กก

༄༅། །འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་འགྲེལ་པ་རྒྱུད་དོན་རབ་ཏུ་གསལ་བར་བྱེད་པ་
ལེགས་བཤད་ནོར་བུའི་སྒྲོན་མ་ཞེས་བྱ་བ་བཞུགས་སོ། །
སྒ་རབ་འབྱམས་པ་ཀུན་དགའ་ཡེ་ཤེས་ཀྱིས་མཛད།

  བསྡོམས་ལྡེབ་ངོས་༡༡ཡོད།       ངོས་༡པོ།   ༢༽   ༣༽   ༤༽   ༥༽   ༦༽   ༧༽   ༨༽   ༩༽   ༡༠༽   ༡༡༽
    ༄༅། །སྭསྟི། འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་འགྲེལ་པ་རྒྱུད་དོན་རབ་ཏུ་གསལ་བར་བྱེད་པ་ལེགས་བཤད་ནོར་
བུའི་སྒྲོན་མ་ཞེས་བྱ་བ། བླ་མ་དམ་པ་རྣམས་དང་ལྷག་པའི་ལྷ་ལ་གུས་པས་ཕྱག་འཚལ་ལོ། །ཀུན་ཁྱབ་འགྱུར་མེད་སྤྲོས་ཀུན་ཉེར་ཞིའི་དབྱིངས་
དང་རོ་གཅིག་ཆགས་ཐོགས་ལས་གྲོལ་གཉིས་མེད་ཡེ་ཤེས་མཆོག །ཚོགས་གཉིས་རྒྱ་མཚོའི་རྣམ་འཕྲུལ་གྱིས་སྤྲུལ་མཚན་དཔེའི་དཔལ་འབར་
རྣམ་པ་སྣ་ཚོགས་སྒྱུ་འཕྲུལ་དྲྭ་བ་ཅན། །ཡིད་བཞིན་ནོར་དང་དཔག་བསམ་ཤིང་ལྟར་མཐའ་ཡས་འགྲོ་བའི་མོས་པ་ཇི་བཞིན་དོན་རྣམས་རྫོགས་
མཛད་པ། །རྡོ་རྗེ་གསུམ་མཆོག་དབྱེར་མེད་དཔལ་ལྡན་བླ་མ་ཁྱབ་བདག་རྡོ་རྗེ་སེམས་དཔའི་ཞབས་ལ་ཕྱག་འཚལ་ལོ། །རང་བཞིན་འོད་གསལ་
སྟོང་ཉིད་ནམ་མཁའི་ཁམས། །སྣ་ཚོགས་སྒྱུ་མའི་དཀྱིལ་འཁོར་འཁོར་ལོ་ཆེ། །གཉིས་མེད་ཟུང་འཇུག་བདེ་བ་ཆེན་པོའི་དངོས། །བླ་མ་འཇམ་པའི་
རྡོ་རྗེ་ལ་ཕྱག་འཚལ། །རྒྱལ་བ་ཀུན་གྱི་ཡེ་ཤེས་ཆེན་པོའི་སྐུ། །འགྲོ་བ་ཀུན་གྱི་བླ་ན་མེད་པའི་སྐྱབས། །སྲིད་ཞི་ཀུན་གྱི་རེ་བ་རྫོགས་པའི་དཔལ། །
འཇམ་དབྱངས་བླ་མས་བདག་རྒྱུད་བྱིན་གྱིས་རློབས། །གྲངས་མེད་རྒྱལ་བའི་མཚན་རྣམས་བརྗོད་པ་ལས། །འཇམ་པའི་དབྱངས་ཀྱི་མཚན་ཙམ་
དྲན་པ་ཡི། །བསོད་ནམས་ཁྱད་པར་འཕགས་ཞེས་ལུང་ལས་འབྱུང་། །དེ་ཕྱིར་དེ་མཚན་རྣམ་པར་དབྱེ་བར་བྱ། །བློ་མཆོག་རྣམས་ཀྱི་བློ་གྲོས་ཆུ་
གཏེར་ལས། །ལེགས་པར་འོངས་པའི་ལེགས་བཤད་ནོར་བུའི་ཚོགས། །བློ་གསལ་རྣམས་ཀྱི་བློ་གྲོས་གཙུག་རྒྱན་ཕྱིར། །ལེགས་བཤད་དོན་དུ་གཉེར་
རྣམས་ལེགས་པར་ཉོན། །འཆད་ཚུལ་མི་འདྲའི་རྣམ་དབྱེ་དཔག་མེད་ཀྱང་། །ཧ་ཅང་རྒྱས་དང་བསྡུས་པའི་སྐྱོན་བྲལ་ཞིང་། །ཚིག་དོན་རྣམ་པར་
བཀྲ་བའི་ལེགས་བཤད་འདི། །རྒྱུད་དོན་རབ་གསལ་ནོར་བུའི་སྒྲོན་མའོ། །གང་འདིའང་སྡེ་སྣོད་མང་དུ་ཐོས་པ་དང་། །རྒྱ་བོད་མཁས་པའི་རྣམ་
བཤད་མང་མཐོང་ནས། །རང་ཉིད་དྲན་པ་ཉམས་པས་འཇིགས་ཕྱིར་དང་། །གུས་ལྡན་སློབ་མའི་ཚོགས་ལའང་ཕན་ཕྱིར་རོ། །
  ༈ གང་ཞིག་དད་བརྩོན་བློ་གྲོས་དང་ལྡན་པ་རྣམས་ཀྱིས་མཚན་ཡང་དག་པར་བརྗོད་པའི་རྒྱུད་གཞུང་ཡིད་བཞིན་གྱི་ནོར་བུ་རིན་པོ་ཆེ་འདི་ལ།
ཐོས་བསམ་སྒོམ་གསུམ་གྱི་སྒོ་ནས་ནན་ཏན་ཆེན་པོས་འཇུག་པར་རིགས་ཏེ། འདི་ནི་གསུང་རབ་རྒྱ་མཚོ་ཐམས་ཅད་ཀྱི་སྙིང་པོ་ལས་ཀྱང་སྙིང་པོ།
ཟབ་པ་ལས་ཀྱང་ཆེས་ཟབ། ཟབ་དོན་མཚུངས་པ་མེད་པའི་རྒྱུད་མཆོག་མཐར་ཐུག་པ་ཡིན་པའི་ཕྱིར་ཏེ། འདི་ལྟར་ཡང་དག་པར་རྫོགས་པའི་
སངས་རྒྱས་ཀྱིས་གདུལ་བྱའི་དབང་པོའི་རིམ་པ་ལྟར། འདུལ་བྱེད་ཀྱི་ཐེག་པའི་རིམ་པ་སྣ་ཚོགས་ཤིག་གསུངས་པ་རྣམས་ཀྱང་མདོར་བསྡུ་ན་རྒྱུ་
མཚན་ཉིད་ཀྱི་ཐེག་པ་དང་། འབྲས་བུ་སྔགས་ཀྱི་ཐེག་པ་གཉིས་སུ་འདུས་པ་ལས། ཁྱད་ཆོས་དུ་མས་ཁྱད་པར་དུ་འཕགས་པ་ནི་སྔགས་ཀྱི་ཐེག་པ་
ཡིན་ལ། དེ་ཡང་རྒྱུད་སྡེའི་དབྱེ་སྒོ་དུ་མར་གནས་པ་རྣམས་ཀྱི་ནང་ནས། ཟབ་པ་དང་རྒྱ་ཆེ་བའི་དོན་མཐའ་དག་གསལ་ཞིང་ཡོངས་སུ་རྫོགས་པར་
སྟོན་པ་འདི་ཉིད་མཆོག་ཏུ་གྲུབ་པའི་ཕྱིར་དང་། འདི་ནི་རྒྱུད་སྡེ་མཐའ་དག་ལ་ཁྱབ་བྱེད་དུ་འཇུག་ཅིང་དབང་བསྒྱུར་བའི་ཚུལ་གྱིས། རྒྱུད་ཐམས་
ཅད་ཀྱི་བདག་པོའམ་རྒྱལ་པོར་གྱུར་པའི་ཕྱིར་རོ། །དེ་སྐད་དུ་ཡང་། འཇམ་དཔལ་ཡེ་ཤེས་སེམས་དཔའ་ཡི། །མིང་ནི་ཡང་དག་བརྗོད་པའི་མཆོག།
དོན་ཟབ་དོན་ནི་རྒྱ་ཆེ་ཞིང་། །དོན་ཆེན་མཚུངས་མེད་རབ་ཞི་བ། །ཞེས་སོགས་དང་། ཡེ་ཤེས་ལུས་ཅན་འཇམ་དཔལ་གྱི། །མིང་བརྗོད་པས་ནི་
དོན་ཆེ་བ། །དག་པར་བྱེད་ཅིང་སྡིག་སེལ་བ། །ཞེས་དང་། རྒྱུད་ཀུན་གྱི་ནི་བདག་པོ་མཆོག །ཅེས་སོགས་དང་། གཞན་ཡང་ཕན་ཡོན་གྱི་ལེའུར་
རྒྱས་པར་གསུངས་པ་ལྟར་རོ། །དེའི་ཕྱིར་གང་གིས་འཕགས་པ་འཇམ་དཔལ་གཞོན་ནུར་གྱུར་པ་ཞེས་མཚན་ཙམ་བཟུང་བ་ལ་ཡང་། བསམ་གྱིས་
མི་ཁྱབ་པའི་བསོད་ནམས་འབྱུང་བར་ཤེས་པར་བྱ་སྟེ། འགྲེལ་ཆེན་ལས། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་གངྒཱའི་ཀླུང་གི་
བྱེ་མ་སྙེད་ཀྱི་དེ་བཞིན་གཤེགས་པ་རྣམས་ཀྱི་མཚན་མཆོག་ཏུ་དད་པས་བསྐལ་པའམ་བསྐལ་པ་ལས་ལྷག་པར་བརྗོད་ན་བསོད་ནམས་ཀྱི་ཕུང་པོ་
ཅི་ཙམ་རབ་ཏུ་སྐྱེ་བར་འགྱུར་ཞེ་ན། དེ་ལ་ནི་གྲངས་མེད་ཅིང་ཚད་མེད་པ་རབ་ཏུ་སྐྱེ་བར་འགྱུར་རོ། །ཡང་རིགས་ཀྱི་བུའམ། རིགས་ཀྱི་བུ་མོ་གང་
ལ་ལ་ཞིག་གིས། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ཞེས་མཚན་བཟུང་ན་སྔ་མ་ལས་འདི་ཉིད་བསོད་ནམས་ཀྱི་ཕུང་པོ་ཤིན་ཏུ་
མང་པོ་རབ་ཏུ་སྐྱེ་བར་འགྱུར་བའི་ཕྱིར་རོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་མཐའ་ཡས་པའི་དགེ་བའི་བཤེས་གཉེན་དུ་གྱུར་པའི་ཕྱིར་
རོ། །ཞེས་སོགས་དང་། གཞན་ཡང་། མདོ་རྒྱུད་རྣམས་སུ་འདི་ལྟ་བུ་མཐའ་ཡས་པ་གསུངས་པའི་ཕྱིར་རོ། །འོ་ན་གཞུང་འདིའི་དོན་རྣམས་གང་ལ་
བརྟེན་ནས་ཇི་ལྟར་རྟོགས་པར་བྱ་སྙམ་ན། སྤྱིར་རྒྱུད་འདི་ལ་འགྲེལ་ཚུལ་མི་འདྲ་བ་ཤིན་ཏུ་མང་ན་ཡང་། གངས་རིའི་ཁྲོད་འདིར་གྲགས་ཆེ་བ་ནི།
དུས་འཁོར་དང་མཐུན་པར་འཆད་པ་ལ། འགྲེལ་ཆེན་དྲི་མེད་འོད་དུ། ཞར་བྱུང་གི་ཚུལ་གྱིས་ཚིག་དོན་ཕལ་ཆེར་བཀྲལ་བ་དང་། འདིའི་སྒོས་
འགྲེལ་མི་ཡི་དབང་པོ་གྲགས་པས་མཛད་ཅེས་པ་དང་། པདྨ་དཀར་པོས་མཛད་ཅེས་པ་དང་། ཟླ་བཟང་གྲགས་པས་མཛད་ཅེས་པ་དང་། ཉི་མ་
དཔལ་ཡེ་ཤེས་ཀྱིས་མཛད་པའི་བདུད་རྩི་ཐིགས་པ་དང་། ཨ་ནུ་པ་མ་རཀྵི་ཏས་མཛད་པ་སྒྲོན་མ་གསལ་བ་དང་། ཕན་ཡོན་གྱིས་འགྲེལ་པ་དུས་
ཞབས་པས་མཛད་ཅེས་པ་དང་། གཙོ་བོར་རྣལ་འབྱོར་རྒྱུད་ལྟར་འཆད་པ་ལ། སློབ་དཔོན་ཆེན་པོ་འཇམ་དཔལ་གྲགས་པས་མཛད་པའི་འགྲེལ་
ཆེན་དང་། སློབ་དཔོན་སྒེག་པའི་རྡོ་རྗེས་མཛད་པའི་སྔགས་དོན་རྣམ་གཟིགས་དང་། སློབ་དཔོན་འཇམ་དཔལ་བཤེས་གཉེན་གྱིས་མཛད་དོ་ཞེས་
པའི་འགྲེལ་ཆུང་དང་། གཞན་ཡང་སྨྲྀ་ཏི་ཛྙཱ་ན་ཀིརྟིས་མཛད་པར་བྱས་པའི་བཤད་འབུམ་ཞེས་པ་དང་། ཀུ་མ་ར་ཀིརྟིས་མཛད་པར་བྱས་པའི་མན་
ངག་གི་འགྲེལ་པ་ཞེས་པ་དང་། བི་མ་ལ་མི་ཏྲས་མཛད་པར་བྱས་པའི་མཚན་དོན་གསལ་བར་བྱེད་པའི་སྒྲོན་མེ་ཞེས་སོགས་ཡང་དག་དང་ལྟར་
སྣང་མང་དུ་སྣང་བ་ལས། འདིར་ནི་གཙོ་བོར་འགྲེལ་ཆེན་དང་། སྔགས་དོན་རྣམ་གཟིགས་གཉིས་ཀྱི་རྗེས་སུ་འབྲངས་ཏེ། ཞར་བྱུང་དང་། དོན་
ཐོབ་དང་། བཤད་ལམ་སོགས་ཀྱི་སྤྲོས་པ་ཧ་ཅང་རྒྱས་པ་རྣམས་བཏང་སྙོམས་སུ་བཞག་ནས། དངོས་བསྟན་གྱི་ཚིག་དོན་ཙམ་ཤིན་ཏུ་གསལ་བའི་
ངག་གིས་བཤད་པར་བྱ་བ་ལ་གསུམ། མཚན་གྱི་དོན། གཞུང་གི་དོན། མཇུག་གི་དོན་ནོ། །
    དང་པོ་ལ་གཉིས། དངོས་དོན་དང་ཞར་བྱུང་ངོ་། །
    དང་པོ་ལ་གསུམ། དགོས་དོན། བསྡུས་དོན། ཚིག་དོན་ནོ། །
    དང་པོ་ལ། སྤྱིར་མིང་ཙམ་བཏགས་པ་ལ་དགོས་པ་ཡོད་དེ། མིང་གི་ཐ་སྙད་ལ་བརྟེན་ནས་དོན་གྱི་བླང་དོར་ལ་འཇུག་པས་འཇིག་རྟེན་གྱི་
རྨོངས་པ་སེལ་བའི་ཕྱིར་ཏེ། མདོ་ལས། མིང་དུ་གདགས་པར་མ་མཛད་ན། །འཇིག་རྟེན་ཐམས་ཅད་རྨོངས་པར་འགྱུར། །དེ་བས་རྨོངས་པ་
བསལ་བའི་ཕྱིར། །མགོན་པོས་མིང་དུ་གདགས་པར་མཛད། །ཅེས་པ་ལྟར་རོ། །བྱེ་བྲག་ཏུ་རྒྱུད་འདིའི་མཚན་ཀླད་དུ་སྨོས་པ་ལ་དགོས་པ་ཡོད་དེ།
དེ་ལ་བརྟེན་ནས་གང་ཟག་དབང་རྣོན་གྱིས་རྒྱུད་དོན་ཁོང་དུ་ཆུད་ཅིང་། དབང་འབྲིང་གིས་བརྗོད་བྱ་ངོས་ཟིན་ལ། དབང་རྟུལ་གྱིས་ཀྱང་མིང་
དོན་གྱི་འབྲེལ་བར་ཤེས་པར་འགྱུར་བའི་ཕྱིར་རོ། །
    གཉིས་པ་བསྡུས་དོན་ལ། གང་ལ་གདགས་པའི་ཡུལ་ནི། རྒྱུད་འདིའི་གཞུང་ངག་ཚིག་གི་ཕྲེང་བའི་ཚོགས་འདི་ཉིད་དོ། །གང་གདགས་པའི་
མཚན་ནི། འཕགས་པ་ཞེས་སོགས་སོ། །ཇི་ལྟར་གདགས་པའི་ཚུལ་ལ་འདོད་རྒྱལ་གྱི་མིང་དང་། རྗེས་སྒྲུབ་ཅན་གྱི་མིང་གཉིས་ལས། འདིར་ནི་ཕྱི་
མ་སྟེ། དོན་འདི་ལ་མིང་འདི་འདོགས་པའི་རྒྱུ་མཚན་བཤད་དུ་ཡོད་པའི་ཕྱིར་རོ། །དེ་ཡང་གཞུང་ཚད་སོགས་ཀྱི་སྒོ་ནས་འདོགས་ཚུལ་མང་དུ་
ཡོད་པ་ལས་འདི་ནི་བརྗོད་བྱ་དང་བྱེད་ལས་ཀྱི་སྒོ་ནས་གདགས་པ་སྟེ། འཕགས་པ་འཇམ་དཔལ་གྱི་མཚན་ནི་གཞུང་འདིའི་བརྗོད་བྱ་དང་ཡང་
དག་པར་བརྗོད་པ་ནི་འདིའི་བྱེད་ལས་ཡིན་པའི་ཕྱིར་རོ། །
    གསུམ་པ་ཚིག་དོན་ལ་མཚན་བསྒྱུར་བ་དང་། བཤད་པ་གཉིས་ལས།
    དང་པོ་ནི། རྒྱ་གར་ན་སྐད་རིགས་བཞི་ཡོད་པ་ལས། ལེགས་པར་སྦྱར་བ་ལྷའི་སྐད་དུ། གཞུང་འདིའི་མིང་། ཨཱརྱ་མཉྫུ་ཤྲཱི་ནཱ་མ་སཾ་གི་ཏི། ཞེས་
པ་དེ། བོད་སྐད་དུ་བསྒྱུར་ན། ཨཱརྱ་ནི་འཕགས་པ། མཉྫུ་ཤྲཱི་ནི་འཇམ་དཔལ། ནཱ་མ་ནི་མཚན། སཾ་གི་ཏི་ནི་ཡང་དག་པར་བརྗོད་པ། ཞེས་པ་སྟེ།
སྒྲ་ཐད་འགྱུར་རོ། །
    གཉིས་པ་ནི། འཕགས་པ་ཞེས་པ་ངོ་བོའི་སྒོ་ནས། སངས་རྒྱས་འཕགས་པ་སྟེ། སངས་རྒྱས་ཀུན་གྱི་ཡེ་ཤེས་སྐུ། །གཅིག་ཏུ་བསྡུས་པ་འཇམ་པའི་
དབྱངས། །ཞེས་པ་ལྟར་རོ། །རྣམ་པ་སྟོན་ཚུལ་ལྟར་ན། བྱང་སེམས་འཕགས་པ་སྟེ། གཙོ་བོར་རྒྱལ་སྲས་ས་བཅུ་པའི་ཚུལ་འཛིན་པའི་ཕྱིར་རོ། །
    དེ་ཉིད་སྤྲོས་པའི་གྲྭ་ཟུར་ཞི་བས་འཇམ་པ་དང་། སྲིད་ཞིའི་དགེ་ལེགས་འབྱུང་ཞིང་། གཉིས་མེད་ཡེ་ཤེས་ཀྱི་ངོ་བོར་གྱུར་པས་དཔལ་ཞེས་པ་
སྟེ། ཤྲཱི་ནི་གཉིས་མེད་ཡེ་ཤེས་ཏེ། ཞེས་པ་ལྟར་རོ། །གྱི་ཞེས་པ་འབྲེལ་བའི་སྒྲའོ། །དེའི་མཚན་གྱི་དོན་ཟབ་པ་དང་རྒྱ་ཆེ་བའི་ཚུལ་རྣམས་ཡང་དག་
པ་སྟེ། ཕྱིན་ཅི་མ་ལོག་པར་བརྗོད་པ་ནི། གསལ་བར་སྟོན་ཅིང་བཤད་པའོ། །རྒྱས་པར་ན། རྒྱུ་ལམ་འབྲས་བུའི་འཇམ་དཔལ་རྣམས་སུ་དབྱེ་བ་
ཡང་ཤེས་པར་བྱ་སྟེ། འཕགས་པ་རིན་པོ་ཆེས། སེམས་ཀྱི་རང་བཞིན་སྤྲོས་པ་ཡི། །གྲྭ་ཟུར་ཞི་བས་འཇམ་པ་ཉིད། །རྟེན་འབྱུང་སྲིད་ཞིའི་དཔལ་
གྱི་གཞི། །འདི་འདྲ་རྒྱུ་ཡི་འཇམ་དཔལ་ལགས། །སྟོང་ཉིད་རྟོགས་པས་ལྟ་བ་ཡི། །མཚན་མ་ཞི་བས་འཇམ་པ་ཉིད། །སྙིང་རྗེ་སྐྱེ་འགྲོའི་དཔལ་གྱུར་
པ། །འདི་འདྲ་ལམ་གྱི་འཇམ་དཔལ་ལགས། །སྐུ་གསུམ་མི་ཕྱེད་མཉམ་སྦྱོར་ཞིང་། །སྐུ་གསུང་ཐུགས་ཀྱི་རྡོ་རྗེ་ཅན། །ཡོན་ཏན་ཕྲིན་ལས་མཐར་ཕྱིན་
པ། །འདི་འདྲ་འབྲས་བུའི་འཇམ་དཔལ་ལགས། །ཆོས་དབྱིངས་རང་བཞིན་འཇམ་པའི་ངང་། །གཟུགས་ཀྱི་སྐུ་གཉིས་གདུལ་བྱའི་དཔལ། །སྐུ་གསུམ་
ལྷུན་གྱིས་གྲུབ་པ་པོ། །འཇམ་པའི་དཔལ་ལ་ཕྱག་འཚལ་བསྟོད། །ཅེས་སོགས་གསུངས་པ་ལྟར་རོ། །དེ་བཞིན་དུ་འཕགས་མཆོག་ཀླུ་སྒྲུབ་ཀྱིས་ཀྱང་། དཔལ་གྱི་འབྱུང་གནས་འཇམ་དཔལ་ཀུན་གྱི་དཔལ། །མཐའ་དག་བྱམས་པས་ཁྱབ་པས་འཇམ་པའི་ངང་། །འཇམ་དང་དཔལ་དུ་གྲགས་པ་ཐུགས་
རྗེའི་མགོན། །འཇམ་དཔལ་ཀུན་གྱི་མགོན་ལ་ཕྱག་འཚལ་ཏེ། །ཞེས་སོ། །དེར་མ་ཟད་དེ་དག་རྗོད་བྱེད་ཀྱི་གཞུང་དང་ལམ་ལ་ཡང་འཇམ་དཔལ་
ཞེས་བྱ་སྟེ། སློབ་དཔོན་ཕྱོགས་ཀྱི་གླང་པོས། ཤེས་རབ་ཕ་རོལ་ཕྱིན་གཉིས་མེད། །ཡེ་ཤེས་དེ་ནི་དེ་བཞིན་གཤེགས། །བསྒྲུབ་བྱ་དོན་དེ་དང་ལྡན་
པ། །གཞུང་ལམ་དག་ལ་དེ་སྒྲ་ཡིན། །ཞེས་གསུངས་པས་འདིར་ཡང་། འཕགས་པ་འཇམ་དཔལ་དེ་གཉིས་མེད། །ཅེས་སོགས་སྦྱར་བར་རིགས་པའི་
ཕྱིར་རོ། །མཚན་ཡང་དག་པར་བརྗོད་པའི་ཚུལ་ཡང་། སྐུ་གསུམ་ལ་སོགས་པའི་སྒོ་ནས་མཚན་བསྟན་པ་སྟེ། ཆོས་ཀྱི་སྐུའི་སྒོ་ནས་བསྟན་པ་ནི། དང་པོའི་སངས་རྒྱས་རྒྱུ་མེད་པ། །ཞེས་སོགས་དང་། ལོངས་སྐུའི་སྒོ་ནས་བསྟན་པ། ཤེས་རབ་རལ་གྲི་མདའ་གཞུ་ཐོགས། །ཞེས་སོགས་དང་། སྤྲུལ་
སྐུའི་སྒོ་ནས་བསྟན་པ། རྡོ་རྗེ་འཇིགས་བྱེད་འཇིགས་པར་བྱེད། །ཅེས་སོགས་སོ། །ཞེས་རྗེ་བཙུན་ས་སྐྱ་པ་ཆེན་པོས་གསུངས་སོ། །
    གཉིས་པ་ཞར་བྱུང་འགྱུར་གྱི་ཕྱག་ལའང་གསུམ་ལས།
    དང་པོ་དགོས་པའི་དོན་ནི། འགྱུར་བྱེད་པའི་ཐོག་མར་འདོད་ལྷ་ལ་ཕྱག་འཚལ་བ་ལ་དགོས་པ་ཡོད་དེ། ཡུལ་དམ་པ་ལ་ཕྱག་འཚལ་བས་
བསོད་ནམས་སོགས་ཅིང་བསོད་ནམས་དང་ལྡན་པ་ལ་བར་ཆད་མི་འབྱུང་བར། འགྱུར་ལ་སོགས་པའི་བསམ་དོན་འགྲུབ་པར་འགྱུར་བའི་ཕྱིར་
ཏེ། ཆེད་དུ་བརྗོད་པའི་ཚོམ་ལས། བསོད་ནམས་ལྡན་པའི་མི་དག་ལ། །ལྷའམ་བདུད་ཀྱི་རིས་དག་གམ། །གཞན་ལས་བྱུང་བའི་གནོད་པ་ཡིས། །
བར་ཆད་བྱ་བར་ཡོངས་མི་ནུས། །ཞེས་དང་། རྒྱ་ཆེ་རོལ་པ་ལས། བསོད་ནམས་ལྡན་པའི་མི་ཡི་བསམ་པ་རྣམས་ཀྱང་འགྲུབ། །ཅེས་སོགས་གསུངས་
པའི་ཕྱིར་རོ། །
    གཉིས་པ་བསྡུས་པའི་དོན་ནི། གང་ལ། གང་གིས། ཇི་ལྟར་ཕྱག་འཚལ་བའོ། །
    གསུམ་པ་ཚིག་དོན་ལ། འཇམ་དཔལ་ཞེས་པའི་དོན་བཤད་ཟིན་ཅིང་། ཤས་ཆེར་ལོ་བརྒྱད་དམ། བརྒྱད་གཉིས་ལོན་པའི་ན་ཚོད་ཅན་དུ་སྟོན་
པས་གཞོན་ནུར་གྱུར་པ་སྟེ། རྒ་ཤིའི་འཇིགས་པ་སྤངས་ཤིང་རྟག་ཏུ་ཚངས་སྤྱོད་ལ་གནས་ནས་གཞན་དོན་ལ་རྩེ་ཞིང་རོལ་པའི་ཕྱིར་རོ། །འདི་
དག་ལ་དགོངས་ནས་རྒྱུད་ལས། གཞོན་ནུའི་སྐུ་ལུས་འཆང་བ་པོ། །ཞེས་སོགས་དང་། རྗེ་བཙུན་རིན་པོ་ཆེས། ལང་ཚོ་རྒྱས་ཤིང་བརྒྱད་གཉིས་ལོན་
པའི་ཚུལ་འཆང་བ། །ཞེས་དང་། འཕགས་པ་རིན་པོ་ཆེས། རྒ་དང་འཆི་བས་འཇིགས་བྲལ་དང་། །ཚངས་སྤྱོད་ཆོས་ཀུན་གནས་མེད་དང་། །གཞན་
གྱི་དོན་ལ་རྩེ་དགའི་ཕྱིར། །གཞོན་ནུར་གྱུར་པ་ཁྱོད་ཕྱག་འཚལ། །ཞེས་གསུངས་སོ། །དེ་བཞིན་དུ་སློབ་དཔོན་ཆེན་པོ་འཇམ་དཔལ་གྲགས་པས། ཡབ་ལ་རང་གི་རྣམ་ཐར་གསུངས་པ་ན། སྐྱེ་མེད་ཆོས་ཀྱི་སྐུ་ལ་བགྲེས་མི་མངའ། །ལུས་ངག་ཡིད་གསུམ་སྐྱོན་བྲལ་འཇམ་པ་སྟེ། །བདག་གཞན་དོན་
འཛིན་ཁྱད་པར་དཔལ་དུ་གྱུར། །དེ་ཡི་རྟགས་སུ་གཞོན་ནུ་ལོ་བརྒྱད་ལོན། །ཞེས་གསུངས་པར་གྲགས་པ་ཡང་དོན་འདི་དག་ཉིད་དོ། །ཡུལ་དེ་ལ་
ལོ་ཙྪ་བ་སོགས་ཀྱིས་ཕྱག་འཚལ་ལོ། །ཞེས་གུས་པས་འདུད་པའོ། །
    གཉིས་པ་གཞུང་གི་དོན་ལ་ཡང་། དགོས་དོན། བསྡུས་དོན། ཚིག་དོན་གསུམ་སྟེ། རྣམ་བཤད་རིགས་པ་ལས། མདོ་དོན་ཆེ་བ་ཉིད་ཐོས་ནས། །
ཉན་པ་དང་ནི་འཛིན་པ་ལ། །ཉན་པ་པོ་དེ་གུས་བྱེད་པས། །ཐོག་མར་དགོས་པ་བརྗོད་པར་བྱ། །དེ་འགྲུབ་དེ་ནི་བསྡུས་དོན་ལས། །བསྡུས་པའི་དོན་
ནི་ཚིག་དོན་ལས། །ཞེས་པ་ལྟར་རོ། །
    དེའི་དང་པོ་ནི། དོན་གྱིས་ཐོབ་པ་དགོས་འབྲེལ་གྱི་ངག་དགོད་པ་སྟེ། དེ་ལྟར་ཀླད་དོན་སྔོན་དུ་འགྲོ་བའི་གཞུང་འདིའི་བརྗོད་པར་བྱ་བ་དང་།
དགོས་པ་དང་། དགོས་པའི་དགོས་པ་དང་། འབྲེལ་བ་རྣམས་གང་ཞེ་ན། མཚན་གྱི་དོན་ཟབ་པ་དང་རྒྱ་ཆེ་བ་རྣམས་ནི་བརྗོད་བྱ། དེ་དག་གདུལ་
བྱ་རྣམས་ཀྱིས་ཚུལ་བཞིན་དུ་རྟོགས་པ་ནི་དགོས་པ། མཐར་ཐུག་གི་འབྲས་བུ་མངོན་དུ་གྱུར་པ་ནི་ཉིང་དགོས། ཕྱི་མ་ཕྱི་མ་རྣམས་སྔ་མི་སྔ་མ་ལ་
རག་ལས་པ་ནི་འབྲེལ་བའོ། །ཅིའི་ཕྱིར་བཞི་པོ་དེར་གྲངས་ངེས་ཞེ་ན། བྱ་རོག་གི་སོ་རྟོག་པ་ལྟར་བརྗོད་བྱ་མེད་དམ་སྙམ་པ་དང་། ཀླ་ཀློའི་བསྟན་
བཅོས་ལྟར་དགོས་པ་མེད་དམ་སྙམ་པ་དང་། འཇོག་པོའི་གཙུག་གི་ནོར་བུ་ལེན་པའི་ཐབས་ལྟར་ཉིང་དགོས་མེད་དམ་སྙམ་པ་དང་། མཐོ་རིས་ཀྱི་
ཐབས་སུ་ཕྱུགས་ཀྱི་མཆོད་སྦྱིན་ལྟར་འབྲེལ་བ་མེད་དམ་སྙམ་པའི་ལོག་རྟོག་བཞི་བསལ་ནས། གཞུང་ལ་ཐོས་སོགས་ཀྱིས་འཇུག་པར་འགྱུར་བའི་
ཕྱིར་རོ། །
    གཉིས་པ་བསྡུས་དོན་ནི། འཆད་པ་པོས་བཤད་སླ་ཞིང་། ཉན་པ་པོས་བཟུང་བདེ་བའི་ཕྱིར། དོན་ཚན་རྣམས་ཀྱི་གྲངས་དང་གོ་རིམ་རྣམས་
མདོར་བསྡུས་པའི་ཚུལ་གྱིས་སྟོན་པ་སྟེ། དེ་ཡང་འགྲེལ་ཆེན་དུ་གསལ་བར་མ་བཤད་ཅིང་། སྔགས་དོན་རྣམ་གཟིགས་ལས་གསུངས་པའི་ཚུལ་ནི་
དེ་ཉིད་ལས། ད་ནི་མཚན་ཡང་དག་པར་བརྗོད་པ་དེའི་ལུས་རྣམ་པར་བཞག་པ་མངོན་པར་བཤད་པ་འདི་ལྟ་སྟེ། ཞུས་པ་དང་། སླར་གསུངས་པ་
དང་། རིགས་དྲུག་ལ་གཟིགས་པ་དང་། སྒྱུ་འཕྲུལ་དྲྭ་བའི་མངོན་པར་རྫོགས་པར་བྱང་ཆུབ་པའི་རིམ་པ་དང་། དཔལ་རྡོ་རྗེ་སེམས་དཔའི་སྒོ་ནས་
བྱང་ཆུབ་ཀྱི་སེམས་དང་། རྣམ་པར་སྣང་མཛད་ཆེན་པོའི་རང་བཞིན་གྱིས་ཤིན་ཏུ་རྣམ་པར་དག་པ་ཆོས་ཀྱི་དབྱིངས་ཀྱི་ཡེ་ཤེས་དང་། མི་བསྐྱོད་
པའི་སྒོ་ནས་མེ་ལོང་ལྟ་བུའི་ཡེ་ཤེས་དང་། སྣང་བ་མཐའ་ཡས་ཀྱི་སྒོ་ནས་སོ་སོར་ཀུན་ཏུ་རྟོག་པའི་ཡེ་ཤེས་དང་། རིན་ཆེན་འབྱུང་ལྡན་གྱི་སྒོ་ནས་
མཉམ་པ་ཉིད་ཀྱི་ཡེ་ཤེས་དང་། དོན་ཡོད་གྲུབ་པའི་སྒོ་ནས་བྱ་བ་ནན་ཏན་གྱི་ཡེ་ཤེས་དང་། རིགས་ལྔའི་སྒོ་ནས་ཡེ་ཤེས་ལྔ་ལ་བསྟོད་པ་དང་།
ཡོན་ཏན་དང་། སྔགས་བསྟན་པ་དང་། བསྡུས་པ་རྣམས་ནི་ལུས་ཀྱི་དོན་བཅུ་བཞིའོ། །དེ་ལ། དེ་ནས་དཔལ་ལྡན་རྡོ་རྗེ་འཆང་། །ཞེས་པ་དང་
པོར་བརྩམས་ཏེ། ལུས་བཏུད་ནས་ནི་སྤྱན་སྔར་འདུག །ཅེས་པའི་བར་གྱི་ཚིགས་སུ་བཅད་པ་བཅུ་དྲུག་གིས་ནི་ཞུས་པའོ། །དེ་ནས་བཅོམ་ལྡན་
ཤཱཀྱ་ཐུབ། །ཅེས་པ་དང་པོར་བརྩམས་ཏེ། བཅོམ་ལྡན་དེ་ནི་ལེགས་ཞེས་གསོལ། །ཞེས་བྱ་བའི་བར་གྱི་ཚིགས་བཅད་དྲུག་གིས་ནི་སླར་གསུངས་
པའོ། །དེ་ནས་བཅོམ་ལྡན་ཤཱཀྱ་ཐུབ། །གསང་སྔགས་རིགས་ཆེན་ཐམས་ཅད་དང་། །ཞེས་པ་དང་པོར་བརྩམས་ཏེ། རིགས་ཆེན་གཙུག་ཏོར་ཆེར་
གཟིགས་ནས། །ཞེས་བྱ་བའི་བར་གྱི་ཚིགས་བཅད་གཉིས་ཀྱིས་ནི་རིགས་དྲུག་ལ་གཟིགས་པའོ། །ཚིག་གི་བདག་པོས་ཚིགས་སུ་བཅད། །ཅེས་བྱ་
བ་དང་པོར་བརྩམས་ཏེ། ཨ་ར་པ་ཙ་ན་ཡ་ཏེ་ན་མཿ །ཞེས་བྱ་བའི་བར་གྱི་ཚིགས་བཅད་གསུམ་གྱིས། སྒྱུ་འཕྲུལ་དྲྭ་བ་མངོན་པར་རྫོགས་པའི་བྱང་
ཆུབ་པའི་རིམ་པ་གསུངས་སོ། །འདི་ལྟར་སངས་རྒྱས་བཅོམ་ལྡན་འདས། །ཞེས་པ་དང་པོར་བརྩམས་ཏེ། ཐེག་པ་ཆེན་པོའི་ཚུལ་གྱིས་མཆོག །
ཅེས་པའི་བར་གྱིས་ཚིགས་བཅད་བཅུ་བཞིས། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོའི་སྒོ་ནས་བྱང་ཆུབ་ཀྱི་སེམས་རྡོ་རྗེ་ལ་བསྟོད་པའོ། །
སངས་རྒྱས་རྣམ་པར་སྣང་མཛད་ཆེ། །ཞེས་པ་དང་པོར་བརྩམས་ཏེ། རྡོ་རྗེ་ལྕགས་ཀྱུ་ཞགས་པ་ཆེ། །ཞེས་པའི་བར་ཚིག་རྐང་གཅིག་མ་ཚང་བའི་
ཚིགས་བཅད་ཉི་ཤུ་རྩ་ལྔས་ཤིན་ཏུ་རྣམ་པར་དག་པ་ཆོས་ཀྱི་དབྱིངས་ཀྱི་ཡེ་ཤེས་ཀྱི་སྒོ་ནས་བསྟོད་པའོ། །རྡོ་རྗེ་འཇིགས་བྱེད་འཇིགས་པར་བྱེད། །
ཅེས་པ་དང་པོར་བརྩམས་ཏེ། སྒྲ་དང་ལྡན་པ་རྣམས་ཀྱི་མཆོག །ཅེས་པའི་བར་གྱི་ཚིག་རྐང་གཅིག་དང་ཚིགས་སུ་བཅད་པ་བཅུས། མེ་ལོང་ལྟ་
བུའི་ཡེ་ཤེས་ཀྱི་རང་བཞིན་གྱི་སྒོ་ནས་བསྟོད་པའོ། །ཡང་དག་བདག་མེད་དེ་བཞིན་ཉིད། །ཅེས་པ་དང་པོར་བརྩམས་ཏེ། ཡེ་ཤེས་མེ་ལྕེ་འོད་རབ་
གསལ། །ཞེས་པའི་བར་གྱི་ཚིགས་བཅད་བཞི་བཅུ་རྩ་གཉིས་ཀྱིས་སོ་སོར་ཀུན་ཏུ་རྟོག་པའི་ཡེ་ཤེས་ཀྱི་སྒོ་ནས་བསྟོད་པའོ། །འདོད་པའི་དོན་
གྲུབ་དམ་པ་སྟེ། །ཞེས་པ་དང་པོར་བརྩམས་ཏེ། ནོར་བུ་ཆེན་པོ་རིན་ཆེན་ཏོག །ཅེས་པའི་བར་གྱི་ཚིགས་བཅད་ཉི་ཤུ་རྩ་བཞིས།མཉམ་པ་ཉིད་ཀྱི་
ཡེ་ཤེས་ཀྱི་སྒོ་ནས་བསྟོད་པའོ། །སངས་རྒྱས་ཀུན་གྱི་རྟོགས་བྱ་བ། །ཞེས་པ་དང་པོར་བརྩམས་ཏེ། འཇམ་དཔལ་དཔལ་དང་ལྡན་པའི་མཆོག །
ཅེས་པའི་བར་གྱི་ཚིགས་བཅད་བཅྭོ་ལྔས་བྱ་བ་ནན་ཏན་གྱི་ཡེ་ཤེས་ཀྱི་སྒོ་ནས་བསྟོད་པའོ། །མཆོག་སྦྱིན་རྡོ་རྗེ་མཆོག་ཁྱོད་འདུད། །ཅེས་པ་དང་
པོར་བརྩམས་ཏེ། སངས་རྒྱས་སྐུ་ཉིད་ཁྱོད་ལ་འདུད། །ཅེས་པའི་བར་གྱི་ཚིགས་བཅད་ལྔས། རིགས་ལྔའི་སྒོ་ནས་ཡེ་ཤེས་ལྔ་ལ་བསྟོད་པའོ། །
འདི་ལྟར། ལག་ན་རྡོ་རྗེ་རྡོ་རྗེ་འཆང་། །ཞེས་པ་དང་པོར་བརྩམས་ཏེ། ཆོས་ཀྱི་རྒྱལ་པོ་ཆེན་པོར་འགྱུར་རོ། །ཞེས་པའི་བར་གྱིས་ནི་ཡོན་ཏན་གྱི་སྒོ་
ནས་བསྟོད་པའོ། །ཨོཾ་སརྦ་ངྷརྨཱ། ཞེས་པ་དང་པོར་བརྩམས་ཏེ། ངྷརྨ་ངྷ་ཏུ་ཛྙཱ་ན་གརྦྷ་ཨཱཿ ཞེས་པའི་བར་གྱིས་ནི་སྔགས་ཀྱི་སྒོ་ནས་བསྟོད་པའོ། །
དེ་ནས་དཔལ་ལྡན་རྡོ་རྗེ་འཆང་། །ཞེས་པ་དང་པོར་བརྩམས་ཏེ། རྫོགས་པའི་སངས་རྒྱས་ཀུན་གྱིས་བཤད། །ཅེས་པའི་བར་གྱི་ཚིགས་བཅད་ལྔས་
ཉེ་བར་བསྡུས་པའི་སྒོ་ནས་བསྟོད་པའོ། །དེ་དག་གཅིག་ཏུ་བསྡུས་ན་ཚིགས་བཅད་བརྒྱ་དྲུག་ཅུ་རྩ་གཉིས་རྣམས་དང་། ཡོན་ཏན་བརྒྱ་ལྔ་བཅུའི་
གཞུང་གིས་བཅོམ་ལྡན་འདས་སམ་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་སྐུ་འཇམ་དཔལ་ཡེ་ཤེས་སེམས་པའི་མཚན་ཡང་དག་པར་
བརྗོད་པའི་བསྡུས་པའི་དོན་བསྟན་ཏོ། །ཞེས་ཤིན་ཏུ་གསལ་བར་གསུངས་སོ། །འདིར་གཞུང་མཚམས་སོ་སོའི་སྐབས་ཀྱི་ཚིགས་བཅད་ཀྱི་གྲངས་
ལྟར་ན་སྔགས་འོག་མ་དང་བཅས་པ་ལ་བརྒྱ་བདུན་ཅུ་ལྷག་ཙམ་འོང་བར་སྣང་བ་ལ། བརྒྱ་དྲུག་ཅུ་རྩ་གཉིས་ཞེས་འབྱུང་བ་ནི་ཁ་ཅིག་འདུད་པ་
ཉི་ཤུ་ཡན་ཆད་ལ་བཤད་པ་ལྟར་རམ། དབྱེ་བསྡུའི་ཁྱད་པར་གཞན་ལ་དགོངས་པའམ། ཡི་གེ་པས་ནོར་བའམ། གང་ཡིན་དཔྱད་པར་བྱའོ། །
กก

  བསྡོམས་ལྡེབ་ངོས་༡༡ཡོད།       ངོས་༡པོ།   ༢༽   ༣༽   ༤༽   ༥༽   ༦༽   ༧༽   ༨༽   ༩༽   ༡༠༽   ༡༡༽