|
༄༅། །བྱང་ཆུབ་ཀྱི་སེམས་གཉིས་བསྒོམ་པའི་མན་ངག་བདུད་རྩིའི་ཆུ་རྒྱུན་ཞེས་བྱ་བ་བཞུགས་སོ།
།
བྱང་ཆུབ་ཀྱི་སེམས་གཉིས་བསྒོམ་པའི་མན་ངག་བདུད་རྩིའི་ཆུ་རྒྱུན་ཞེས་བྱ་བ།
བླ་མ་དམ་པ་རྣམས་དང་ལྷག་པའི་ལྷ་ལ་གུས་པས་ཕྱག་འཚལ་
ལོ། །གང་ཞིག་ཉེས་པའི་མུན་པ་ཀུན་སེལ་ཞིང་། །དགེ་ལེགས་ཡོན་ཏན་ཐམས་ཅད་འབྱུང་བའི་གནས།
།མཐའ་ཡས་འགྲོ་བ་ཀུན་གྱི་ཉེར་འཚོའི་
གཞི། །རིན་ཆེན་བྱང་ཆུབ་སེམས་ལ་ཕྱག་འཚལ་ལོ། །བསམ་གྱིས་མི་ཁྱབ་མཁྱེན་བརྩེའི་རྣམ་འཕྲུལ་གྱིས།
།ཉམ་ཆུང་འགྲོ་བ་མགོན་མེད་གྱུར་པ་
རྣམས། །སྲིད་ཞིའི་རྒྱ་མཚོ་ཆེ་ལས་སྒྲོལ་མཛད་པ། །འདྲེན་མཆོག་ཐུགས་རྗེ་ཅན་ལ་ཕྱག་འཚལ་ལོ།
།རྣམ་པ་ཀུན་ཏུ་འགྲོ་ལ་ཕན་དགོངས་ཤིང་། །
རྨད་བྱུང་བྱང་ཆུབ་སེམས་གཉིས་མངོན་གྱུར་ནས། །ཐེག་མཆོག་ལམ་བཟང་རབ་ཏུ་གསལ་མཛད་པ།
།སེམས་དཔའ་ཆེན་པོ་རྣམས་ཀྱིས་བདག་
སྐྱོངས་ཤིག །ཀུན་མཁྱེན་གྲོང་དུ་བགྲོད་པའི་དྲི་མེད་ལམ། །འགྲོ་བའི་རེ་བ་སྐོང་བའི་དཔག་བསམ་ཤིང་།
།འཆི་མེད་མཆོག་སྟེར་བྱང་ཆུབ་སེམས་
བསྒོམ་པའི། །མན་ངག་བདུད་རྩིའི་ཆུ་རྒྱུན་བཤད་པར་བྱ། །ཟབ་དང་རྒྱ་ཆེའི་གཤོག་ཡངས་རབ་རྒྱས་པས།
།བླ་མེད་ཡོན་ཏན་རྒྱ་མཚོའི་མཐར་
སོན་ནས། །ནམ་མཁའ་སྲིད་དུ་འགྲོ་ལ་ཕན་འདོད་པའི། །སྐལ་བཟང་དེ་དག་དགའ་བ་བསྐྱེད་དེ་ཉོན།
།འདིར་དུས་གསུམ་གྱི་རྒྱལ་བ་སྲས་དང་
བཅས་པ་ཐམས་ཅད་ཀྱི་བགྲོད་པ་གཅིག་པའི་ལམ། ཐེག་ཆེན་བསྟན་པའི་སྙིང་པོ།
མན་ངག་ཀུན་གྱི་མཐར་ཐུག ཟབ་མོ་སྙན་བརྒྱུད་ཀྱི་གདམས་པ།
གསུང་རབ་རྒྱ་མཚོའི་ཉིང་ཁུ། ཐེག་ཆེན་བློ་སྦྱོང་གི་མན་ངག་ཅེས་བྱ་བ་ནི།
གང་བཤད་པར་བྱ་བའི་ཆོས་སོ། །དེ་ཡང་ཡང་དག་པར་རྫོགས་པའི་
སངས་རྒྱས་ཀྱིས་གདུལ་བྱའི་དབང་པོའི་རིམ་པ་ལ་དགོངས་ནས།
འདུལ་བྱེད་ཀྱི་ཐེག་པ་སྣ་ཚོགས་ཤིག་གསུངས་པ་ཐམས་ཅད་ཀྱང་དངོས་དང་
བརྒྱུད་པ་གང་རུང་གི་སྒོ་ནས། རྒྱུ་མཐར་ཐུག་པ་ཐེག་པ་ཆེན་པོའི་ལམ་དང་།
འབྲས་བུ་མཐར་ཐུག་པ་རྣམ་པ་ཐམས་ཅད་མཁྱེན་པ་ཉིད་ལ་
གཞོལ་ཞིང་འབབ་པ་ཤ་སྟག་ཡིན་ཏེ། འཕགས་པ་བདེན་པ་པོའི་ལེའུ་ལས།
འཇམ་དཔལ་ངས་སེམས་ཅན་རྣམས་ལ་ཆོས་གང་དག་བསྟན་པ་དེ་
དག་ཐམས་ཅད་ནི་འདི་ལྟ་སྟེ། ཐམས་ཅད་མཁྱེན་པའི་ཡེ་ཤེས་ཐོབ་པར་བྱ་བའི་ཕྱིར།
བྱང་ཆུབ་ལ་གཞོལ་བ། ཐེག་པ་ཆེན་པོ་ལ་འབབ་པ། ཐམས་
ཅད་མཁྱེན་པ་ཉིད་སྒྲུབ་པ། ཡུལ་གཅིག་ཏུ་ཡང་དག་པར་ཕྱིན་པར་བྱེད་པ་སྟེ།
དེ་བས་ན་ང་ལ་ཐེག་པ་ཐ་དད་པ་རྣམ་པར་དགོད་པ་མེད་དོ། །
ཞེས་གསུངས་པའི་ཕྱིར་རོ། །དེའི་རྒྱུ་མཚན་ཡང་། ཉེས་པ་མ་ལུས་པ་སྤངས་ཤིང་།
ཡོན་ཏན་མ་ལུས་པ་རྫོགས་པ་ནི། ཡང་དག་པར་རྫོགས་པའི་
སངས་རྒྱས་ཁོ་ན་ཡིན་ལ།
དེ་འཐོབ་པ་ནི་ཐེག་པ་ཆེན་པོའི་ལམ་ཟབ་པ་དང་རྒྱ་ཆེ་བ་ཁོ་ན་ལ་རག་ལས་པའི་ཕྱིར།
དེ་སྐད་དུ་ཡང་། མདོ་སྡེ་རྒྱན་
ལས། ཟབ་པའི་ཕྱིར་དང་རྒྱ་ཆེའི་ཕྱིར། །ཡོངས་སུ་སྨིན་དང་རྣམ་མི་རྟོག །དེ་ཕྱིར་འདི་ལས་གཉིས་བསྟན་ཏེ།
།འདི་ནི་བླ་ན་མེད་པའི་ཐབས། །ཞེས་
གསུངས་པ་ཡིན་ནོ། །དེའི་ཕྱིར་རྟོག་པ་དང་ལྡན་པའི་གང་ཟག་འཇིག་རྟེན་ཕྱི་མ་ཕན་ཆད་ཀྱི་ལེགས་ཉེས་ཀྱི་མཐའ་ལ་དཔྱོད་པ་ཞུགས་ནས།
རང་དང་གཞན་ལ་ཕན་བདེ་བསྒྲུབ་པར་འདོད་པ་དག་གིས་ནི།
ལུས་དང་སྲོག་ལའང་ལྟོས་པ་མེད་པར་ཐེག་པ་ཆེན་པོའི་ལམ་ལ་འབད་པར་
རིགས་ཤིང་།
ལམ་དེའི་གཙོ་བོའི་སྙིང་རྗེ་ཆེན་པོའི་རྩ་བ་ཅན་གྱི་ཀུན་རྫོབ་བྱང་ཆུབ་ཀྱི་སེམས་དང་།
མཐའ་གཉིས་ལ་མི་གནས་པའི་ཡེ་ཤེས་དོན་
དམ་པ་བྱང་ཆུབ་ཀྱི་སེམས་གཉིས་ཡིན་ཏེ།
རྫོགས་པའི་བྱང་ཆུབ་ཀྱི་རྒྱུའི་རྩ་བ་ནི་དེ་དག་ཏུ་ངེས་པའི་ཕྱིར།
དོན་གྱི་དབང་འདི་གཟིགས་ནས། འཕགས་མཆོག་ཀླུའི་དབང་པོས།
བདག་ཉིད་དང་ནི་འཇིག་རྟེན་འདིས། །བླ་མེད་བྱང་ཆུབ་འཐོབ་འདོད་ན། །དེ་ཡི་རྩ་བ་བྱང་ཆུབ་སེམས།
།རི་
དབང་རྒྱལ་པོ་ལྟར་བརྟན་དང་། །ཕྱོགས་མཐས་གཏུགས་པའི་སྙིང་རྗེ་དང་། །གཉིས་ལ་མི་བརྟེན་ཡེ་ཤེས་ལགས།
།ཞེས་གསུངས་སོ། །
དེས་ན་བྱང་ཆུབ་ཀྱི་སེམས་རིན་པོ་ཆེ་བསྒོམ་པའི་མན་ངག་བཤད་པ་ལ་གཉིས།
མཚུངས་མེད་བརྒྱུད་པའི་རིམ་པ་དང་། གདམས་ངག་ཉམས་
སུ་ལེན་ཚུལ་ལོ། །
དང་པོ་ནི་སྤྱིར་སྙིགས་དུས་ཀྱི་རྒྱལ་བ་གཉིས་པ་འཛམ་གླིང་བསྟན་པའི་སྒྲོན་མ།
གངས་ཅན་འགྲོ་བའི་དེད་དཔོན་སེམས་དཔའ་ཆེན་པོ་དཔལ་
ལྡན་མར་མེ་མཛད་ལ།
བྱང་ཆུབ་ཀྱི་སེམས་སྦྱོང་བའི་གདམས་ངག་བསམ་གྱིས་མི་ཁྱབ་པ་མངའ་ཞིང་།
གཙོ་བོར་གྱུར་པའི་བཀའ་སྲོལ་གསུམ་སྟེ།
དང་པོ་ནི་བླ་མ་བསོད་སྙོམས་པ་ངྷརྨ་རཀྵི་ཏ་ཞེས་བྱ་བ།
ནད་པའི་དོན་དུ་སྐུ་ཤ་དངོས་སུ་བཏང་བའི་ཚེ། འཕགས་པ་སྤྱན་རས་གཟིགས་ཀྱིས་
རྗེས་སུ་བཟུང་བ་དེ་ལ་ཞུས་པ་སྟེ།
དང་པོར་བདག་གཞན་མཉམ་པའི་བྱང་ཆུབ་ཀྱི་སེམས་བསྒོམ་པའི་ལུགས་སོ། །
གཉིས་པ་ནི་བླ་མ་བྱམས་པའི་རྣལ་འབྱོར་པ་ཞེས་བྱ་བ། ཀུ་ས་ལི་ཆུང་བར་ཡང་གྲགས་པ།
བྱམས་སྙིང་རྗེ་ཁོ་ན་བསྒོམས་པས་རྗེ་བཙུན་མི་ཕམ་
མགོན་པོའི་ཞལ་མངོན་སུམ་དུ་གཟིགས་ཤིང་།
མཚན་ཡང་བྱམས་པའི་རྣལ་འབྱོར་ཞེས་ཡོངས་སུ་གྲགས་པ་དེ་ལ་ཞུས་པའོ། །བླ་མ་འདི་ལ་བཀའ་
སྲོལ་ཕྱི་མའི་མན་ངག་འདི་ཡང་མངའ་ཞིང་བརྒྱུད་པའི་རིམ་པར་ཡང་འབྱུང་མོད།
གཙོ་བོར་འཕགས་པ་འཇམ་དཔལ་གྱི་བཀའ་སྲོལ། སློབ་
དཔོན་ཀླུ་སྒྲུབ་ཀྱི་མན་ངག རྒྱལ་སྲས་ཞི་བ་ལྷ་ནས་བརྒྱུད་པ།
དང་པོར་བདག་གཞན་མཉམ་པ་ནས་བསྒོམ་པའི་ལུགས་སོ། །
གསུམ་པ་ནི་མཁས་པ་ཆེན་པོ་གསེར་གླིང་པའི་ཐུགས་དམ་གྱི་སྙིང་པོ།
ཐུན་མོང་མ་ཡིན་པའི་མན་ངག ཐོག་མ་ཉིད་ནས་བདག་གཞན་བརྗེ་བ་
བསྒོམ་པའི་ལུགས་ཏེ། འདི་ལ་རིང་བརྒྱུད་ཀྱི་དབང་དུ་བྱས་ན།
བདག་ཅག་གི་སྟོན་པ་ཤཱཀྱའི་རྒྱལ་པོ་འདི་ཉིད།
བྲམ་ཟེ་ཆེན་པོ་རྒྱ་མཚོའི་རྡུལ་དུ་
འཁྲུངས་པའི་ཚེ། ཐུགས་རྗེའི་རླབས་གཞན་ལས་ཆེ་བའི་དབང་གིས།
སྙིགས་མ་ལྔ་བདོ་བའི་དུས་ཀྱི་སེམས་ཅན་བསོད་ནམས་ཆུང་ཞིང་གདུལ་
དཀའ་བ་རྣམས་ཚེགས་ཆུང་ཞིང་འཇུག་པ་བདེ་བའི་ལམ་གྱིས་འདུལ་བ་སོགས།
སྨོན་ལམ་ལྔ་བརྒྱ་བཏབ་པའི་མཐུས་རྩོད་པའི་དུས་སུ། མི་མཇེད་
ཀྱི་ཞིང་འདིར་བྱང་ཆུབ་ཆེན་པོ་བརྙེས་པའི་ཚུལ་བསྟན་ཏེ།
ཆོས་ཀྱི་འཁོར་ལོ་བསམ་གྱིས་མི་ཁྱབ་པ་བསྐོར་ཞིང་།
དེ་དག་གི་སྙིང་པོ་གདམས་པའི་
བདུད་རྩི་འདི་ཉིད། རྒྱལ་ཚབ་དམ་པ་མི་ཕམ་མགོན་པོ་ལ་གནང་།
འདི་ཡང་སྔོན་དགེ་སློང་བློ་གྲོས་བརྟན་པ། ཞེས་བྱ་བར་གྱུར་པའི་ཚེ། བྱམས་
པའི་ཏིང་ངེ་འཛིན་ཁོ་ན་བསྒོམས་པས་མངོན་དུ་གྱུར་ཅིང་ཏིང་ངེ་འཛིན་དེའི་མཐུས།
དགེ་སློང་དེའི་ཞབས་གྲོང་ཁྱེར་ཆེན་པོའི་སྒོ་ཐེམ་ལ་བཞག་
པའི་ཚེ།
ཡུལ་དེ་ན་གནས་པའི་འགྲོ་བ་ཐམས་ཅད་བྱམས་པའི་སེམས་དང་ལྡན་པར་གྱུར་ཏོ། །དེའི་ཚེ་རབ་ཏུ་བྱུང་བའི་མིང་དེ་བོར་ནས་བྱམས་
པ་བྱམས་པ་ཞེས་ཡོངས་སུ་གྲགས་ཤིང་།
མངོན་པར་བྱང་ཆུབ་པའི་བར་དུ་ཡང་མཚན་དེ་ཉིད་ཀྱིས་གནས་པའོ། །དེས་འཕགས་པ་ཐོགས་མེད་
ཅེས་བྱ་བ་དགའ་ལྡན་དུ་བྱོན་ཏེ།
རྗེ་བཙུན་ཉིད་ལ་བྱམས་པའི་ཆོས་ལྔ་ལ་སོགས་པ་ཐེག་པ་ཆེན་པོའི་སྡེ་སྣོད་བསམ་གྱིས་མི་ཁྱབ་པའི་ལུང་དང་
མན་ངག་ཐོབ་པ་ས་གསུམ་པའི་རྟོགས་པ་བརྙེས་པ། འཇམ་དཔལ་རྩ་བའི་རྒྱུད་ལས།
ཐོགས་མེད་ཅེས་བྱའི་དགེ་སློང་ནི། །བསྟན་བཅོས་དེ་ནི་དོན་
ལ་མཁས། །མདོ་སྡེ་ངེས་དོན་དྲང་བའི་དོན། །རྣམ་པ་མང་པོ་རབ་ཏུ་འབྱེད། །ཅེས་དང་།
བསྟན་པ་ཡུན་རིང་གནས་བྱའི་ཕྱིར། །མདོ་ཡི་དེ་ཉིད་
དོན་སྡུད་བྱེད། །ལོ་ནི་བརྒྱ་དང་ལྔ་བཅུར་འཚོ། །དེ་ལུས་ཞིག་ནས་ལྷ་ཡུལ་འགྲོ།
།འཁོར་བ་རྣམས་སུ་འཁོར་བ་ན།།ཡུན་རིང་བདེ་བ་རྗེས་མྱོང་ནས།།
བདག་ཉིད་ཆེན་པོ་མཐར་གྱིས་དེ། །བྱང་ཆུབ་འཐོབ་པར་འགྱུར་བ་ཡིན།
།ཞེས་སོགས་མདོ་རྒྱུད་དུ་མ་ལས་ལུང་བསྟན་པ། ཤིང་རྟའི་སྲོལ་འབྱེད་
ཆེན་པོར་གྱུར་པ་དེ་ལ་གནང་ངོ་། །དེས་གཅུང་ཐམས་ཅད་མཁྱེན་པ་དབྱིག་གཉེན་ཞེས་བྱ་བ།
སྐྱེ་བ་ལྔ་བརྒྱར་བར་མ་ཆད་དུ་གནས་ལྔ་རིག་པའི་
པཎྜི་ཏར་གྱུར་པས། ཐོགས་པ་མེད་པའི་སྤོབས་པ་དང་ལྡན་པ།
གཞུང་ལུགས་འབུམ་སྡེ་དགུ་བཅུ་གོ་དགུ་ཞལ་ཏོན་དུ་མཛད་པ། རྗེ་བཙུན་བྱམས་
པས་བཀས་གནང་ནས་གཞུང་འགྲེལ་དུ་མ་མཛད་པ།
འཛམ་བུའི་གླིང་དུ་ཀུན་མཁྱེན་གཉིས་པར་གྲགས་པ་དེ་ལ་གནང་།
དེས་ཕྱོགས་རེ་ལ་རང་
བས་མཁས་པའི་བུ་ཆེན་བཞིའི་ནང་ནས།
ཕར་ཕྱིན་རང་ལས་མཁས་པ་འཕགས་པ་རྣམ་པར་གྲོལ་བའི་སྡེ་ཞེས་བྱ་བ།
སློབ་དཔོན་ཆེན་པོ་སངས་
རྒྱས་འབངས་ཀྱི་དབོན་པོ།
ས་རབ་ཏུ་དགའ་བ་ཐོབ་པ་སངས་རྒྱས་ལས་མངོན་སུམ་དུ་ཤེར་ཕྱིན་གྱི་གདམས་པ་གསན་ནས།
དགོངས་འགྲེལ་གྱི་
བསྟན་བཅོས་ཆེན་པོ་མཛད་པ་དེ་ལ་གནང་།
དེས་བཙུན་པ་རྣམ་པར་གྲོལ་བའི་སྡེ་ཞེས་བྱ་བ།
དད་པའི་ས་ཐེག་པ་ཆེན་པོའི་ཚོགས་ལམ་ལ་
གནས་པ།
ཉི་ཁྲི་རྣམ་འགྲེལ་ལ་སོགས་པའི་བསྟན་བཅོས་དུ་མ་མཛད་པའི་མཁས་པ་ཆེན་པོ་དེ་ལ་གནང་།
དེས་སློབ་དཔོན་གུ་ཎ་མི་ཏྲ་ཞེས་བྱ་བ།
སློབ་དཔོན་སེང་གེ་བཟང་པོའི་བླ་མ།
གྲུབ་ཆེན་སངས་རྒྱས་ཡེ་ཤེས་ཀྱི་སློབ་མར་ཡང་གྱུར་ཅིང་སྡུད་འགྲེལ་རྩོམ་པའི་སྐུལ་བ་པོར་གྱུར་པ་དེ་ལ་
གནང་། དེས་སློབ་དཔོན་སེང་གེ་བཟང་པོ་ཞེས་བྱ་བ།
རྒྱལ་བ་བྱམས་པ་ལས་གནང་བ་ཐོབ་པས།
བརྒྱད་སྟོང་འགྲེལ་པ་ལ་སྭོགས་པ་བསྟན་བཅོས་
མང་དུ་མཛད་ཅིང་། ཤེར་ཕྱིན་གྱི་བསྟན་པ་ལ་བྱ་བ་བྱས་པ་དེ་ལ་གནང་།
དེས་སློབ་དཔོན་གང་བ་སྤེལ་ཞེས་བྱ་བ་ཆོས་མངོན་པ་མཛོད་ཀྱི་
འགྲེལ་བཤད་ལ་སོགས་པ་བསྟན་བཅོས་མང་དུ་མཛད་ཅིང་པཎྜི་ཏ་ཆེན་པོར་གྱུར་པ་དེ་ལ་གནང་།
དེས་ཀུ་ས་ལི་ཆེ་བ་ཞེས་བྱ་བ། རྟག་ཏུ་དབེན་
པ་ལ་གཞོལ་ཞིང་སྒྲུབ་པའི་བརྟུལ་ཞུགས་ལ་གནས་པ།
བྱང་ཆུབ་ཀྱི་སེམས་གཉིས་འབྱོངས་པའི་རྣལ་འབྱོར་པ་ཆེན་པོར་གྲགས་པ་དེ་ལ་གནང་།
དེས་ཀུ་ས་ལི་ཆུང་བ་ཞེས་བྱ་བ་གཞན་གྱི་སྡུག་བསྔལ་དངོས་སུ་ལེན་ནུས་པ་དེ་ལ་གནང་།
དེས་གསེར་གླིང་པ་ཆེན་པོ་ལ་གནང་ངོ་། །
ཉེ་བརྒྱུད་ནི་རྒྱལ་བ་བྱམས་པ་ཉིད་ལས།
གསེར་གླིང་པ་ཆེན་པོས་དངོས་སུ་གསན་པར་གྲགས་ཏེ།
འདི་ནི་གསེར་གླིང་རྒྱལ་པོའི་སྲས།
སྐུ་འཁྲུངས་མ་ཐག་ཏུ་དཀོན་མཆོག་ལ་སྐྱབས་འགྲོ་མཛད་པ་སོགས།
ཆེ་བའི་ཡོན་ཏན་དུ་མ་དང་ལྡན་ཞིང་མཁས་པའི་གྲགས་པས།
འཛམ་བུའི་གླིང་ཐམས་ཅད་ཁྱབ་པ།
རང་ཡུལ་གྱི་ཕྱི་རོལ་པ་ཐམས་ཅད་སངས་རྒྱས་ཀྱི་བསྟན་པ་ལ་བཀོད་པ་སོགས།
བསྟན་པའི་བྱ་བ་རྒྱ་ཆེན་
པོ་མཛད་པ། བྱང་ཆུབ་ཀྱི་སེམས་ཀྱི་མངའ་བདག་ཆེན་པོར་གྱུར་པའོ། །དེས་ཇོ་བོ་རྗེ་དཔལ་ལྡན་ཨ་ཏི་ཤ་ཞེས་འཇིག་རྟེན་གསུམ་ན་ཡོངས་སུ་
གྲགས་པ་དེ་ལ་གནང་སྟེ།
འདིའི་རྣམ་པར་ཐར་པ་ཞིབ་པར་ནི་རྣམ་ཐར་གྱི་ཡི་གེ་ཆེན་མོ་དག་ལས་ཤེས་པར་བྱ་ཞིང་།
མདོར་བསྡུ་ན་ཤར་ཕྱོགས་
ཟ་ཧོར་གྱི་རྒྱལ་པོ་དགེ་བ་དཔལ་གྱི་སྲས་སུ་སྐུ་འཁྲུངས།
འཁྲུངས་མ་ཐག་ན་རྗེ་བཙུན་མ་སྒྲོལ་མའི་ཞལ་གཟིགས། གཞོན་ནུའི་དུས་ནས་སྤྱིར་
རིག་པའི་གནས་ལྔ།
ཁྱད་པར་དུ་རྒྱུད་སྡེ་བཞི་ལ་སྦྱངས་པས་མཁས་པའི་མཆོག་ཏུ་གྱུར། ཤན་ཏི་པ།
གསེར་གླིང་པ། རིགས་པའི་ཁུ་བྱུག་སོགས་
མཁས་ཤིང་གྲུབ་པ་བརྙེས་པའི་བཤེས་གཉེན་དམ་པ་རྣམས་ཚུལ་བཞིན་བསྟེན།
བླ་མ་ར་ཧཱུ་ལ་གུཔ་ཏ་ལ་དགྱེས་པ་རྡོ་རྗེའི་དབང་ཞུས་པའི་དུས་
ནས་བཟུང་སྟེ། ཡི་དམ་མང་པོའི་ཞལ་གཟིགས།
ཏིང་ངེ་འཛིན་བསམ་གྱིས་མི་ཁྱབ་པ་ལ་མངའ་བརྙེས།
བླ་མ་དང་ཡི་དམ་མང་པོས་དངོས་དང་
མནལ་ལམ་དུ་ལུང་བསྟན་པ་ལ་བརྟེན་ནས།
ཕལ་ཆེན་སྡེར་རབ་ཏུ་བྱུང་སྟེ་གཅིག་རྫོགས་མཛད།
མངོན་པར་ཤེས་པ་དང་རྫུ་འཕྲུལ་ལ་དབང་
བསྒྱུར། བདུད་དང་མུ་སྟེགས་མང་པོ་ཚར་བཅད།
སྔར་སྨོས་པའི་བླ་མ་རྣམས་དང་ཡི་དམ་གྱི་ལྷ་ལས་བློ་སྦྱོང་གི་གདམས་པ་གསན་པས།
བྱང་
ཆུབ་ཀྱི་སེམས་གཉིས་དབྱར་ཁའི་ཆུ་བོ་བཞིན་དུ་འཕེལ།
ཁྱད་པར་དུ་གསེར་གླིང་པ་ཆེན་པོ་བྱང་ཆུབ་སེམས་ཀྱི་མངའ་བདག་ཏུ་འདུག་པ་ལ་
དགོངས་ནས། གདམས་པ་ཞུ་བའི་ཆེད་དུ་གསེར་གླིང་དུ་བྱོན།
མཇལ་མ་ཐག་ཏུ་སྐྱེ་བ་སྔ་མའི་བླ་མར་ཤེས་ནས། མོས་གུས་ཚད་མེད་པ་སྐྱེས།
བླ་མས་ཀྱང་ཁོང་རང་བྱིས་པའི་དུས་སུ།
ནགས་གསེབ་ནས་རྙེད་པའི་གསེར་སྐུ་གནང་སྟེ།
བསྟན་པའི་བདག་པོར་མངའ་གསོལ་བའི་རྟེན་འབྲེལ་
མཛད། ལོ་བཅུ་གཉིས་སུ་དབུ་སྔས་སྦྲེལ་ནས་གདམས་ངག་ཞུས་པས།
བདག་པས་གཞན་གཅེས་པའི་བྱང་ཆུབ་ཀྱི་སེམས་ཐུགས་ལ་འཁྲུངས།
དེ་ནས་རྒྱ་གར་དུ་བྱོན་ཏེ། བྲི་ཀ་མ་ལ་ཤཱི་ལའི་གནས་བརྟན་མཛད།
ཤར་ནུབ་གུང་གསུམ་ཐམས་ཅད་དུ་ཕྲིན་ལས་ཀྱིས་ཁྱབ། སྡེ་པ་ཐམས་ཅད་
ཀྱིས་ཕྱོགས་རིས་མེད་པར་གཙུག་རྒྱན་དུ་བཀུར།
བཤད་པ་དང་སྒྲུབ་པའི་སྒོ་ནས་མདོ་སྔགས་ཀྱི་བསྟན་པ་དར་རྒྱས་སུ་མཛད།
སྒྲོལ་མ་དང་ཁ་
སར་པ་ནི་ལ་སོགས་པའི་ཡི་དམ་དང་།
ར་ཧཱུ་ལ་ལ་སོགས་པ་བླ་མ་མང་པོས་བོད་དུ་སོང་ན་སྤྱིར་བསྟན་པ་དང་སེམས་ཅན་ལ་ཕན་ཐོགས།
ཁྱད་
པར་དུ་ཨུ་པ་སི་ཀ་ཞིག་ལ་ཕན་ཐོགས་ཤིང་།
དེའི་བཀའ་བརྒྱུད་ཀྱིས་བསྟན་པ་དར་བར་བྱེད་དོ་ཞེས་ལུང་བསྟན་པ་དང་།
རྒྱལ་བས་ལུང་བསྟན་
པའི་ལྷ་བླ་མ་ཡེ་ཤེས་འོད་ཁུ་དབོན་གྱིས་གདན་འདྲེན་ལན་མང་དུ་བཏང་བ་ལ་བརྟེན་ནས།
བོད་དུ་བྱོན། བོད་ཡུལ་རྨོངས་པའི་སེམས་ཅན་
རྣམས་ལ་ཐུགས་རྗེས་གཟིགས།
ལྟ་སྤྱོད་ཕྱིན་ཅི་ལོག་པ་རྣམས་ལུང་རིགས་ཀྱི་སྒོ་ནས་ཚར་བཅད།
ཡང་དག་པའི་ལམ་ལ་བཀོད། དམ་པའི་ཆོས་
ཀྱི་སྒྲོན་མེ་སྦར། ལོག་པར་རྟོག་པའི་ཚང་ཚིང་བསྲེགས།
གནས་ལུགས་ལྟ་བའི་བློ་མིག་བསྐྱེད། ཆོས་དང་ཆོས་མིན་གྱི་རྣམ་དབྱེ་བསྟན།
སྐལ་
ལྡན་གདུལ་བྱའི་ཞིང་ས་ལ། བྱང་ཆུབ་སེམས་ཀྱི་ས་བོན་བཏབ་སྟེ།
ལེགས་བཤད་བདུད་རྩིའི་ཆར་རྒྱུན་ཕབ་ནས། རྣམ་གྲོལ་དགེ་བའི་ལོ་ཏོག་
སྨིན་པར་མཛད་དོ། །ཁྱད་པར་དུ་སྲས་ཀྱི་ཐུ་བོ་འབྲོམ་སྟོན་པ་ཆེན་པོའི་བློ་གྲོས་ཀྱི་ཁང་བཟང་།
ལུང་རྟོགས་ཀྱི་ནོར་བུས་གཏམས་པར་མཛད་
པས། བཀའ་བརྒྱུད་རིན་པོ་ཆེའི་གཏེར་སྒྲོམ་ཁ་ཕྱེ་བ་ལྟ་བུས།
གངས་རིའི་ཁྲོད་ཀྱི་རྒུད་པ་ཐམས་ཅད་བསལ་ཅིང་དགེ་ལེགས་ཀྱི་དཔལ་འབྱོར་
རྒྱ་ཆེར་སྤེལ་བས། ཕྱོགས་འདིའི་འགྲོ་བ་ཐམས་ཅད་མགོན་དང་བཅས་པར་གྱུར་ཏོ། །དེའི་ཕྱིར་དཔལ་ལྡན་མར་མེ་མཛད་ཀྱི་བཀའ་བརྒྱུད་
གསེར་རིའི་ཕྲེང་བ་ལྟ་བུ་འདི་ནི།
ཁ་བ་ཅན་པ་རྣམས་ལ་རྒྱལ་བ་བས་ཀྱང་ཐུགས་རྗེ་ཆེ་བར་ཤེས་པར་བྱའོ། །དེས་འབྲོམ་སྟོན་པ་རྒྱལ་བའི་འབྱུང་
གནས་ཞེས་བྱ་བ། བསྟན་པའི་སྲོག་ཤིང་ཆེན་པོ།
འཕགས་མ་སྒྲོལ་མ་ལ་སོགས་པ་ཡི་དམ་མང་པོའི་ཞལ་གཟིགས་པ།
ཕྱི་མར་དགའ་ལྡན་དུ་ཇོ་
བོ་ཉིད་ཀྱི་དྲུང་དུ་གཤེགས་པའི་མཚན་མ་རྙེད་པ།
བྱང་ཕྱོགས་ཀྱི་འགྲོ་བ་རྣམས་ཀྱི་མིག་གཅིག་པུར་གྱུར་པ་དེ་ལ།
སྤྱིར་བཀའ་མདོ་རྒྱུད་མན་ངག་
ཐམས་ཅད་བུམ་པ་གང་བྱོའི་ཚུལ་དུ་གནང་ཞིང་།
ཁྱད་པར་དུ་གདམས་པ་འདི་ཉིད་གཅེས་པའི་སྙིང་ནོར་བུ་ལ་སྦྱིན་པའི་ཚུལ་གྱིས་ལྐོག་ཁྲིད་དུ་
གདམས་པར་གྲགས་སོ། །དེས་སྲས་ཀྱི་ཐུ་བོ་སྐུ་མཆེད་རིན་པོ་ཆེ་གསུམ་ལ་སྭོགས་པ།
སྣོད་ལྡན་གྱི་སློབ་མ་འགའ་ཞིག་ལ་གསུངས་ཤིང་། ཁྱད་
པར་དུ་པོ་ཏོ་བ་ཆེན་པོ་རིན་ཆེན་གསལ་བ་ཞེས་བྱ་བ།
གནས་བརྟན་ཆེན་པོ་ཡན་ལག་འབྱུང་གི་སྤྲུལ་པར་གྲགས་པ།
ཚེ་བློས་བཏང་བའི་གྲྭ་པ་
ཉིས་སྟོང་ལྷག་རེ་ཙམ་དང་།
ཐབས་ཅིག་ཏུ་བཤད་སྒྲུབ་ཀྱི་བསྟན་པའི་བྱ་བ་ཁོ་ན་ལྷུར་ལེན་པ།
འཇིག་རྟེན་ཆོས་བརྒྱད་ཀྱི་ཕྱོགས་ལ་བསམ་པ་
དང་། སྦྱོར་བས་སྐད་ཅིག་ཀྱང་མི་འཇུག་པ།
གཤེགས་བཞུད་སོགས་ཀྱི་བྱ་བ་ཡང་འཕྲལ་སྣང་ཐུག་ཕྲད་ཙམ་མ་གཏོགས་པ།
གྲབ་ཤོམས་གྱི་
རྩིས་གདབ་མེད་པ་བསྟན་པའི་རྒྱལ་མཚན་ཆེན་པོར་གྱུར་པ་དེ་ལ་གནང་ངོ་། །དེས་བཀའ་བབས་ཀྱི་བུ་ཆེན་ཆེན་པོ་བརྒྱད་ཀྱི་ནང་ནས།
དབུས་
ཀྱི་ཉི་ཟླ་ཟུང་གཅིག་ཏུ་གྲགས་པ།
རྒྱ་ཆེན་ཆོས་ཀྱི་སྤྱན་ལྡན་ཤ་ར་བ་ཡོན་ཏན་གྲགས་དང་།
བྱང་ཆུབ་སེམས་ཀྱི་མངའ་བདག་གླང་ཐང་པ་ཆེན་པོ་
རྡོ་རྗེ་སེང་གེ་གཉིས་ལ་ཐུགས་དམ་གྱི་མཐིལ་ཕྱུང་།
མན་ངག་གི་བཅུད་བསྡུས་ཏེ་སྦས་པའི་ཚུལ་དུ་གནང་ངོ་། །ཤ་ར་པ་ཆེན་པོ་འདི་ཉིད་ཡི་དམ་
གྱི་ལྷ་མང་པོའི་ཞལ་གཟིགས་པ།
ལུང་གི་ཆོས་བསམ་གྱིས་མི་ཁྱབ་པ་ལ་མཁྱེན་པའི་སྣང་བ་རྒྱས་པ།
སྐྱེ་བས་ཐོབ་པའི་ཤེས་རབ་ལ་ཕྱོགས་འདི་
ན་འགྲན་ཟླ་མེད་པར་གྲགས་པ་ཡིན་ནོ། །དེ་ལ་རིན་པོ་ཆེ་འཆད་ཀ་བ་ཡེ་ཤེས་རྡོ་རྗེས་ཞུས་ཏེ།
འདི་ནི་རིགས་རྙིང་མ་པ་ཡོན་ཏན་མདོ་སྔགས་མང་
པོ་ལ་ཐུགས་སྦྱངས་པ།
གཞོན་ནུ་ཉིད་ནས་གཞན་གྱི་སྡུག་བསྔལ་རང་སྟེང་དུ་ལེན་པ་ལ་རང་ངང་གིས་སྤྲོ་བ།
ཐེག་པ་ཆེན་པོའི་རིགས་ནུས་རྒྱས་པ་
ཡིན་ཞིང་། དགུང་ལོ་ཉེར་དྲུག་པའི་དུས་ཡར་ལུང་དུ།
དགེ་བའི་བཤེས་གཉེན་ཉང་ལྕགས་ཞིང་པ་ལ་གླང་ཐང་པའི་ཚིག་རྐང་བརྒྱད་མ་གསན་
པས། བཀའ་གདམས་པའི་ཆོས་ལ་དད་པའི་རྒྱུ་བྱས།
ཐེག་ཆེན་གྱི་ཆོས་ཀྱི་རྩ་བ་བདག་གཞན་བརྗེ་བའི་བྱང་ཆུབ་ཀྱི་སེམས་ལ་ངེས་པ་རྙེད།
དེ་
ནས་པོ་ཏོ་བའི་སློབ་མ་དགེ་བའི་བཤེས་གཉེན་དོལ་པ་དང་།
ལུག་སྨད་པ་གཉིས་ལོ་བཞིར་བསྟེན་ཏེ་བཀའ་གདམས་ཀྱི་གཞུང་གདམས་ངག་མང་
དུ་གསན། བྱང་ཆུབ་ཀྱི་སེམས་ལ་ངེས་ཤེས་སྐྱེས་པས།
བློ་སྦྱོང་གི་གདམས་པ་ཚོལ་བའི་ཆེད་དུ་དགུང་ལོ་སུམ་ཅུ་པ་ལ་དབུ་རིར་བྱོན།
ཤ་ར་བ་
ཆེན་པོ་ལ་ལོ་གཉིས་སུ་ཆོས་གསན་ཀྱང་།
གདམས་པ་འདིའི་ཚིག་ཟུར་ཙམ་ཡང་མ་བྱུང་བས། ཐེ་ཚོམ་སྐྱེས་ཏེ་ཆེད་དུ་གཏད་ནས།
བདག་གཞན་
བརྗེ་བ་ཆོས་ཀྱི་རྩ་བ་ཡིན་མིན་གྱི་དྲི་བ་བྱས།
སངས་རྒྱས་སྒྲུབ་པའི་ཐབས་སུ་མེད་ཁ་མེད་པའི་རྒྱུ་མཚན།
རིན་ཆེན་ཕྲེང་བའི་ལུང་གི་ཤེས་བྱེད་
དང་བཅས་པ་གསུངས་ཏེ། ཡིད་ཆེས་རྙེད་ནས་གདམས་ངག་གནང་བར་ཞུ་བ་ཕུལ།
གནང་བར་ཞལ་གྱིས་བཞེས་ཏེ་དང་པོར་ལོ་དྲུག ཕྱིས་ལོ་
གསུམ་སྟེ་སྔ་ཕྱིར་ལོ་དགུར་གདམས་པ་འདི་ཉིད་ལ་གཅིག་དྲིལ་དུ་བྱས་ཏེ།
ཞུས་ཤིང་བསྒོམས་པས། བདག་གཅེས་འཛིན་གྱི་འཁྲི་བ་ཆོད་པའི་
བྱང་ཆུབ་ཀྱི་སེམས་སྐྱེས།
བློ་སྦྱོང་ཆོས་ཀྱི་སྙིང་པོ་ཡིན་ཡང་སྣོད་ལྡན་ཉུང་བར་དགོངས་ནས།
དང་པོར་བཤད་བཀའ་ཤིན་ཏུ་དོག་པར་མཛད། དེ་
ནས་མཛེ་པོ་སྨན་པས་བོར་ཞིང་ཚེ་འདིར་བདེ་བའི་རེ་ཐག་ཆད་པ་འགའ་ཞིག་ལ་ཐུགས་རྗེའི་དབང་གིས་གནང་།
མཛེ་ནད་སོས་ཤིང་རྟོགས་པ་
ཕུན་སུམ་ཚོགས་པ་སྐྱེས། དེ་འདྲའི་རིགས་ཅན་མང་དུ་འདུས།
འཆད་ཀ་བའི་མཛེ་ཆོས་སུ་གྲགས། ཕྱི་ནས་གཞན་ཕན་རྒྱ་ཆེན་འབྱུང་བར་
གཟིགས་ཏེ། བཤད་བཀའ་ཡངས་པར་མཛད། ཚོགས་པ་ཆེན་པོ་རྣམས་ལ་གསུངས།
གདམས་པ་འདིའི་མངའ་བདག་ཆེན་པོར་གྱུར་ཏེ།
འགྲན་ཟླ་མེད་པའི་སེམས་དཔའ་ཆེན་པོའོ། །དེ་ལ་སེ་སྤྱིལ་ཕུ་པ་ཆེན་པོ་འོད་ཟེར་གཞོན་ནུ་ཞེས་བྱ་བས་ཞུས་ཏེ།
བྱེན་གྱི་ལྷ་སྡིང་སོགས་སུ་ལོ་
ཉི་ཤུ་རྩ་བཞིར་གདམས་པ་འདི་ཁོ་ན་ལ་གཅིག་དྲིལ་དུ་མཛད་ནས།
ཞུས་ཤིང་བསྒོམས་པས། ཡེངས་ཀྱང་ཐུབ་ན་འབྱོངས་པ་ཡིན། །ཞེས་པ་
ལྟར། འགལ་རྐྱེན་སྟོབས་དང་ལྡན་པ་དང་ཕྲད་པའི་ཚེ་ཡང་།
གཉེན་པོ་ཆེད་དུ་མ་བསྟེན་པར་རྐྱེན་ངན་ལམ་དུ་སློངས་པ་སོགས། ལམ་རྟགས་
ཀྱི་ཡོན་ཏན་བསམ་གྱིས་མི་ཁྱབ་པ་སྐྱེས།
ཚོགས་དང་ལྐོག་ཁྲིད་ཅི་རིགས་པར་གདམས་པ་དར་རྒྱས་སུ་མཛད།
ཐུགས་དམ་གྱི་སྙིང་པོ་ཡང་འདི་
ཉིད་ལ་མཛད་པས་རྒྱལ་སྲས་ཆེན་པོར་གྱུར་ཏོ། །དེས་ལྷ་ལུང་གི་དབང་ཕྱུག་འོད་ཟེར་བླ་མ་ལ་གནང་།
དེས་ལྷ་སྡིངས་པ་བྱང་ཆུབ་འབུམ་ལ།
དེས་ལྷ་སྡིངས་དབོན་ལ།
དེས་ཚོགས་ཀྱི་མཁན་པོ་སྒྲུབ་བརྩོན་དམ་པ་ཡོན་ཏན་དཔལ་ལ།
དེས་མཁན་ཆེན་བདེ་བ་དཔལ་ལ། དེས་མཁས་
བཙུན་བཀའ་བཞི་པ་གྲགས་པ་གཞོན་ནུ་ལ།
དེས་ལུང་རྟོགས་ཀྱི་ཡོན་ཏན་བསམ་གྱིས་མི་ཁྱབ་པ་དང་ལྡན་ཞིང་།
བསྟན་འཛིན་ཐམས་ཅད་ཀྱི་
གཙུག་རྒྱན་དམ་པར་གྱུར་པ་རིན་པོ་ཆེ་བསོད་ནམས་གྲགས་པ་ལ་གནང་།
དེས་འཕགས་པ་སྤྱན་རས་གཟིགས་དབང་ཕྱུག་གི་སྤྲུལ་པ་རྒྱལ་བའི་
སྲས་པོ་ཐོགས་མེད་བཟང་པོ་དཔལ་ཞེས་ཉི་ཟླ་ལྟར་ཡོངས་སུ་གྲགས་པ།
སྣང་བ་དག་པའི་སྐལ་ལྡན་རྣམས་ཀྱིས་འཇིག་རྟེན་དབང་ཕྱུག་ཏུ་མངོན་
སུམ་དུ་མཐོང་བ་ལ་སོགས་པ།
ཆེ་བའི་ཡོན་ཏན་བསམ་གྱིས་མི་ཁྱབ་པ་དང་ལྡན་པ་དེ་ལ་གནང་སྟེ།
སེམས་དཔའ་ཆེན་པོ་འདི་ནི་གདམས་པ་
འདི་ཉིད་ཀྱི་སྒོ་ནས་སྟོན་པ་གཉིས་པ་ལྟ་བུར་གྱུར་ཏོ། །དེས་བྱང་སེམས་ཆེན་པོ་ཛྙ་ན་ཤྲི་ཞེས་ཡོངས་སུ་གྲགས་པ་ལ།
དེས་རྟེན་འབྱུང་མཐའ་བྲལ་
གྱི་གནས་ལུགས་ཇི་ལྟ་བ་བཞིན་དུ་གཟིགས་པས།
མཚན་མར་འཛིན་པའི་དམིགས་གཏད་ཞིག་ཅིང་།
དམིགས་མེད་ཐུགས་རྗེའི་སྤྲིན་ལས་འོངས་
པའི་རྣམ་དཀར་ཕྲིན་ལས་ཀྱི་ཆར་རྒྱུན་ཆེན་པོས།
གདུལ་བྱའི་དགེ་བའི་ལོ་ཏོག་སྨིན་པར་མཛད་པ་ལ།
འཇིག་རྟེན་ན་འགྲན་པའི་ཟླ་ཐམས་ཅད་
དང་ཡོངས་སུ་བྲལ་བ། མཚུངས་མེད་ཆོས་ཀྱི་རྗེ་རིན་པོ་ཆེ་ལ་གནང་ངོ་། །དེ་ཉིད་ཀྱི་དྲུང་དུ་བདག་གིས་སྤྱིར་ལུང་རིགས་མན་ངག་གི་བཀའ་དྲིན་
བརྗོད་ཀྱིས་མི་ལང་པ་དང་།
ཁྱད་པར་དུ་ཡང་གདམས་པ་འདི་ཉིད་ཉམས་ཁྲིད་ཀྱི་ཚུལ་དུ་ལན་མང་དུ་མནོས་སོ། །ཡང་ཀུན་མཁྱེན་དབྱིག་གཉེན་
ནས་སློབ་དཔོན་བློ་གྲོས་བརྟན་པ་སོགས་ལ་བརྒྱུད་པ་དང་།
སྤྱན་སྔ་བ་ཆེན་པོ་ནས་ཤ་བོ་སྒང་པ་སོགས་ལ་བརྒྱུད་པ་དང་།
ལྷ་ལུང་གི་དབང་ཕྱུག་
ནས་ལྷ་འགྲོ་བའི་མགོན་པོ་སོགས་ལ་བརྒྱུད་པ་དང་།
རྒྱལ་སྲས་ཐོགས་མེད་ནས་རྒྱ་མ་བ་ཡོན་ཏན་འོད་ལ་སོགས་པ་ལ་བརྒྱུད་པའི་ཚུལ་མང་དུ་
ཡོད་ཅིང་། བདག་གིས་ཀྱང་དང་པོར་བྱང་སེམས་བསམ་གཏན་རིན་ཆེན་པ་དང་།
བར་དུ་ཆོས་ཀྱི་རྗེ་བྱང་སེམས་ཆེན་པོ་ར་སྒྲེང་པ་ཤཱཀྱ་བསོད་
ནམས་ཀྱི་ཞལ་སྔ་ནས་དང་།
གྲོ་ས་ཀུན་སྤངས་པ་ཆེན་པོ་འོད་ཟེར་ཀུན་དགའ་དཔལ་གྱི་ཞལ་སྔ་ནས་དང་།
མཐར་སྙིགས་དུས་ཀྱི་རྡོ་རྗེ་འཆང་
ཆེན་པོ་ཀུན་དགའ་བཟང་པོའི་ཞལ་སྔ་ནས་ལ་སོགས་པ་རྣམས་ལ།
ཆེད་དུ་གཉེར་སྟེ་རབ་ཏུ་དད་ཅིང་འདུན་པའི་སྒོ་ནས་གསུང་རབ་ཀྱི་སྙིང་པོ་
འདི་ཉིད། ལན་མང་དུ་ཞུས་པའི་བརྒྱུད་པའི་ཚུལ་རྣམས་ནི།
ཡི་གེ་མང་དུ་དོགས་ནས་མ་བྲིས་སོ། །རྒྱ་ཆེན་གསུང་རབ་རྒྱ་མཚོའི་དབུས་གནས་
ཤིང་། །ལུང་རྟོགས་ནོར་བུའི་གླིང་ལ་དབང་བསྒྱུར་ཏེ། །དྲི་མེད་གདམས་པའི་བདུད་རྩིའི་ཆར་འབེབས་པ།
།བཀའ་བརྒྱུད་ཀླུ་དབང་ཚོགས་ལ་
བདག་དད་དོ། །
དེ་ལྟར་བརྒྱུད་པ་དེ་དག་ལས་འོངས་པའི་གདམས་ངག་ཉམས་སུ་ལེན་པའི་ཚུལ་ལ།
སྙན་བརྒྱུད་ཆེན་མོ་བ་ལྟར་ན་སྦྱོར་དངོས་རྗེས་གསུམ་དུ་
གསུངས་ལ། དོན་བདུན་མ་ལྟར་ན། སྔོན་འགྲོ་རྟེན་གྱི་ཆོས་བསྟན་པ།
དངོས་གཞི་བྱང་ཆུབ་ཀྱི་སེམས་གཉིས་སྦྱང་བ། རྐྱེན་ངན་བྱང་ཆུབ་ཀྱི་
ལམ་དུ་བསྒྱུར་བ། ཚེ་གཅིག་གི་ཉམས་ལེན་དྲིལ་ནས་བསྟན་པ། བློ་འབྱོངས་པའི་ཚད།
བློ་སྦྱོང་གི་དམ་ཚིག བློ་སྦྱོང་གི་བསླབ་བྱ་སྟེ་བདུན་ནོ། །
དང་པོ་ནི་སྙན་བརྒྱུད་རྡོ་རྗེའི་ཚིག་རྐང་ལས། དང་པོ་སྔོན་འགྲོ་དག་ལ་བསླབ།
།ཅེས་འབྱུང་བའི་དོན་ཉམས་སུ་ལེན་པ་ན། དམིགས་ཐུན་
རྣམ་པ་ལྔ་སྟེ། བྱིན་རླབས་མྱུར་དུ་འཇུག་པའི་ཐབས་སུ། བླ་མའི་རྣལ་འབྱོར།
ལུས་ལ་སྙིང་པོ་ལེན་འདོད་ཀྱི་བློ་བསྐྱེད་པའི་ཐབས་སུ། དལ་
འབྱོར་རྙེད་དཀའ། བརྩོན་འགྲུས་ལ་མྱུར་དུ་བསྐུལ་བའི་ཐབས་སུ།
འཆི་བ་མི་རྟག་པ། བླང་དོར་ལ་མི་འཁྲུལ་བར་འཇུག་པའི་ཐབས་སུ། ལས་
རྒྱུ་འབྲས། ངེས་འབྱུང་གི་བློ་ཁྱད་པར་ཅན་སྐྱེ་བའི་ཐབས་སུ།
འཁོར་བའི་ཉེས་དམིགས་བསྒོམ་པའོ། །
དང་པོ་ནི་མཚན་ཉིད་ཐེག་པ་ནས་བླ་མའི་རྣལ་འབྱོར་གྱི་རྣམ་བཞག་མི་འབྱུང་ཡང་།
བཤེས་གཉེན་བསྟེན་པ་ལམ་གྱི་རྩ་བར་ཐེག་པ་གོང་འོག་
ཐམས་ཅད་ནས་གསུངས་ཏེ། བཤེས་སྤྲིངས་ལས།
དགེ་བའི་བཤེས་གཉེན་བསྟེན་པ་ཚངས་པར་སྤྱོད། །ཡོངས་སུ་རྫོགས་པར་ཐུབ་པས་གསུང་
དེའི་ཕྱིར། །སྐྱེས་བུ་དམ་པ་བསྟེན་བགྱི་རྒྱལ་བ་ལ། །བརྟེན་ནས་རབ་ཏུ་མང་པོས་ཞི་བ་ཐོབ།
།ཅེས་བཤེས་གཉེན་ཚུལ་བཞིན་དུ་བསྟེན་པ་
ཚངས་སྤྱོད་ཡོངས་རྫོགས་སུ་བསྟན་པ་དང་།
དེའི་ཕན་ཡོན་སྔོན་བྱུང་དང་སྦྱར་ཏེ་གསུངས་པ་ལྟར་རོ། །འོ་ན་བཤེས་གཉེན་ཇི་ལྟ་བུ་ཞིག་བསྟེན་
པར་བྱ་སྙམ་ན། མདོ་སྡེ་རྒྱན་ལས། བཤེས་གཉེན་དུལ་བ་ཞི་བ་ཉེར་ཞི་བ། །ཡོན་ཏན་ལྷག་པས་བརྩོན་བཅས་ལུང་གིས་ཕྱུག
།དེ་ཉིད་རབ་ཏུ་
རྟོགས་པ་སྨྲ་མཁས་ལྡན། །བརྩེ་བའི་བདག་ཉིད་སྐྱོ་བ་སྤངས་ལ་བརྟེན། །ཞེས་མཚན་ཉིད་བཅུ་ལྡན་དུ་གསུངས་ཏེ།
དེའི་དོན་ནི་ལྷག་པ་ཚུལ་
ཁྲིམས་ཀྱི་བསླབ་པས་དབང་པོ་དུལ་བ། སེམས་ཀྱི་བསླབ་པས་སེམས་ཞི་བར་གནས་པ།
ཤེས་རབ་ཀྱི་བསླབ་པས་ཉོན་མོངས་ཉེ་བར་ཞི་བ།
སློབ་མ་ལས་ཡོན་ཏན་ཆེས་ལྷག་པ། གཞན་དོན་ལ་སྤྲོ་བའི་བརྩོན་འགྲུས་དང་བཅས་པ།
སྡེ་སྣོད་གསུམ་གྱི་ལུང་གིས་ཕྱུག་པ། གནས་ལུགས་དེ་
ཁོ་ན་ཉིད་རྟོགས་པའི་ཤེས་རབ་དང་ལྡན་པ། གཞན་ལ་ཆོས་སྟོན་པའི་སྨྲ་བ་ལ་མཁས་པ།
རྙེད་བཀུར་སོགས་ལ་མི་ལྟ་བར་སྙིང་བརྩེ་བས་ན་
ཀུན་སློང་དག་པ། ཆོས་བཤད་པའི་དཀའ་སྤྱད་ཀྱིས་མི་ངལ་བས་ན་སྐྱོ་བ་སྤང་བའོ།
།དེ་བཞིན་དུ་སྤྱོད་འཇུག་ལས། རྟག་པར་དགེ་བའི་བཤེས་
གཉེན་ནི། །ཐེག་ཆེན་དོན་ལ་མཁས་པ་དང་། །བྱང་ཆུབ་སེམས་དཔའི་བརྟུལ་ཞུགས་མཆོག
།སྲོག་གི་ཕྱིར་ཡང་མི་གཏང་ངོ་། །ཞེས་ཐེག་ཆེན་གྱི་
དོན་ལ་མཁས་པ་དང་། བྱང་སེམས་ཀྱི་བརྟུལ་ཞུགས་ལ་གནས་པའི་བཤེས་གཉེན་དམ་པ་ནི།
རང་གི་སྲོག་ལས་ཀྱང་གཅེས་པར་བསྟེན་དགོས་
པར་གསུངས་སོ། །ཇི་ལྟར་བསྟེན་པའི་ཚུལ་ནི་དེ་ཉིད་ལས།
དཔལ་འབྱུང་བ་ཡི་རྣམ་ཐར་ལས། །བླ་མ་བསྟེན་པའི་ཚུལ་ལྟར་བསླབ། །ཅེས་
གསུངས་ཏེ།
དེ་ཡང་གྲོང་ཁྱེར་ཡིད་བཟང་པོའི་སྒོ་ན་འདུག་པའི་ཁྱེའུ་དཔལ་འབྱུང་བ་དང་།
བུ་མོ་དཔལ་གྱི་བློ་གྲོས་མ་གཉིས་ཀྱིས། བྱང་ཆུབ་
སེམས་དཔའ་ནོར་བཟང་ལ་བྱང་སེམས་གྱི་བསླབ་པ་སྟོན་པའི་སྐབས་སུ།
བཤེས་གཉེན་བསྟེན་ཚུལ་རྒྱུ་མཚན་དང་བཅས་པ་རྒྱས་པར་གསུངས་
པའི་སྐབས་ནས།
རིགས་ཀྱི་བུ་དགེ་བའི་བཤེས་གཉེན་ནི་སངས་རྒྱས་ཀྱི་རིགས་སུ་བསྐྱེད་པས་མ་ལྟ་བུའོ།
།ཚིག་གི་ཐོག་མཐའ་དེ་བཞིན་དུ་
སྦྱར་ཏེ། ཕན་པ་རྒྱ་ཆེན་པོ་སྒྲུབ་པས་ཕ། སྡིག་པ་ཐམས་ཅད་ལས་སྲུང་བས་མ་མ།
བྱང་ཆུབ་སེམས་ད& |