་རྗེའི་ཆུ་ནི་ཇི་ལྟར་ལགས། །བདུད་རྩིའི་ཆུ་ནི་ཇི་ལྟར་སྐྱེ།
།གང་གི་དབྱེ་བ་ཇི་ལྟར་མྱང་། །གང་གིས་ཇི་ལྟར་འཚལ་བར་བགྱི།
།འདི་ཡི་རབ་ཏུ་
དགོས་པའང་ཅི། །ངོ་མཚར་ལྷ་ལ་མཉན་པར་འཚལ། །ཉོན་ཅིག་རྒྱལ་པོ་རྡོ་རྗེ་འཆང་།
།གཉིས་དང་གཉིས་མེད་སྤངས་པ་ཡི། །གསང་ཞིང་གསང་
བ་རབ་སྦས་པའི། །འགྲོ་བའི་འབྲས་བུ་དེ་དེ་ཉིད།
།བསྐལ་པ་བྱེ་བ་སྟོང་ཕྲག་ཏུ། །སངས་རྒྱས་ཡེ་ཤེས་ཀྱིས་བསྐུལ་བ།
སངས་རྒྱས་ལམ་ནི་མཐོང་
བའོ། ཡེ་ཤེས་སྣང་བ་དེ་བདུན་ཉིད།
ཇི་ལྟར་མེ་ཡིས་མཉམ་པར་བསྲེགས་པའི་སྤྱོད་པ་དང་།
ཉི་མ་ཇི་ལྟར་མཉམ་པར་ལྟ་བར་སྟོན་པ་དང་། ཇི་
ལྟར་རླུང་ནི་མཉམ་པ་ཉིད་དུ་ལེན་པ་ལྟར།
རྣམ་རྟོག་རྨོངས་པའི་རྒྱ་མཚོ་བསྲིངས་པའི་རྣལ་འབྱོར་པས།
།པདྨའི་དབང་ཕྱུག་སྐུ་ནི་གསེར་གྱི་
མདོག །དྲི་ཆུའི་ངོ་བོ་ཤིན་ཏུ་སྣང་མཛད་དང་།
།རོ་ནི་རྡོ་རྗེ་དབང་ཕྱུག་རྡོ་རྗེ་ཕྱག །ལྷ་གསུམ་དག་གི་ཆོ་ག་ཤེས་པར་བྱ།
།ཧ་ཞེས་པ་ཡིས་ཁ་དོག་
འཕྲོག །ཧོ་ཞེས་པ་ཡིས་དྲི་མེད་ཅིང་། །དཔའ་བོ་ཧྲཱིཿཡིས་བཅོམ་པ་ཡི།
།དེ་དག་རིམ་བཞིན་ཤེས་པར་བྱ། །པདྨའི་གདན་ནི་རྟག་ཏུ་མཉམ་པ་ཉིད་
དུ་བསྒོམ། །མཐེ་བོ་རྡོ་རྗེ་སྲིན་ལག་གཉིས་སུ་ཀུན་ལྡན་པས།
།སྔགས་གསུམ་ཡི་གེ་གསུམ་གྱིས་ཆོག་བསྲུང་བར་བྱ།
།གང་ཞེས་རོ་འདི་མྱང་པ་བློ་
ལྡན་རྣལ་འབྱོར་མའོ། །རྡོ་རྗེ་ཆུ་ཡི་ཁྱད་པར་ནི།
།ཉོན་ཅིག་དཔལ་ལྡན་རྡོ་རྗེ་འཆང་། །འཛག་པ་ཡི་ནི་ལུས་ཀྱི་ཆུ།
།བདག་ཉིད་ལྔ་ཡིས་བྱིན་གྱིས་
བརླབས། །དྲོ་བའི་རང་བཞིན་མེ་རུ་མཐོང་། །ཞི་བ་ཆུ་རུ་རབ་ཏུ་བརྟག
།རླུང་དང་རླུང་ནི་དུ་པའོ། །ས་ནི་གཟུགས་སུ་སྣང་བའོ། །གང་ཞིག་དེ་ཉིད་
ཀྱིས་མྱངས་ན། །དྲི་མ་ཅན་ལུས་དྲི་མེད་འགྱུར།
།རིན་ཆེན་བཟང་དགའ་རྣལ་འབྱོར་པ། །སྦྱངས་པའི་རྡོ་རྗེ་འཇིགས་བྱེད་ཀྱི།
།གཙང་དང་མི་གཙང་
དེ་བཞིན་རྫས། །དང་པོ་རྣལ་འབྱོར་མཚན་ཉིད་དོ།
།ཉོན་མོངས་དེ་བཞིན་མུན་པ་དེ། །རྣམ་ཤེས་ལྷན་ཅིག་སྣང་བའོ།
།ཡེ་ཤེས་རྡོ་རྗེས་བཅོམ་ནས་
ནི། །རྣལ་འབྱོར་པ་ནི་དེ་ལ་སྣང་། །བདུད་རྩི་བསྟེན་འདོད་ལུས་ཅན་གྱིས།
།གཉིས་མེད་ཁ་སྦྱར་སྦྱར་བར་བྱ། །རྣལ་འབྱོར་ཆེན་པོའི་སྒྲུབ་པ་
པོ། །སྔོན་དུ་ཨཱ་ལི་ཀཱ་ལི་བསམ། །ཨཱ་ལི་ཞེས་བྱ་བུང་པར་གསུངས།
།ཀཱ་ལི་དེ་བཞིན་གཤེགས་མ་ཉིད། །སྦྱོར་བའི་ཡེ་ཤེས་སྒྲ་ཡིས་ནི། །གཉི་གས་
འཁྱུད་པར་བསམ་པར་བྱ། །ཇི་ལྟར་སྡེ་ཚན་གསུམ་པ་ཡི།
།ཡི་གེ་གསུམ་པ་གཟུང་བྱས་ཏེ། །རྡོ་རྗེ་ར་བ་ཙམ་ཞིག་གིས།
།འོད་དཔག་མེད་ནི་དཀྲི་
བར་བྱ། །ལྷ་མོ་གསུམ་པ་ཉིད་ཀྱིས་ནི། །དབྱུག་པ་ཙམ་ཞིག་རྡོ་རྗེ་འཛིན།
།དབུས་སུ་དམ་ཚིག་ཞགས་པ་ཡིས། །ཀུནྡ་མགོ་ལ་མཆོག་ཏུ་བརྩོན། །དེ་
ལྟར་སྔགས་ཟློས་རྣལ་འབྱོར་པ། །པདྨ་རྡོ་རྗེ་ཅན་གྱིས་བསྐྱོད།
།རང་བཞིན་གྱིས་ནི་སི་སྒྲ་དང་། །བདུད་རྩི་ཆུ་དང་འདྲེས་པ་ཡི།
།དེ་ཉིད་འདི་ཡིས་
མྱང་བྱས་བ། །རྣལ་འབྱོར་ཆོས་ལ་རབ་ཏུ་ཤིས།
།བདེན་པའི་ཆོས་ནི་མཆོག་ཏུ་བདེན། །རྣལ་འབྱོར་ཆོས་ནི་རབ་ཏུ་བསྟོད།
།དེ་ཉིད་དམན་པའི་
རྣམ་རྟོག་ཡིད། །སྦྱོར་པ་ཇི་ལྟར་འགྲུབ་པར་འགྱུར།
།བྱེ་བ་བརྒྱད་ཅུའི་རྣལ་འབྱོར་མ། །གདན་བཞི་པ་ཡི་རྒྱུད་འདི་ཉིད།
།མཁས་པ་ཡིས་ནི་རྣམ་
བལྟས་ལ། །སྦྱོར་བ་བརྒྱད་ཅུའི་རྣལ་འབྱོར་མ།
།སྦྱོར་བའི་ཆོས་ཀྱིས་གཏོར་མ་སྦྱིན།
།བདུད་རྩི་ལྔ་མདོར་བསྡུས་ལེའུ་ཞེས་བྱ་བ་ལྔ་པ་རྫོགས་སོ། །
འབྱུང་བའི་དབུགས་ཀྱི་ཐེ་ཚོམ་ནི། །རྫོགས་པའི་སངས་རྒྱས་མངོན་པར་འདྲི།
།འཆི་ལྟས་ཇི་ལྟར་འཚལ་བགྱི་ཞིང་། །གང་གིས་ཤེས་ནས་རབ་ཏུ་
སྦྱར། །བཅོམ་ལྡན་འདས་ཀྱིས་བཀའ་སྩལ་པ། །འགྲོ་བ་ལུས་ཅན་སེམས་ཅན་དོན།
།འཆི་བདག་ཀུན་ནས་བསླུ་བ་ནི། །ཉོན་ཅིག་རྒྱལ་པོ་རྡོ་རྗེ་
བདག །གང་ཞིག་རྣམ་པར་ཤེས་ཙམ་གྱིས། །འཆི་བདག་ལུས་ནི་གནས་པ་ཉིད།
།དང་པོར་སྔ་དྲོའི་དུས་ཉིད་ལ། །དབུགས་ནི་རྣམ་པར་དགོད་
བཤད་པ། །ལུས་ཅན་ཟླ་དྲུག་ནས་འཆི་བར། །ངས་གསུངས་པ་ལ་ཐེ་ཚོམ་མེད།
།གལ་ཏེ་དུས་ལ་བབ་གྱུར་ན། །དབུགས་ནི་ཆད་ཅིང་འཆད་པར་
འགྱུར། །དེ་བཞིན་འཇིགས་པ་ཆུང་མཐོང་ན། །འགྲམ་པའི་ཚིགས་ནི་ཡོ་བར་འགྱུར།
།ལུས་ཀྱི་མཚན་མ་ཤེས་བྱས་ལ། །རྣལ་འབྱོར་པ་ཡིས་ཞི་བར་
བྱ། །རྣ་བའི་ཨུ་ད་རྣམ་ཆད་ན། །ཆུ་ཚོད་ལྔ་ལས་མི་ཐུབ་བོ།
།མིག་གི་ཨཾ་བ་ར་ཡི་རྩ། །ཏྲོ་ཏ་དེ་བཞིན་ཉི་མ་ལྔ། །སྣ་ཡི་མ་སི་ག་ཆད་ན།
།ཉི་མ་བདུན་
གྱིས་གདོན་མི་ཟ། །སྟེང་འོག་སོ་ནི་འཐམས་གྱུར་ན།
།ཉི་མ་གསུམ་གྱིས་ཐེ་ཚོམ་མེད། །འདི་ཡི་ལྕེ་ལ་ཐིག་ནག་ན།
།ཞག་གཉིས་ཀྱིས་འཆི་ལུས་ཅན་
རྣམས། །མགྲིན་པའི་གློ་ཡི་ཕྱི་རོལ་རྩ། །ཟླ་ཕྱེད་ལས་ནི་མི་ཐུབ་བོ།
།བྲང་གི་ལྷེའུ་འོག་ཞོམ་གྱུར་ན། །ཟླ་ཕྱེད་སྨན་པས་གསོ་སྤྱད་ཡོད།
།སེན་མོ་ཁྲག་
ནི་མེད་པ་ན། །ཆུ་ཚོད་ལྔ་ལས་མི་ཐུབ་བོ། །ཕོ་ཉ་བརྒྱད་ཀྱི་འཆི་ལྟས་ནི།
།འཆི་བའི་རྨ་སོགས་རྣམ་པར་སྤངས༈ །རྣ་བའི་ཨུ་དའི་བདག་ཉིད་
ནི། །རྣལ་འབྱོར་དབྱེ་བས་བསྟེན་པར་བྱ། །མིག་གི་ཨཾ་བ་ར་ཆད་ན།
།མཁས་པས་དཀར་པོའི་ས་བོན་བཟླ། །སྣ་ཡི་མ་སི་ཀ་ལ་ནི། །དབུགས་བསྡམས་
མེ་ཡི་དུད་པའོ། །སོ་དང་སོ་འཐམས་རྩ་ལ་ནི། །དུང་གི་ས་བོན་བཟླས་པས་འཕྲོག
།ལྕེ་ཡི་ཐིག་ནག་འདི་ལ་ནི། །བདག་ཉིད་སྦྱོར་བས་མནན་པར་
བྱ། །མགྲིན་པ་གློ་ཡི་ཕྱི་རོལ་རྩ། །པདྨའི་ས་བོན་གྱིས་རྩེ་བྱ།
།བྲང་གི་ལྟེའུ་ཞོམ་པ་ལ། །སྒོང་སྐྱེས་ཡེ་ཤེས་བསྒོམ་པའོ།
།སེན་མོ་ཁྲག་ནི་མེད་པ་
ལ། །ལག་པ་བསྡུས་ལ་བཟླས་པར་བྱ། །བུག་པ་དགུ་ཡི་སྒོ་རུ་ནི།
།ས་བོན་དགུ་ཡིས་རྩེ་བར་བྱ། །རྩ་དགུ་ལ་ནི་ས་བོན་དགུ།
།སྒོ་དགུ་ས་བོན་དགུ་
ཡིས་བསྡམ། །དེ་ལྟར་བསྡམས་པ་ཙམ་གྱིས་ནི། །རྣམ་པར་ཤེས་པ་མི་འགྲོའོ།
།མ་བསྲེགས་སྣོང་ནི་གཉིས་གཟུང་སྟེ། །གུར་ཀུམ་དང་ནི་གིའུ་ཝང་
གིས། །བཅུ་གཉིས་ཚད་ནི་ཡང་དག་བྲི། །ས་བོན་དབྱངས་ཡིག་བསྐོར་བར་བྱ།
།ལྷ་མོ་བརྒྱད་ཀྱི་ས་བོན་འདི། །མཚམས་སུ་མ་ནིང་ས་བོན་
དང་། །དབུས་སུ་ཡེ་ཤེས་ས་བོན་ནི། །མཁས་པ་ཡིས་ནི་བསྐོར་བར་བྱ།
།དེ་བཞིན་མིང་ནི་དབུས་སུ་བྲི། །ཧཱུྃ་གི་དབུས་སུ་གནས་པ་ཉིད། །གཉི་ག་
དང་ཡང་སྦྱར་བྱས་ནས། །སྐུད་པ་དམར་པƌ