༄༅། །འཛོམ་ཉག་བསམ་འགྲུབ་སྡེ་ཆེན་གླིང་།
བསེ་མཁར་ཀུན་དགའ་ཚེ་རིང་གིས་བྲིས།

             བསྡོམས་ལྡེབ་ངོས་༢ཡོད།                  ངོས་པ།  ༢༽

༄༅། །འཛོམ་ཉག་བསམ་འགྲུབ་སྡེ་ཆེན་གླིང་། བསམ་འགྲུབ་བདེ་ཆེན་གླིང་ངམ་ལྷུན་གྲུབ་བདེ་ཆེན་གླིང་ཡང་
ཞུ། མདོ་དབུས་ཁམས་གསུམ་གྱི་ཁམས་ཁུལ། ཁམས་ལ་སྟོད་སྨད་བར་གསུམ་དུ་ཕྱེས་པའི་ཁམས་སྟོད་དམ་ལྡན་
སྟོད་སྒའི་ལྷ་སྒྲ། ཆུ་ཀླུང་གསེར་ལྡན་འབབ་པའི་གཡས་ཟུར་དུ་བཞུགས། དེ་ཡང་ལྷ་ཁང་གཡུང་དྲུང་མདོ་ལ་
ཐོག་མར་རིག་འཛིན་འོད་གསལ་དགོན་ཞེས་པའི་བོན་དགོན་ཞིག་བཞུགས་པ་རིམ་བཞིན་གྲུབ་མཐའ་འགྱུར་
བ་ལ་གཞིར་བཅས་ཀྱང་། དགོན་པའི་དཀར་ཆག་ཆེན་མོ་དུས་ཟིང་གི་སྐབས་སུ་བརླགས་པས་ནམ་བཏབ་ཀྱི་
ལོ་དང་འདེབས་མཁན་གྱི་མཚན་ཙམ་ཡང་ད་ལྟ་ཞུ་མི་སྤོབས། འོན་ཀྱང་རྫོང་རོང་རྒན་མདའ་དང་བདེ་ཆེན་དགོན་དུ་ཡོད་པའི་བོན་གྱི་དགོན་ཤུལ།
བོན་སྟོན་པ་གཤེན་རབས་ཀྱི་སྐུ་དང་གཤང་སོགས་རྩ་ཆེན་དུ་བྱེད་ནས་ད་ལྟའང་བཞུགས་པས་བཤད་སྒྲོས་དང་ངག་རྒྱུན་ཙམ་ལ་བཏགས་པ་ནི་
མིན། ད་དུང་སྦལ་གུར་རྫོང་བདག་དགོན་གྱི་ཤུལ་དང་དེ་ནས་གདན་དྲངས་པའི་རོལ་མོ་མཁར་པ་བཅས་ད་ལྟ་མཇལ་དུ་ཡོད་ཀྱང་བཏབ་པའི་དུས་
དང་། འདེབས་མཁན། ཐ་ན་གྲུབ་མཐའ་ཙམ་ཡང་ཞུ་ཚོད་མ་མཆིས་སོ། །
   དེའི་འཕྲོར་མཆོད་རྟེན་དཔལ་གྱི་ལྷུན་པོ་ཡིན་སྟེ། བཞེངས་པ་པོ་ནི་ཐུན་མོང་དང་ཐུན་མོང་མ་ཡིན་པའི་ཤེས་བྱ་ཐམས་ཅད་ཐུགས་སུ་ཆུད་པའི་
པཎྜི་ཏ་ཆེན་པོ་སྨྲྀ་ཏི་ཛྙཱ་ན་ཀཱིརྟི་སྟེ་བོད་སྐད་དུ་དྲན་པ་ཡེ་ཤེས་གྲགས་པའམ་མཚན་གཞན་སྒྲའི་ཚེར་མ་ཞེས་ཞུ་བ་ཁོང་། བོད་ཀྱི་རབ་བྱུང་མ་ཚུགས་
གོང་སྟེ། ཕྱི་ལོའི་དུས་རབས་བཅུ་པའི་སྨད་ཙམ་ལ་རྒྱ་གར་དབུས་ཕྱོགས་གྲོང་ཁྱེར་ཞིག་ཏུ་རྒྱལ་པོ་རྩིབས་ཀྱི་མུ་ཁྱུད་ཅེས་པའི་སྲས་སུ་འཁྲུངས།
ཆུང་ངུ་ནས་རྒྱལ་སྲིད་ལ་མ་ཆགས་པར་རབ་ཏུ་བྱུང་། ཤཱནྟི་པ་དང་པཎ་ཆེན་ནཱ་རོ་ཏ་པ་སོགས་མཁས་གྲུབ་ཀྱི་བླ་མ་དུ་མར་བསྟེན་ནས་ཕྱི་ནང་གི་
ཤེས་བྱ་ཐམས་ཅད་ཐུགས་སུ་ཆུད་པས་མཚན་སྙན་ཡོངས་སུ་གྲགས་ཤིང་སློབ་མ་གདུགས་ཐོགས་པ་ཤ་སྟག་ལྔ་བརྒྱ་ཙམ་བྱུང་། རྒྱ་གར་གྱི་མཁས་པ་
གཞན་སུས་ཀྱང་མ་ཐུབ་པ་རྩོད་པའི་ཁྱུ་མཆོག་ཏུ་གྲགས་པའི་མུ་སྟེགས་པ་ཞིག་ཡང་དག་རིགས་པའི་རལ་གྲིས་ཚར་བཅད་པ་སོགས་ཀྱིས་བསྟན་པ་
ཉིན་མོ་ལྟར་གསལ་བར་མཛད། དེ་སྐབས་བོད་རྒྱལ་འུ་དུམ་བཙན་པོའི་སྤྱན་སྔར་བློན་པོ་ཚོས་རང་ཤེད་ཀྱི་ཟློས་གར་བསྒྱུར་པས་རྒྱལ་སྲིད་ཀྱི་ཕྱིར་
ཆོས་བསྣུབས། བློན་པོ་ཆོས་ལ་ཕྱོགས་པ་རྣམས་མ་འདོད་པའི་ཁར་ལྷ་ལུང་དཔལ་གྱི་རྡོ་རྗེས་ཆོས་ཀྱི་ཆེད་དུ་བཙན་པོ་བཀྲོངས་པས་སྟོབས་འབྱོར་
མངའ་ཐང་རྒྱས་པའི་བསིལ་ལྗོངས་བོད་ཀྱི་རྒྱལ་ས་དེ་བློན་པོ་དང་བཙུན་མོ་ཚོའི་འཐེན་ཁྱེར་དབང་དུ་སོང་བས་སིལ་བུར་ཐོར་ཏེ་རིང་ཞིག་ལོན་
ནས། རྒྱལ་ཁམས་ཟང་ཟིང་དུ་ཆགས་པ་དང་ཆོས་ལོག་སྤྱོད་པ་མང་དུ་བྱུང་བས་ལྷག་པར་གནོད་ཚབས་ཆེ་བ་ལ། མངའ་རིས་ཕྱོགས་ཀྱི་ཆོས་རྒྱལ་ལྷ་
བླ་མ་ཡེ་ཤེས་འོད་ཀྱིས་རྒྱལ་ཁམས་བདེ་འཇགས་སོགས་ཀྱི་ཆེད་དུ་ཆོས་རྣམ་དག་ཅིག་སྤེལ་བར་དགོངས་ཏེ་གཞོན་ནུ་བློ་གསལ་མང་པོ་རྒྱ་གར་ལ་
ཆོས་སློབ་ཏུ་བཏང་། ལོ་ཆེན་རིན་ཆེན་བཟང་པོ་དང་ལོ་ཆུང་ལེགས་པའི་ཤེས་རབ་གཉིས་ཀྱིས་ཆོས་ཀྱི་ཟབ་དོན་ཅི་རིགས་ཤིག་ཐོབ་ཀྱང་ཐུགས་
དགོངས་མ་ཚིམ། བལ་པོའི་ལོ་ཙཱ་བ་རྨ་རུ་རྩེ་ཞེས་ཆོས་ལ་ཅུང་མཁས་པ་ཞིག་བྱུང་བར་ཆོས་ཞུས་པས། ངས་ཆོས་མཁས་པ་མི་ཤེས། རྒྱ་གར་ན་མཁས་
པ་ཡོད་པས་སྤྱན་འདྲེན་ནམ་ཟེར་བ་ལ་ཞུ་རྟེན་གསེར་སོགས་བསྐུར་ནས་བཏང་། སྐབས་དེར་རྒྱ་གར་ཤར་ནུབ་གཉིས་སུ་པཎ་ཆེན་སྨྲྀ་ཏིའི་སྙན་པ་
དབྱར་སྐྱེས་རྔ་གསང་ལས་ཀྱང་གསལ་བས། ལོ་ཙཱ་བས་ཁོང་དང་པཎྜི་ཏ་ཕྲ་ལ་རིང་བ་གཉིས་བོད་དུ་ཕེབས་ཏེ་རྒྱལ་བསྟན་རིན་པོ་ཆེ་དར་ཞིང་རྒྱས་
པར་མཛད་དགོས་པའི་ཞུ་བ་ནན་ཆེར་ཕུལ། པཎྜི་ཏ་གཉིས་ཀྱིས་གངས་ཅན་པའི་གདུལ་བྱར་དགོངས་ཏེ་ཞལ་བཞེས་གནང་ནས་བལ་པོར་བསླེབས་
དུས་ལོ་ཙཱ་བས་ལ་ཕུག་ཟོས་ཏེ་ཕོ་ལོག་གིས་གྲོངས། མངའ་རིས་སུ་གྲོངས་ཟེར་བའང་ཡོད། པཎྜི་ཏ་གཉིས་ཀྱིས་ལོ་ཙཱ་བ་ལ་ཞལ་བཞེས་གནང་ཟིན་པ་
ལྟར་མུ་མཐུད་བྱོན་ཀྱང་བོད་སྐད་མི་མཁྱེན་པས་བོད་སུས་ཀྱང་ངོས་མ་ཟིན་ལ། ལྷ་བླ་མས་ཀྱང་པཎྜི་ཏ་གཉིས་ཕེབས་པ་མ་ཤེས་པར་དཔལ་ལྡན་ཨ་
ཏི་ཤ་གདན་འདྲེན་པའི་ཕྱིར་གསེར་བསྒྲུབ་ཏུ་ཕེབས་པས་གར་ལོག་གི་བཙོན་དུ་ཚུད། ལྷ་བཙུན་བྱང་ཆུབ་འོད་ལ་གར་ལོག་རྒྱལ་པོས་ལྷ་བླ་མའི་སྐུ་
ཚད་དང་མཉམ་པའི་གསེར་དགོས། དེ་མིན་ན་མི་གཏོང་ཟེར་བས་གསེར་བསྒྲུབས་ཏེ་ལྷ་བླ་མ་བླུ་བརྩིས་ལ། ཁོང་གིས་ང་ལོ་ཆེ་བས་བླུ་མི་དགོས། གསེར་དེས་དཔལ་ལྡན་ཨ་ཏི་ཤ་སྤྱན་དྲོངས་གསུངས་ཏེ་གཤེགས། སྨྲྀ་ཏིས་གཙང་རྟ་ནག་ཏུ་དུད་ཚང་ཞིག་གི་ཕྱུགས་རྫི་མཛད་ནས་ཡུན་རིང་ཙམ་
བཞུགས། དེའི་རིང་ལ་འུར་ཐག་དང་འུར་རྡོ་ཕྱག་ཏུ་བཟུང་། དབུ་སྐྲ་འབྲེག་མཁན་མེད་པས་སྤྱི་བོར་བཅིངས། རབ་བྱུང་གི་ཆས་ཀྱང་མ་རྙེད་པར་
སྣམ་བུ་དཀར་པོའི་ལྭ་བ་གྱོན། འཚོ་བ་བཀྲེན་པ་སོགས་དཀའ་སྡུག་ཚད་མེད་མྱངས་པས་ངུ་བྲོ་བ་གསུམ་དང་དགོད་བྲོ་བ་གསུམ་སོགས་ཀྱི་ལོ་རྒྱུས་
བྱུང་སྟེ། དཀར་ཆག་གླུ་སྙན་ལས། ལྡན་ཀློང་ཐང་ངམ། ལ་སྟོད་བཤད་ཚུལ་གཉིས་སྣང་ཡང་། གང་ལྟར་དེ་རུ་འབྲས་བྲེ་གསུམ་གྱི་བུ་ལོན་གསོབ་སླད། ཁྱིམ་བདག་ནོར་ལྡན་དེ་ཉིད་དགོས་དཔོན་དུ་བསྟེན་ཚུལ་མཛད། གྲོང་པ་རྣམས་ཀྱི་ར་ལུག་གི་རྫི་བོ་མཛད་སྐབས། རྡེའུ་བཀྲམ་པས་ཕྱུགས་མ་རྣམས་
བཟས་ལ་འགྲོ་ཞིང་། དགོང་མོར་ཕྱོགས་གཅིག་ཏུ་སྤུངས་པས་རང་རང་གི་ཁྱིམ་དུ་འགྲོ་བའི་རྫུ་འཕྲུལ་དང་ཆོས་གསུངས། ཁྱིམ་དེར་མཚན་མོར་རང་
འཐག་གི་ཡུ་བ་ཆག་པ་སྐུའི་བྲང་ལ་ཕོག་པས་ཁྱིམ་བདག་མོས་འཐབ་པར།བྲང་ལས་ཤིང་རྒོག་དམར་བ་ལ་དགོངས་ཏེ་བཤུམས་པ་དང་། ཁྱིམ་བདག་
མོ་དེས་ར་བར་བཞོན་བཞོ་བའི་ཚེ་སྐབས་ཤིག་རླན་དང་ལྗན་ལྗིན་ནང་དུ་འཕོངས་གདན་དུ་བཞུགས་དགོས་བྱུང་བས། ང་རྒྱལ་པོའི་སྲས་རྒྱ་གར་གྱི་
པཎྜི་ཏ་ཆེན་པོ་རབ་བྱུང་སྡེ་སྣོད་གསུམ་པ་ཞིག་བུད་མེད་བཞོན་སྟེགས་བྱ་དགོས་པ་ཀྱི་ཧུད་དགོངས་ཏེ་བཤུམས། ཡང་བྱ་ཞིག་བྱ་མང་པོས་གཙེས་
པ་གཟིགས་པས། བྱ་ཁྱོད་ཀྱང་མཐའ་ཡི་བྱ། མི་ང་ཡང་མཐའ་ཡི་མི་གསུངས་ནས་བཤུམས་པ་ནི་ངུ་བྲོ་བ་གསུམ་དང་། ནུབ་མོ་དངོས་གཞི་བཞུགས་
གནས་ཁྱིམ་དེའི་སྒོ་རྩར་ཕུག་པ་ཞིག་ཡོད་པ་དེར་བཞུགས་པའི་ཚེ། དེ་དང་ཉེ་བར་ཆུ་མིག་ཏུ་ཀླུ་ཞིག་གིས་ནང་རེ་བཞིན་འོ་མ་ཞལ་བུ་རེ་འདྲེན་པ་
ལས། ནང་གཅིག་བོ་ཤོར་བས། ངོ་སྐྱེངས་ནས་བྲོས་སོང་བས་བཞད་པ་དང་། ཉིན་མོ་ཕྱུགས་མ་རྣམས་འཚོ་སྐྱོང་ཚུལ་གྱིས་དེ་རྣམས་དང་རི་དྭགས་
གཅན་གཟན་མང་དུ་འདུས་པ་ལ་ཆོ་ག་གསུངས་ཤིང་ཞུགས་མེ་གཏོང་བའི་མཐའ་སྐོར་དུ་དུད་འགྲོ་རྣམས་ཆོས་མཉན་ཅིང་སྒོར་མོར་སྡད་(བསྡད་)པ་ལས། རི་བོང་ཞིག་རྣལ་དུ་སོང་བས་ཁ་སྤུ་མེས་ཚིག་པར་ཧར་ལངས་སྤྲུག་སིལ་བྱས་པར་བཞད་མོ་ཤོར། ཡང་ཉིན་གཅིག་མཐའ་འཁོབ་འདིར་
འཁྱམས་དགོས་བྱུང་བར་མ་ཟད་འགྲོ་དོན་ཆེར་མ་བྱུང་བར་སྔོན་གྱི་ཡོན་ཏན་རྣམས་ཀྱང་བརྗེད་ལས་ཆེ་དགོངས་པར། ཡོན་ཏན་རྣམས་སྔར་ལས་
ཀྱང་ཁྱད་པར་འཕགས་པ་འདུག་པས་བཞད་མོ་མཛད་པ་ནི་དགོད་བྲོ་བ་གསུམ་མོ། །ཞེས་གསུངས། ཁོང་གི་སྐུ་བརྙན་རྣམས་དབུ་སྐྲ་སྤྱི་བོར་བཅིངས་
ཤིང་ན་བཟའ་དཀར་པོ་གསོལ་བ། ཕྱག་ཏུ་འུར་ཐག་དང་ནོར་བུ་འཛིན་པ་ཞིག་ཡོད་པའང་རྫི་བོར་བཞུགས་སྐབས་ཀྱི་སྐུ་བྱད་ཡིན།
སྦྱིན་བདག་དེ་ཚང་གི་སྒོའི་ཡ་ཐེམ་ལ། ༈ རི་བོང་འཛིན་པ་རྒྱུ་སྐར་ཕྲེང་བ་ཅན། །མཚན་མོ་མཁའ་ལ་རྒྱུ་བ་རྣམ་སྤངས་ནས། །
དྭངས་པའི་ཆུ་ནང་འདི་ན་ཟླ་བ་ཞེས། །དབྱིབས་ལ་མཚན་མར་འཛིན་པ་བྱིས་པའི་བློ། །ཞེས་བྲིས་པ་དེ། སྔར་ཁོང་རྒྱ་གར་དུ་
བཞུགས་སྐབས་ཀྱི་དངོས་སློབ་དཔྱལ་ལོ་ཙཱ་བ་བསོད་ནམས་རྒྱལ་མཚན་གྱིས་མཇལ་བས་རང་གི་བླ་མའི་ཕྱག་བྲིས་ཡིན་པ་ངོ་
མཁྱེན་ནས་ཁྱིམ་ཚང་དེ་ལ། ཡི་གེ་འདི་སུས་བྲིས། འབྲི་མཁན་ད་ལྟ་གང་ན་བཞུགས་དྲིས་པས། ཁྱིམ་ཚང་དེས། འདི་ངེད་ཀྱི་
གཡོག་པོ་སྐད་མི་གོ་བ་ཞིག་གིས་བྲིས། ད་ལྟ་རྫི་བོར་སོང་ཟེར། ལོ་ཙཱ་བས་པཎ་ཆེན་མཇལ་མ་ཐག་ཞབས་སྤྱི་བོར་བླངས་ཏེ་
གུས་པས་བཏུད། རྒྱ་གར་ཤར་ནུབ་གཉིས་ན་པཎྜི་ཏ་ཁོང་ལས་ལྷག་པ་གཞན་མེད་པ་ཀུན་ལ་བསྒྲགས། ཁྱིམ་ཚང་དེ་ལ་གསེར་
བྱིན་ནས་ཁམས་སུ་གདན་དྲངས། དཔྱལ་ལོ་ཙཱ་བས་སྨན་ལུང་བཏབ་ཅིང་ཁོང་གིས་དཔལ་ཧེ་རུ་ཀའི་མན་ངག་རང་བྱིན་གྱིས་བརླབ་པའི་རིམ་པ་
ཞེས་བྱ་བ་དང་། དགྱེས་པ་རྡོ་རྗེའི་ལག་ཏུ་བླང་བའི་རིམ་པ་ཞེས་བྱ་བ། བདག་མེད་མའི་མན་ངག་ཅེས་བྱ་བ། མཁའ་འགྲོ་མ་རྡོ་རྗེ་གུར་གྱི་མཁའ་
འགྲོ་རྣམ་པ་ལྔའི་སྒྲུབ་པའི་ཐབས་ཞེས་བྱ་བ། གཤིན་རྗེ་གཤེད་ནག་པོའི་རྒྱུད་ཀྱི་དཀའ་འགྲེལ་རིན་པོ་ཆེའི་ཕྲེང་བ་ཞེས་བྱ་བ། ལུས་ངག་ཡིད་གསུམ་
བྱིན་གྱིས་བརླབ་པའི་མན་ངག་ཅེས་བྱ་བ། སེམས་དཔའ་གསུམ་གྱི་ཏིང་ངེ་འཛིན་ལ་མཉམ་པར་གཞག་པ་ཞེས་བྱ་བ། མཚན་ཡང་དག་པར་བརྗོད་པ་
ཉེ་བར་བསྡུས་པའི་རྣམ་པར་རྟོག་གེ་ཞེས་བྱ་བའི་འགྱུར་མཛད་པ་རྣམས་བསྟན་འགྱུར་དུ་བཞུགས།   
  པཎ་ཆེན་སྨྲྀ་ཏི་བོད་དུ་བཞུགས་ཡུན་ཅུང་རིང་བ་དང་། རྒྱ་གར་གྱི་ཤེས་རིག་ཐམས་ཅད་ཐུགས་སུ་ཆུད་པའི་རྨང་གཞི་བཟང་བ། སྐྱེས་ཐོབ་ཀྱི་
ཐུགས་རིག་ཤིན་ཏུ་བཀྲ་བ་བཅས་ཀྱིས་བོད་ཀྱི་སྐད་ཡིག་ལ་མཁས་པར་གྱུར་པས། གླིང་རྗེ་གེ་སར་རྒྱལ་པོའི་སློབ་དཔོན་མཛད་པ་དང་། འབྲོམ་སྟོན་
པ་རྒྱལ་བའི་འབྱུང་གནས་སོགས་ལ་སྒྲ་དང་ལེགས་སྦྱར་གྱི་སྐད་བསླབས་པའི་དུས་ནི། འབྲོམ་སྟོན་དགུང་ལོ་བཅུ་དགུ་པའི་ཆུ་ཁྱི་ཕྱི་ལོ་༡༠༢༢ལ་
ཚོང་པ་དང་འགྲོགས་ནས་ཁམས་ལྡན་སྟོད་དུ་བྱོན། སེ་བཙུན་གྱི་སྒྲུབ་ཕུག་དེ་བྱང་རྫ་རྒྱལ་རྡོ་རྗེ་འཕེན་ཕྱུག་གི་འགྲམ་དུ་ཡོད་དྲུང་ནས་ཉིན་མོར་
ནང་གཡོག ཕྱུགས་འཚོ་བ་དང་ཕྱེ་འཐག་པ་ཡན་ཆད། མཚན་མོར་རྟ་བཟང་ལ་ཞོན། འཁོར་གསུམ་བཏགས་ཏེ་རྐུན་ཟོན་ལེགས་པར་མཛད། དབུ་མ་
དང་། མངོན་པ། སྔགས་རྙིང་མ་སོགས་རང་འཐག་གི་ཁར་དཔེ་ཆ་བཞག་སྟེ་གཟིགས་པ་བཅས་བརྩོན་འགྲུས་བསྐྱེད་པས་མཁས་པར་གྱུར། དགུང་ལོ་
སོ་དྲུག་པའི་ས་ཡོས་ཕྱི་ལོ་༡༠༣༩ལ་གྲྭ་པ་རྣམས་ཆོས་ཀྱི་བགྲོ་གླེང་མཛད་པ་འབྲོམ་སྟོན་ཐུབ་མཁན་མ་བྱུང་བས་རྟ་རྫི་ཡོས་འཐག་བྱེད་པ་ལས་བཏོན་
ཅིང་མཁས་པའི་གྲགས་པས་ཁྱབ། ཡུལ་དེ་དང་ཉེ་བར་པཎ་ཆེན་སྨྲྀ་ཏི་བཞུགས་པ་ལས་སྒྲ་རིག་པ་དང་ལེགས་སྦྱར་གྱི་སྐད་བསླབས་ཤིང་ཕྲིན་ལས་
ཅུང་རྒྱས་པས་འབྲོམ་བུ་དགོན་བཏབ། ཁོང་གིས་ད་ལྟ་རྒྱ་གར་ན་སུ་ཆེ་ཞུས་པས། སྨྲྀ་ཏིས་ངེད་རྒྱ་གར་ན་ཡོད་དུས་ནཱ་རོ་པ་ཆེ། རྒྱལ་རིགས་ལས་བྱུང་
བའི་དགེ་སློང་དཱི་པཾ་ཀ་ར་བྱ་བ་ཡོད་པས་དེ་ད་ལྟ་བཞུགས་ན་ཁོང་ཆེ་བ་འོངས་གསུངས། འབྲོམ་སྟོན་གྱིས་ཇོ་བོའི་མཚན་ཐོས་པ་ཙམ་གྱིས་དད་པ་
ཚད་མེད་འཁྲུངས། དགུང་ལོ་སོ་དགུ་པའི་ཆུ་རྟ་ཙམ་ལ་འགྲུལ་པའི་ངག་ལས་ཇོ་བོ་མངའ་རིས་སུ་ཕེབས་པ་གསན་པས་སེ་བཙུན་ལ་ཇོ་བོ་མཇལ་དུ་
འགྲོ་བར་ཞུས་ནས་གནང་བ་ཐོབ་པ་བཞིན་ཆུ་ལུག་ཕྱི་ལོ་༡༠༤༣ལ་བྱང་ལམ་བརྒྱུད་ནས་དབུས་སུ་ཕེབས། དེ་ཕྱིར་ལྕགས་འབྲུག་ནས་ཆུ་རྟའི་བར་ཕྱི་
ལོ་༡༠༤༠ནས༡༠༤༢བར་གྱི་ལོ་འདི་སྐོར་ལ་སྨྲྀ་ཏི་ཁམས་སྟོད་དུ་བཞུགས་ངེས་ཤིང་གླིང་གེ་སར་རྒྱལ་པོའི་སློབ་དཔོན་མཛད་པའི་དུས་ཀྱང་འདིའི་
སྐབས་སུ་ཡིན་པ་གསལ། ཁོང་གིས་རབ་བྱུང་དང་པོའི་བཅུ་སྐོར་དང་པོ་སྟེ་ཕྱི་ལོ་༡༠༣༠ཙམ་ལ་མ་འོངས་གདུལ་བྱ་རྣམས་ཀྱི་རྟེན་སྐལ་དུ་དགོངས་
ནས། འབྲི་ཀླུང་གསེར་ལྡན་འབབ་པའི་གཡས་འགྲམ། ནོར་བུ་རྒྱན་ལམ་དུང་དཀར་གཡས་འཁྱིལ་གྱི་དབྱིབས་དང་། ཤེར་འགག་རྒྱལ་མཚན། ཐེ་ཁོད་
པད་དཀར་བཀྲ་ཤིས་རྟགས་བརྒྱད་དང་ཨ་མྱེ་གྲོགས་འཛོམ་ནོར་བུའི་དབྱིབས་རྒྱལ་སྲིད་སྣ་བདུན་གྱི་མཚན་ཉིད་ཚང་བའི་ས་དཔྱད་རྟེན་འབྲེལ་ཕུན་
སུམ་ཚོགས་པའི་གནས། སྒ་འཛོམ་ཉག་ས་ཡི་ཐིག་ལེར་མ་དྲོས་ཀླུ་ཡི་ཡུལ་ནས་འཕགས་པའི་བྱེ་མ་ཨ་ཀྲོང་མི་ཚད་གསུམ་ཙམ་ལ་གཞི་མཛད་ནས་
རྣམ་པར་རྒྱལ་མའི་མཆོད་རྟེན་དཔལ་གྱི་ལྷུན་པོ་བཞེངས། དེའང་ཉིན་མོར་མི་དང་མཚན་མོར་ལྷ་འདྲེ་རྣམས་
ལ་བཞེངས་སུ་བཅུག་ཅིང་། ནང་རྟེན་དུ་མཁའ་འགྲོ་སྡེ་ལྔས་སངས་རྒྱས་རབས་བདུན་གྱི་རིང་བསྲེལ་སྙིང་པོར་
བཞུགས་པའི་ཤེལ་གྱི་མཆོད་རྟེན་ཁྲུ་གང་ཕུལ། དེ་ཉིད་གདན་འདྲེན་སྐབས་འོད་ཟེར་བྲག་ལ་ཕོག་ནས་རང་
བྱོན་བྱུང་བར་གྲགས་པའི་མཆོད་རྟེན་དེ་ནི། མཆོད་རྟེན་དཔལ་གྱི་ལྷུན་པོའི་མདུན་
ངོས། འབྲི་ཆུའི་གཡོན་འགྲམ་དུ་ཨེ་ཀྱེ་རག་པ་ཞེས་པའི་བྲག་རི་ཞིག་གི་ངོས་སུ་
མཇལ་རྒྱུ་ཡོད། མཆོད་རྟེན་དཔལ་གྱི་ལྷུན་པོའི་བྲེ་མན་ཆད་གྲུབ་རྗེས། བྲེ་ཡན་ཆད་མ་འོངས་པ་ན་ང་ཡི་སྐྱེ་བ་ཞིག་གིས་
བཞེངས་ཞེས་ལུང་བསྟན་དང་སྨོན་ལམ་རབ་གནས་ལེགས་པར་མཛད། རྟེན་འདི་ཕྱག་མཆོད་བསྐོར་བ་བྱས་པའི་ཕན་ཡོན་
ནི། མཆོད་རྟེན་དཔལ་གྱི་ལྷུན་པོ་འདི་ཉིད་ཀྱི་མདུན་དུ་བཞུགས་པའི་རྡོ་བརྐོས་དཀར་ཆག་ལས། དཔལ་གྱི་ལྷུན་པོ་འདི་ཉིད་
རྒྱང་རིང་མོ་ནས་མིག་གིས་མཐོང་བ་དང་འདི་དག་གི་གྲིབ་མ་ལུལ་ལ་ཕོག་པ་ཙམ་གྱིས་ཚེ་རབ་(རབས)ཐོག་མ་མེད་པའི་
སྡིག་པ་འདག་གོ དེ་ལ་ཕྱག་གུས་པ་གཅིག་འཚལ་ན་ལུས་ཇི་སྙེད་ནོན་པའི་ཐད་དབང་ཆེན་གསེར་གྱི་ས་གཞི་ལ་ཐུགས་(ཐུག)གི་བར་དུ་ས་ཡི་རྡུལ་
ཕྲན་ཇི་སྙེད་ཡོད་པ་དང་མཉམ་པའི་འཁོར་ལོའི་བསྒྱུར་(ལོས་སྒྱུར)བའི་རྒྱལ་པོ་ཐོག་(ཐོབ)པ་མདོ་ལས་བཤད། བསྐོར་བ་དངོས་ཀྱི་ཚེ་སེམས་མ་
ཡེངས་པར་ངག་ཐ་མལ་གྱི་གཏན་(གཏམ)མི་སྨྲ་བ་བྱས་ན་ད་ལྟའི་ལུས་རྟེན་འདི་ལ་མཚམས་མེད་པ་ལྔ་ལྷག་མེད་དུ་བཅོམ་མོ། །རྟེན་འདི་ལ་ཞིག་
གསོས་རབ་གནས་རྟེན་བཞེངས་བྱས་ན་མགོ་འདྲེན་མཐུན་རྐྱེན་མཛད་མི་འབྱོར་ལྡན་རྣམས་ད་ལྟའི་ལུས་རྟེན་འདི་ལ་ནད་ཞི་བ་དང་ཚེ་བསོད་
དཔལ་འབྱོར་རབ་ཏུ་རྒྱས་ཤིང་ཕྱི་མ་ངན་འགྲོའི་སྒོ་འགོགས་པ་སོགས་རྒྱལ་བའི་བཀའ་དང་གྲུབ་ཐོབ་ཚད་མའི་ལུང་གི་གྲུབ་པ་ཐེ་ཙམ་(ཙོམ)མི་
འཚལ་ཞིང་། སངས་རྒྱས་ཀྱི་བཀས་བསླུ་བ་མི་སྲིད་པས་ཐེ་ཚམ་(ཚོམ)སྤངས་ནས་དད་གུས་ཡིད་ཆེས་སྤྲོ་ཤུགས་དང་བཅས་ཏེ་དགེ་རྩ་སེམས་ཅན་གྱི་
དོན་དུ་བསྔོ་བ་སྨོན་ལམ་(གང)ཤེས་ཀྱི་མཐའ་རྒྱན་པ་གལ་ཆེའོ། །ཞེས་དང་། མཁན་ཆེན་དཔལ་ལྡན་ཆོས་སྐྱོང་གིས་མཛད་པའི་དཀར་ཆག་ལས། ཚེགས་ལ་མ་ལྟོས་པའི་ཐབས་ཀྱི་ཁྱད་པར་གྱིས་འབྲས་བུ་འབྱིན་པ་གསང་སྔགས་ཟབ་མོའི་ཆེ་བར་གསུངས་ལ། ཁྱད་པར་ཡི་གེ་དྲུག་མའི་ཕན་ཡོན་
དཔག་ཏུ་མེད་པ་མདོ་སྡེ་ཟ་མ་ཏོག་བཀོད་པ་ངེས་པར་བལྟ་དགོས་སོ། །རྒྱུ་མཚན་དེ་དག་གི་ཕྱིར་གནས་འདི་ཉིད་ལ་བསྐོར་བ་ཟླ་གཅིག་ལྷག་ཙམ་
དང་། བསྐོར་གྲངས་བརྒྱ་ཚོ་སུམ་བཅུ་སོ་བདུན་བྱས་ན། མ་ཎི་དུང་ཕྱུར་གཅིག་རང་གི་ཁ་ནས་འཐོན་པ་དང་མཉམ་པར་འགྱུར་ལ། གཞན་གནས་རི་
བསྐོར་བ་ལ་ཕན་ཡོན་བརྗོད་པའི་རྩིས་བཏང་ན་དེ་ལས་ཀྱང་ཆེས་ལྷག་པར་ཡང་མངོན་ནོ། །འབར་བའི་རྡོ་རྗེས་མཛད་པའི་དཀར་ཆག་ལས། འདི་ལ་
ཕྱག་མཆོད་བསྐུར་བསྟི་སུས་བྱས་པ། །བསོད་ནམས་ཡེ་ཤེས་ཚོགས་གཉིས་རྫོགས་པར་འགྱུར། །བསྐོར་བ་རེ་ལ་རྣམ་རྒྱལ་འབུམ་ཐེར་རེ། །ཡོད་པར་ལུང་
རིགས་གྲུབ་པ་ངས་ཁས་ལེན། །དེ་ཕྱིར་ཕྱག་སྐོར་མཆོད་པ་ཅི་ནས་མཛོད། །དེ་སྐད་བརྩོན་འགྲུས་མཐར་ཕྱིན་ཐུགས་བཞེད་ལྟར། །ལྷ་དང་མཁའ་འགྲོའི་
བྱིན་རླབས་ཁྲག་འཐུང་མིང་། །བདེ་ཆེན་འབར་བའི་རྡོ་རྗེ་རྩལ་གྱིས་བྲིས། །ཞེས་དང་། རོང་ཐ་བློ་བཟང་ཆོས་འབྱོར་ལྷུན་གྲུབ་ཀྱིས་མཛད་པའི་དཀར་
ཆག་ལས། དམ་པ་དེ་དག་གི་གསུང་ལས་གསར་སྤྲོས་མི་དགོས་སོ། འོན་ཀྱང་མི་ཕྱེད་པའི་དང་བ་དང་ལྡན་པ། དགེ་བའི་ཕན་ཡོན་ལ་ཐེ་ཚོམ་
གཏན་མེད་པའི་དབང་པོ་ཡང་རབ་དང་། ཡང་བློ་ཆུང་བ་དག་སྐོར་ཚད་གྲངས་མང་བ་ལ་འཇིགས་པའམ། ལོ་རྒན་པ་དང་། ནད་ཀྱིས་མནར་བ་
རྣམས་ལ་སྟབས་བདེ་བར་འགྱུར་བས་དགོས་དང་ལྡན་ལ། སྐོར་ཚད་ཀྱང་གྲངས་ཉུང་ན། སྐོར་ཚད་དུ་མ་འགྲུབ་བློ་སྐྱེ་བར་མ་ཟད་ཕན་ཡོན་ལྷག་པར་
ཆེ་བར་ཤེས་པ་དང་། བསྐོར་བ་བྱ་བ་ལ་སྤྲོ་བ་འཕེལ་ཏེ་མང་དུ་བསྐོར་བ་བྱེད་པའི་རྒྱུར་འགྱུར་ཞིང་། ཕྱིས་སཱཙྪ་མ་ཎི་སྐུ་སོགས་སྔར་ལས་འབུམ་ཕྲག་
དུ་མ་དང་བརྒྱ་ཚོ་སྟོང་ཚོ་མང་པོར་བཞུགས་པའི་ཕྱིར་ན། སྔོན་བྱོན་དམ་པ་རྣམས་ཀྱི་གསུང་རབ་དང་། སྐོར་བའི་ཕན་ཡོན་མདོ་སོགས་ནས་བཀའ་
སྩལ་བ་ལ་བརྟགས་དཔྱད་ནན་ཏན་བགྱིས་ཤིང་། དམ་པ་དང་མཁས་པ་ཆེན་པོ་ལའང་ལུང་རིགས་ཀྱིས་དཔྱད་པ་བཀའ་འདྲི་ཞུས་པ་བཅས་ཕྱོགས་
གཅིག་ཏུ་གཏན་ལ་ཕབ་པའི་གྲུབ་དོན་སྐོར་བ་བརྒྱ་ཚོ་བཅུ་གཅིག་ལ་དུང་ཆེན་དང་། བརྒྱ་ཚོ་བདུན་ལ་དུང་ཆུང་ལྷག་ཡོད་ངེས་ལ་ཐེ་ཚོམ་མི་དགོས་
ཏེ། དཔེར་ན་སཱཙྪ་མཆོད་བརྒྱ་ཁྲི་ཚོ་བཅོ་བརྒྱད་ལ་བསྐོར་བ་གཅིག་བྱས་ན། མཆོད་རྟེན་བྱེ་བ་གཅིག་དང་ས་ཡ་བརྒྱད་ལ་བསྐོར་བའི་ཕན་ཡོན་རྩིས་
དང་ལུང་གི་གྲུབ་པའི་ཕྱིར་ན། འདིར་ན་སཙྪ་ཁོ་ནའང་འབུམ་ཕྲག་དུ་མར་མ་ཟད་སྐུ་གསུང་ཐུགས་རྟེན་ཤིན་ཏུ་མང་བར་བཞུགས་ཤིང་། བསམ་གྱིས་
མི་ཁྱབ་པའི་མཆོད་རྟེན་ཁྱད་འཕགས་བཞུགས་ཕྱིར་ཐེ་ཚོམ་གྱི་གནས་མེད་དོ། །ཞེས་སོགས་དམ་པ་དུ་མས་ཞལ་གྱིས་བཞེས་པ་དཀར་ཆག་དེ་དག་ཏུ་
གསལ་བ་ལྟར་ལ། བད་ཀན་དང་རྩ་དཀར་སོགས་བཅོས་རྡུགས་ནད་ཀྱི་གདུང་བ་ལས་གྲོལ་བ་ནི་མངོན་སུམ་དུ་མཐོང་བཞིན་པའོ། །
  པཎ་ཆེན་སྨྲྀ་ཏི་ནི་སྤྱིར་ཤེས་བྱ་མཐའ་དག་དང་ཁྱད་པར་བཟོ་རིག་ཕུལ་དུ་སོན་པས་གནས་དེའི་དད་ལྡན་བུ་སློབ་
རྣམས་ལ་རྟེན་དང་གཙུག་ལག་ཁང་གི་བཟོ་བཀོད། ལྷ་རིས་དང་ལྡེབས་རིས། བརྐོས་རིས། འཇིམ་བཟོ། རྫ་བཟོ་སོགས་ལེགས་
པར་བསླབས་པས་ད་ལྟའང་སྒ་འཛོམ་ཉག་ལྷ་རིས་སྒྱུ་རྩལ་ཞེས་སྙན་པའི་གྲགས་པ་ཕྱོགས་སུ་འབར་བའི་ཕྱག་རྒྱུན་མ་ཉམས་
པ་མཆིས། ཁོང་གིས་རྡོ་ནག་པོའི་སྟེང་དུ་ཨ་དཀར་གྱིས་བཞེངས་པའི་སྐུ་བརྙན་ལ་ཕྱིས་རང་བྱོན་དུ་འབོད་ཅིང་། རྡོ་ནག་སྲན་རིལ་ཙམ་གྱི་ནང་དུ་
བདེ་གཤེགས་མཆོད་རྟེན་བརྒྱད་ཀྱི་འབུར་གཟུགས་གསལ་པོར་བཞེངས་པའི་སཱཙྪའི་བརྐོས་ཕོར་ལྟ་བུ་ནི་སྔོན་བྱུང་གི་ལོ་རྒྱུས་སུ་གསལ་བ་ད་ལྟའང་
དངོས་སུ་མཇལ་རྒྱུ་ཡོད་ལ། གནས་གཞན་དུའང་ཁོང་གི་ཕྱག་བཟོ་བཞུགས་ཏེ། མྱང་ཆོས་འབྱུང་ལས། ཆུ་མིག་ནི་རྩ་བོ་ནང་འདྲེ་ཡུལ་གྱི་བྱང་ན་ཡོད། འདིའི་ནུབ་ལུང་ཆུ་གླིང་བུ་ན་པཎྜི་ཏ་སྨྲྀ་ཏིའི་ཕྱག་བཟོ་མ་ཁམ་པ་ལས་གྲུབ་པའི་དཔལ་ཆེན་གྱི་སྐུ་ར་མས་རྙེད་པ། སྨྲྀ་ཏིས་ལུག་རྫི་མཛད་ནས་ང་
རིག་པའི་གནས་ལྔ་ལ་མཁས་པའི་པཎྜི་ཏ་ཡིན་པས། ལྷ་བཟོ་བརྗོད་(བརྗེད་)དམ་མ་བརྗོད་(བརྗེད་)གཟིགས་ནས་ཕྱག་དལ་དུ་སྒྲུབ་པ་འཇིམ་ཁུང་དུ་
སྦས། ཕྱིས་ར་མས་རྙེད་པ་དེ་བཞུགས། ཞེས་དང་། སྨྲྀ་ཏིའི་ཕྱག་བཟོ་དཔལ་ཆེན་པོའམ་ཡང་དག་བྱིན་རླབས་ཅན་ཡོད་དོ། །རྡོ་གཞི་མ་ནག་པོ་ལ་རྡོ་
དཀར་པོས། རུ་ལུ་རུ་ལུ་རང་བྱོན་དུ་གྱུར་པ་ཁྱད་པར་ཅན་བཞུགས། ཞེས་གསུངས། འདི་ཕྱོགས་སུ་གྲགས་པ་ལྟར། ཁམས་སྟོད་སྒ་འཛོམ་ཉག་ལྷ་རིས་
སྒྱུ་རྩལ་དེ་པཎ་ཆེན་སྨྲྀ་ཏི་དང་། མདོ་སྨད་རེབ་གོང་ལྷ་རིས་སྒྱུ་རྩལ་དེ་པཎྜི་ཏ་ཕྲ་ལ་རིང་བ་ལས་མཆེད་པར་འདོད་ལ། ཁ་ཅིག་གིས་གཉིས་ཀ་སྨྲྀ་ཏིའི་
ཕྱག་རྒྱུན་མ་ཉམས་པ་ཡིན་ཀྱང་ཟེར། སྒྱུ་རྩལ་གྱི་ཆ་ནས་བལྟས་ན་ཐིག་རྩ་དང་། མཛེས་ཉམས། རི་མོའི་འགྲོས། འབུར་གཟུགས་ཀྱི་དབྱིབས། ཚོན་གྱི་
མདངས་སོགས་ཀུན་ནས་མཚུངས་པས་རྒྱུས་ཡོད་ཀྱིས་ཞིབ་པར་མ་དཔྱད་ན་འཛོམ་ཉག་དང་རེབ་གོང་གཉིས་ཀྱི་ཡུལ་གང་ནས་བཟོས་པ་ཤེས་དཀའ་
བ་དངོས་མཐོང་ལྟར་ལགས། ཁོང་གི་བླ་མ་ནོར་བཟང་གྲགས་པ་ལས་གསན་པ་ལྟར་སློབ་མ་གཞོན་ནུ་གྲགས་པའི་དོན་དུ། སྒྲ་དང་སུམ་རྟགས་དག་
གསུམ་གང་ལའང་མཁོ་གལ་ཤིན་ཏུ་ཆེ་བའི་དག་ཡིག་སྨྲ་བའི་སྒོ་མཚོན་ཆ་ལྟ་བུ་ཞེས་བྱ་བ་དང་དེའི་རང་འགྲེལ་སྨྲ་བའི་སྒོ་མཚོན་ཆ་ལྟ་བུ་ཞེས་བྱ་
བའི་འགྲེལ་པ་གཉིས་ལི་ཆུ་གསེར་ཁབ་ཏུ་བརྩམས་པ་བསྟན་འགྱུར་གྱི་སྒྲ་མདོ་ཤེ་པར་བཞུགས། པེ་ཅིང་ནས་མི་རིགས་དཔེ་སྐྲུན་ཁང་གིས་ལྕགས་
པར་དུའང་བསྐྲུན། གཞན་ཡང་སངས་རྒྱས་ཐམས་ཅད་མཉམ་པར་སྦྱོར་བ་མཁའ་འགྲོ་མ་སྒྱུ་མ་བདེ་བའི་མཆོག་ཅེས་བྱ་བའི་རྒྱུད་ཕྱི་མ་བརྟག་པ་
བདུན་པ་དང་། དཔལ་གདན་བཞི་པའི་རྣམ་པར་བཤད་པའི་རྒྱུད་ཀྱི་རྒྱལ་པོ་རྣལ་འབྱོར་མ་ཐམས་ཅད་གསང་བ་ཞེས་བྱ་བ། ལྷ་མོ་བཞིས་ཡོངས་སུ་
ཞུས་པ། དཔལ་དེ་བཞིན་གཤེགས་པ་ཐམས་ཅད་ཀྱི་གསང་བ་རྣལ་འབྱོར་ཆེན་པོ་རྣམ་པར་རྒྱལ་བ། འཕགས་པ་གདན་བཞིའི་རྣམ་པར་བཤད་པ། ཡེ་ཤེས་དབང་ཕྱུག་མའི་སྒྲུབ་ཐབས། དེ་ཁོ་ན་ཉིད་དྲུག་རྣམ་པར་བཞག་པ། དཔལ་རྡོ་རྗེ་བདུད་རྩིའི་དཀའ་འགྲེལ། རྡོ་རྗེ་བདུད་རྩིའི་རྒྱུད་ཀྱི་བཤད་པ། རྟོག་པ་ཐམས་ཅད་འདུས་པ་ཞེས་བྱ་བ་སངས་རྒྱས་ཐམས་ཅད་མཉམ་པར་སྦྱོར་བ་མཁའ་འགྲོ་མ་སྒྱུ་མ་བདེ་བའི་མཆོག་གི་རྒྱུད་ཕྱི་མའི་ཕྱི་མ་རྣམ་
པར་བཤད་པ། གསང་བ་ཐམས་ཅད་ཀྱི་སྒྲོན་མའི་རྒྱ་ཆེར་འགྲེལ་པ་གསང་འདུས་རྒྱུད་ཕྱི་མ། བྱང་ཆུབ་སེམས་ཀྱི་འགྲེལ་པའི་རྣམ་པར་བཤད་པ། ཡན་
ལག་བཞིའི་སྒྲུབ་ཐབས་ཀུན་ཏུ་བཟང་མོ་ཞེས་བྱ་བ། ཡེ་ཤེས་ཞབས་ཀྱི་རྗེས་སུ་འབྲང་བའི་དཔལ་མི་བསྐྱོད་རྡོ་རྗེའི་སྒྲུབ་པའི་ཐབས། སྦྱོར་བ་ཡན་ལག་
དྲུག་པ་ཞེས་བྱ་བའི་འགྲེལ་པ་སློབ་དཔོན་སངས་རྒྱས་ཡེ་ཤེས་ཞབས་ཀྱི་ལུགས། རྒྱུད་ཀྱི་རྒྱལ་པོ་དཔལ་གསང་བ་འདུས་པའི་འགྲེལ་པ་རྩ་བའི་རྒྱུད་
དང་རྒྱུད་ཕྱི་མ་གཉིས་བླ་མའི་མན་ངག་ལས་བྲིས་པ་ཞེས་བྱ་བ། འཕགས་པ་མཚན་ཡང་དག་པར་བརྗོད་པའི་རྒྱ་ཆེར་འགྲེལ་པ་མཚན་གསང་སྔགས་
ཀྱི་དོན་དུ་རྣམ་པར་ལྟ་བ་ཞེས་བྱ་བ། འཇམ་དཔལ་མཚན་རྒྱུད་ཀྱི་བཤད་འབུམ། འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་གསང་
བ་དང་ལྡན་པའི་སྒྲུབ་པའི་ཐབས། མཚན་ཡང་དག་པར་བརྗོད་པ་བཀླག་པའི་སྒོམ་ཁོག འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པ་
ཞེས་བྱ་བའི་སྦྱིན་སྲེག་གི་རིམ་པ། འཕགས་པ་འཇམ་དཔལ་གྱི་དཀྱིལ་འཁོར་གྱི་ཆོ་ག་ཡོན་ཏན་འབྱུང་གནས་ཞེས་བྱ་བ། འཕགས་པ་འཇམ་དཔལ་གྱི་
མཚན་ཡང་དག་པར་བརྗོད་པའི་གསང་བ་དང་ལྡན་པའི་སྒྲུབ་པའི་ཐབས་ཀྱི་འགྲེལ་པ་ཡེ་ཤེས་གསལ་བ་ཞེས་བྱ་བ་དང་། སྒྲུབ་ཐབས་གསང་བ་ལྡན་
པའི་ཐིག་གི་ཆོ་ག སྤྱན་དབྱེ་བའི་ཆོ་ག་རབ་གནས་བཅས་པ། འཕགས་པ་འཇམ་དཔལ་རིན་པོ་ཆེའི་ཆོ་ག གསང་ལྡན་གྱི་ཐོ་ཡིག་དོན་བསྡུས་སུ་མཛད་
པ། འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་དཀྱིལ་འཁོར་གྱི་ཆོ་ག ངན་སོང་ཐམས་ཅད་ཡོངས་སུ་སྦྱོང་བའི་དཀྱིལ་འཁོར་ཆེན་
པོའི་སྒྲུབ་ཐབས། རྡོ་རྗེ་རྣམ་པར་འཇོམས་པ་ཞེས་བྱ་བའི་གཟུངས་ཀྱི་འགྲེལ་པ་དང་། རྡོ་རྗེ་རྣམ་པར་འཇོམས་པ་ཞེས་བྱ་བའི་གཟུངས་ཀྱི་མན་ངག ཤེས་རབ་ཀྱི་ཕ་རོལ་ཏུ་ཕྱིན་པ་འབུམ་པ་དང་ཉི་ཁྲི་ལྔ་སྟོང་པ་དང་ཁྲི་བརྒྱད་སྟོང་པ་གསུམ་དོན་མཐུན་པ་སོགས་འགྱུར་དང་ཕྱག་རྩོམ་མང་པོ་མཛད་
པ་བཀའ་འགྱུར་དང་བསྟན་འགྱུར་དུ་བཞུགས།
  སྐུ་ཚེའི་སྨད་དུ་ལྡན་ཁྲ་བོ་ལ་བརྒལ་ནས་ཕེབས། ལྡན་ཀློང་ཐང་དུ་མངོན་པ་མཛོད་ཀྱི་བཤད་པ་རྒྱ་ཆེར་མཛད་པ་དང་དྲན་ཐང་ཕྱག་བཏབ་ནས་
གཤེགས་པས་གདུང་འབུམ་བདུད་ལས་རྣམ་རྒྱལ་ཡང་དེར་བཞེངས། རབ་རྒྱལ་ས་ཁྱིའི་དུས་ངན་གྱི་རྗེས་སུ་ཉིད་ཀྱི་འདྲ་སྐུ་སྟ་རེས་གཏོར་བ་ལ་དབུ་
དེ་དད་ལྡན་ཞིག་གིས་ཉར་ཚགས་ཞུས་པ་དཔལ་ཡུལ་པདྨ་ཚེ་རིང་ལགས་ཀྱིས་༡༩༩༠ལོའི་བོད་ལྗོངས་ཞིབ་འཇུག་དེབ་གཉིས་པར་གསུངས་ཤིང་། འདིར་བཞུགས་པའི་པཎ་ཆེན་སྨྲྀ་ཏི་ཉིད་ཀྱིས་ཕྱག་ནས་མཛད་པའི་སྨན་སྐུ་དེ་ཡང་གཏོར་བ་ལ། སྙིང་རྗེ་ཞེས་པའི་རྒན་པོ་ཞིག་གིས་དབུ་དེ་ཉར་
ཚགས་ཞུས་པས་ཁག་གཉིས་ཀ་ལ་དབུ་རེ་བཞུགས་པ་ནི་ཡ་མཚན་ནོ། །
  བསྟན་པ་ཕྱི་དར་གྱི་དབུ་ཁོང་ནས་ཚུགས་པ་མཁས་དབང་དུ་མས་བཞེད་ལ་གསང་སྔགས་གསར་རྙིང་གི་མཚམས་ཁོང་གི་དུས་ནས་དབྱེ་བ་གཅིག་
མཐུན་དུ་གསུངས། གང་ལྟར་བསྟན་པ་ཕྱི་དར་སྐབས་རྒྱ་གར་གྱི་པཎྜི་ཏ་བོད་དུ་བྱོན་པ་ཆེས་སྔ་བ་ཡིན་ལ་ལོ་ཙཱ་བ་སྔ་ཤོས་ཤིག་ཀྱང་ཡིན། དྲན་ཐང་
དུ་སྐུ་གཤེགས་པའི་དུས་ནི། འབྲོམ་སྟོན་གྱིས། ད་ལྟ་རྒྱ་གར་ན་སུ་ཆེ་ཞུས་པས། སྨྲྀ་ཏིས། ངེད་རྒྱ་གར་ན་ཡོད་དུས་ནཱ་རོ་པ་ཆེ། རྒྱལ་རིགས་ལས་རབ་
ཏུ་བྱུང་བའི་དགེ་སློང་དཱི་པཾ་ཀ་ར་བྱ་བ་ཡོད་པས་དེ་ད་ལྟ་བཞུགས་ན་ཁོང་ཆེ་བ་འོངས་གསུངས་པ་དང་། ཇོ་བོ་རྗེ་བོད་དུ་ཕེབས་རྗེས་བོད་སྟོན་
རྣམས་ཀྱིས་སྨྲྀ་ཏི་བོད་ཀྱིས་མ་ཤེས་པར་རྫི་བོ་མཛད་ཚུལ་གྱི་རྒྱུ་མཚན་རྣམས་ཞུས་པས། ཇོ་བོས། ཨ་ཙ་མ། བོད་བསོད་ནམས་ཆུང་། ངེད་རྒྱ་གར་ཤར་
ནུབ་གཉིས་ན་པཎྜི་ཏ་སྨྲྀ་ཏི་ལས་ལྷག་པ་མེད། བོད་བསོད་ནམས་ཆུང་གསུངས་ནས་སྤྱན་ཆབ་བསིལ་བའི་ལོ་རྒྱུས་བཅས་ལ་དཔགས་ན་ཁོང་ཇོ་བོ་རྗེ་
ལས་བགྲེས་ཤིང་། ཇོ་བོ་རྗེ་བོད་དུ་ཕེབས་ནས་ཕྲིན་ལས་རྒྱས་པའི་སྐབས་ཏེ་རབ་བྱུང་དང་པོའི་སྐོར་གསུམ་པ་ཕྱི་ལོ་༡༠༥༠ཙམ་ནས་གཤེགས་ཟིན་པ་
ཡིན་ནམ་སྙམ། དཔའ་རིས་བསྟན་པའི་རྒྱལ་མཚན་གྱིས་གཤེགས་པའི་དུས་ཕྱི་ལོ་༡༠༣༣ཡིན་པ་མཚོ་སྔོན་སློབ་གསོའི་དུས་དེབ་ཏུ་གསུངས་ཤིང་ལུང་
རིགས་གང་ལ་བརྟེན་པ་མི་གསལ། གཞན་ཡང་རྫུ་འཕྲུལ་དུ་མའི་སྒོ་ནས་སེམས་ཅན་གྱི་དོན་མཛད་ཚུལ་ནི་དེབ་དམར་སྔོན་དང་། མཁས་པའི་དགའ་
སྟོན། བུ་སྟོན་ཆོས་འབྱུང་། འཛོམ་ཉག་མཆོད་རྟེན་གྱི་དཀར་ཆག་གླུ་སྙན་སོགས་བོད་སྤྱིའི་ལོ་རྒྱུས་སུ་པཎ་ཆེན་སྨྲྀ་ཏིའི་རྣམ་ཐར་མ་བཀོད་པ་ཕལ་
ཆེར་མེད་ཅིང་། ཁོང་མུ་སྟེགས་པའི་ངན་སྔགས་ཀྱིས་རྒྱ་གར་ནས་བསྐྲད་པ་དང་ཡུམ་གྱི་སྒྲིབ་པ་སྦྱོང་བའི་ཆེད་དུ་ཕེབས་པའི་ལོ་རྒྱུས་ཀྱང་ཡོད་དེ། དཔེར་ན་མྱང་ཆོས་འབྱུང་ལས། པཎྜི་ཏ་སྨྲྀ་ཏི་ནི་ཤཱན་ཏི་པ་དང་ནཱ་རོ་པའི་སློབ་མ་ཡིན། རྒྱ་གར་ཤར་ནུབ་གུང་གསུམ་ན་མཁས་པ་རྩོད་བྲལ་དཔྱལ་
ལོའི་གསུང་ལས་འདི་ཤིན་ཏུ་མཁས་པས་མུ་སྟེགས་ཚོགས་ཀྱིས་རྩོད་པར་མི་ནུས། མུ་སྟེགས་ཀྱི་བསྟན་པ་སྣུབས་དགོས་པས་ན། མུ་སྟེགས་པ་ངན་
སྔགས་བསྐྲད་འཁོར་གྱི་སྐྱོན་གྱིས་པཎྜི་ཏ་གཉིས་འཁྱམས་དགོས་པ་བྱུང་དུས། ཡང་ཡུམ་གྱི་དོན་དུ་རྟ་ནག་ཏུ་ཕྱུགས་རྫི་མཛད་སྐབས་སུ་གཙུག་ལག་
ཁང་བཞེངས། རི་ཁུད་ཀྱི་རྔ་བོ་ཆེ་སོགས་ཤངས་ཕུ་ལྷ་བུའི་ས་ཕྱོགས་ཤངས་སྐྱོར་མོ་ལུང་དུ་ཡུམ་ཁྱི་མོར་འཁྲུངས་པ། ཁྱི་མོ་དེ་ཚ་ངར་རྩུབ་འགྱུར་ཆེ་
ཞིང་སེམས་རྒྱུད་མ་རུང་ཞིང་མི་སྡུག་པ་དང་ལྡན་པས་ན་ཡུམ་ཁྱི་མོ་ལ་བརྩེ་དུང་ཆེ་བས་ཁྱི་མོར་སྐྱེས། དེ་འདྲེན་ཕྱིར་ཡང་གཡག་རྫི་མཛད་སྐབས། ཉིན་མཚན་ཐུགས་དམ་སྐྱོང་བ་ལ་སྒྲུབ་ཕུག་ཏུ་བཞུགས་པའི་སྐུ་སྐེད་མན་གྱི་རྗེས་བྲག་ལ་གསལ་བར་ཡོད་ཅིང་། སྨྲྀ་ཏིའི་ཞབས་ལྷམ་དང་དོམ་ར་
ཤངས་སྐྱོར་མོ་རྫོང་ན་ཡོད་དོ། །ཡང་ཡུམ་ཁྱི་མོ་ནས་ཚེ་འཕོས་ནས། ཐོབ་རྒྱལ་མདར་མེ་ཐབ་ཅེས་པའི་ས་ཡུལ་དུ་ཡུམ་སྒྱེད་བུའི་ནང་དུ་སྐྱེས། དེ་
འདོན་ཕྱིར་ལུག་རྫི་མཛད་སྐབས། ཆུ་བོ་ལོ་ཧི་ཏའི་ཉེ་འགྲམ་བྱེ་མ་གཡུའི་ཟུར་ཕུད་ཅན་ནས་རང་བྱོན་ཇོ་བོ་མཆེད་གསུམ་དང་མ་ཎི་རང་བྱོན་སྤྲེལ་
སོགས་སྤྲུལ་པའི་ར་མས་འོ་མའི་མཆོད་པ་ཕུལ་བ་ལ་བརྟེན་ནས་དེ་རྣམས་རྙེད་ཀྱང་སྤྲེའུ་ལ་འུར་རྡོ་ཕོག དེ་ནས་སྨྲྀ་ཏི་སྤྱན་དྲངས་པའི་སྐབས། ཇོ་བོ་
གཅིག་དགའ་ལྡན་ལ་ཕེབས། ཇོ་བོ་གཅིག་ཐོག་མར་གཙང་འགྲམ་བྱེ་མའི་ལྷ་ཁང་དུ་རེ་ཞིག་བཞུགས། དེ་ནས་ཞྭ་ལུར་ཕེབས། ཇོ་བོ་གཅིག་དང་ཐོག་
མ་ཎི་ཐོབ་རྒྱལ་ན་བཞུགས་པ་དེ་ཡིན། ཡང་ཡུམ་ཁྱི་མོ་ཚེ་འཕོས་པས་མྱང་གི་ཁྱིམ་ཐབ་ཕྱུག་པོ་མེ་ཉིན་མཚན་འཁོར་ཡུག་གཏོང་ཞིང་རྒྱུན་དུ་བཀལ་
ནས་འཇོག་པའི་ཁྲོ་ཆེན་པོ་ཞིག་གི་ཁྲོ་ཞབས་ཀྱི་སྲུབས་ཤིག་ཏུ་ལས་ངན་པས་འཁྲུངས། དེ་འདོན་པའི་ཕྱིར་མྱང་སྟོད་དུ་ཕྱུགས་རྫི་མཛད་སྐབས་ཕྱུགས་
གླ་སོགས་ལ་བརྟེན་པའི་ཡང་དག་གི་སྐུ་འདི་ཕྱག་བཟོ་མར་བཞེངས་ཤིང་། ཡུམ་ཡང་མཐོ་རིས་སུ་འདྲེན་ཐུབ་པས་དེང་སང་ཡུལ་དེ་ལ་བློ་བདེར་
མིང་ཐོགས། དེ་ནས་ཉི་མ་དབུས་ཀྱི་རྒྱལ་ཁམས་ལ་ཐེགས་སོ། །ཞེས་གསུངས།
ཧོར་སེ་ཆེན་གྱིས་མཉྫུའི་རྒྱལ་ཁམས་བཅོམ་པའི་སྡིག་སྦྱང་ལ་རྟེན་དང་དངོས་ཆས་མང་དུ་ཕུལ་བ་ལྟར་རབ་བྱུང་བཞི་པའི་ལྕགས་
སྤྲེལ་སྟེ་ཕྱི་ལོ་༡༢༦༠ལ་ཆོས་རྒྱལ་འགྲོ་མགོན་འཕགས་པ་དང་། སྒ་ཨ་གཉན་དམ་པ་ཀུན་དགའ་གྲགས་དཔོན་སློབ་ཟུང་གིས་མདོ་
ཁམས་ཀྱི་ས་གནད་མེ་བཙའ་ལ་ཁྲི་འདུ་སྐལ་བཟང་དགོན་གཙོ་གྱུར། རྟེན་ངོ་མཚར་ཅན་དང་རྒྱལ་བའི་བཀའ་འགྱུར་རོ་ཅོག་ཆ་ཚང་
རེ་བཞུགས་པའི་ལྷ་ཁང་རྒྱ་ཕིབས་ཁྱུང་མགོ་ཅན་བརྒྱ་རྩ་བརྒྱད་བཞེངས་པ་ལས། འབའ་ཆེན་དཔལ་འབྱོར་དགོན་དུ་མགོན་པོ་གུར་ལྷ་
བརྒྱད་ཀྱི་སྨན་སྐུ་ངོ་མཚར་ཅན་ཕྱག་ནས་མ་དང་། གསེར་དངུལ་གྱིས་བྲིས་པའི་རྒྱལ་བའི་བཀའ་འགྱུར་རོ་ཅོག་བཅས་བཞུགས་སུ་གསོལ།
རབ་བྱུང་བདུན་པའི་སྟོད་དུ། པཎ་ཆེན་སྨྲྀ་ཏིའི་ཡང་སྲིད་སྒ་རབ་འབྱམས་པ་ཀུན་དགའ་ཡེ་ཤེས་སམ་སྒ་བཀའ་རམས་
པ་ཆེན་པོ་ཀུན་དགའ་ཡེ་ཤེས་ཞེས་འཛོམ་ཉག་དཔོན་ཚང་དུ། ཡབ་སངས་རྒྱས་སྐྱབས་དང་ཡུམ་ལྷ་ལྡན་དབང་མོ་ལ་སྲས་
ལྕམ་སྲིང་བདུན་ཡོད་པའི་ཆེ་འོག་ཏུ་འཁྲུངས། གཞོན་ནུ་ནས་རབ་ཏུ་བྱུང་སྟེ་རྗེ་ཙོང་ཁ་པ་ཆེན་པོ་དང་། བྱང་སེམས་རྭ་སྒྲེང་
བ་ཤཱཀྱ་བསོད་ནམས། ཁྱད་པར་ངོར་ཆེན་རྡོ་རྗེ་འཆང་ཀུན་དགའ་བཟང་པོ་སོགས་མཁས་གྲུབ་ཀྱི་བླ་མ་དུ་མ་ལས་བཀའ་
ཆོས་ཀྱི་བདུད་རྩི་ཞུས་ཏེ་མཁས་པའི་གྲགས་པས་ཁྱབ། ཐེག་ཆེན་སྒྲུབ་ཕུག་སོགས་སུ་སྐུ་མཚམས་ལ་བཞུགས་པས་ཉམས་
ལེན་གྱི་གནད་སྨིན། བྱང་ཆུབ་སེམས་གཉིས་བསྒོམ་པའི་མན་ངག་བདུད་རྩིའི་ཆུ་རྒྱུན་ནམ་ཐེག་ཆེན་བློ་སྦྱོང་གི་མན་ངག་
བདུད་རྩིའི་ཆུ་རྒྱུན་དང་། འཇམ་དཔལ་མཚན་བརྗོད་ཀྱི་འགྲེལ་པ། དབྱུ་གུ་མཆེན་གསུམ་གྱི་བསང་སོགས་གསུང་འབུམ་པོད་
བཅུ་གྲངས་མཛད། མཆོད་རྟེན་དཔལ་གྱི་ལྷུན་པོའི་གདུགས་རིམ་པ་བཅུ་གསུམ་ཆར་ཁེབ་ཏོག་དང་བཅས་པ་ལེགས་པར་བཞེངས། དེའི་དྲུང་དུ། ལྷ་
ཁང་གཡུང་དྲུང་མདོར་ཡོད་པའི་བོན་གྱི་རིག་འཛིན་འོད་གསལ་དགོན། སྦལ་གུར་རྫོང་བདག་དགོན། འབའ་ཆེན་དཔལ་འབྱོར་དགོན་བཅས་གཅིག་
ཏུ་བསྡུས་པས་མིང་གསུམ་གྲུབ་ཅེས་ཀྱང་བྱ། ས་མོ་སྦྲུལ་གྱི་ལོ་(ཕྱི་ལོ་༡༤༤༩)དགོན་གནས་འདི་འདེབས་སྐབས་གདོང་འཆམ་ནས་དཔལ་མགོན་ཞལ་
དང་ཡུམ་ཆེན་སྲིང་མོ་བཞིས་གར་མཛད་པའི་གར་ཞིང་ནས་གར་རོལ་ཞེས་པའི་རོལ་མོ་དང་ཐེག་ཆེན་ལུང་པ་ནས་ཐེག་ཆེན་ཞེས་པའི་རྡོར་དྲིལ་
གཏེར་ལས་བཞེས། འདུ་ཁང་ཀ་བ་བཞི་ཅན་དང་། ཀ་དྲུག་ཁང་སོགས་བཞེངས། ད་དུང་སྒ་ཐར་ལམ་ས་བཟང་རྣམ་རྒྱལ་གླིང་གི་དགོན་བདག་མཛད་
ནས་རབ་གཟའ་ས་ལུག་(ཕྱི་ལོ་༡༤༣༩)ལོར་རྒྱ་བསྐྱེད་ཅིང་དར་རྒྱས་སུ་མཛད་ནས་བསམ་འགྲུབ་དགོན་པ་དང་ཐར་ལམ་དགོན་པ་གཉིས་མ་དགོན་
བུ་དགོན་དུ་བསྐྱངས། ཁོང་གི་རྣམ་ཐར་དང་གསུང་འབུམ་ཕལ་ཆེ་བ་རིག་གསར་གྱི་སྐབས་སུ་བསྲེགས། སྒ་རབ་འབྱམས་པ་ཀུན་དགའ་ཡེ་ཤེས་ཀྱི་
སྤྲུལ་སྐུ་ལྔ་རི་བླ་མ་ཀུན་དགའ་ཞེས་པ་འཛོམ་ཉག་ཏུ་འཁྲུངས། ཆུང་ངུའི་སྐབས་ནས་ཀློང་རྡོལ་གྱི་ཐུགས་རིག་བཀྲ་བས་འབྲི་ཀློག་དང་འདོན་རྟ་
དབྱངས་སོགས་ཚེགས་མེད་ཀྱིས་མཁྱེན། དགུང་ཚོད་སྨིན་པ་དང་ངོར་ཨེ་ཝཾ་ཆོས་ལྡན་དུ་ཕེབས་ཏེ་བསྙེན་པར་རྫོགས། ལམ་འབྲས་བུ་དང་བཅས་པའི་
ཆོས་སྐོར་སོགས་དཔལ་ས་སྐྱའི་ཕ་ཆོས་རྣམས་གསན་སྦྱངས་དཔྱིས་ཕྱིན་པར་མཛད། སླར་རང་དགོན་དུ་ཕེབས་ཏེ་བླ་བྲང་དང་། གཙུག་ལག་ཁང་། སྐུ་གསུང་ཐུགས་རྟེན་སོགས་མང་དུ་བཞེངས་པས་སྒ་རབ་འབྱམས་པ་ཕྱིན་ནས་རྟེན་བཞེངས་པ་དང་བསྟན་པ་འཛིན་སྐྱོང་གི་སྐུ་དྲིན་ཁོང་ལས་ཆེ་བ་
མ་བྱུང་། ཁོང་གི་གདུང་འབུམ་དང་བླ་བྲང་གི་གཟིམ་ཁང་སོགས་རབ་རྒྱལ་ས་ཁྱིའི་བར་བཞུགས་ཀྱང་འཁྲུངས་འདས་ཀྱི་ལོ་གྲངས་ཁ་གསལ་ཅན་མ་
མཇལ།  འབྲི་གུང་ཆོས་རྗེ་ཆོས་ཀྱི་གྲགས་པ་ཕེབས་སྐབས། གྲུབ་ཆེན་སཱ་ར་ཧ་ལ་གྲུབ་ཆེན་བརྒྱད་ཅུས་བསྐོར་བ་མཆོད་རྟེན་འདིར་ཞལ་དངོས་སུ་
གཟིགས་པར་རྣམ་ཐར་ལས་གསུངས།
  རབ་ཉི་ཆུ་བྱི་དང་། ལྕགས་བྱ། རབ་འདོད་ལྕགས་ལུག་བཅས་ཐེངས་གསུམ་ལ་ངོར་མཁན་ཆེན་དཔལ་ལྡན་ཆོས་སྐྱོང་ཕེབས་ནས་ཉམས་གསོ་དང་། རབ་གནས། གཙུག་ལག་ཁང་བཞེངས་ཚུལ། ལྡེབས་རིས་འབྲི་ཚུལ་གྱི་ཞལ་བཀོད། ཕྱི་ལོ་༡༧༤༢ལོར་དགོན་པ་ལ་བཀའ་ཤོག རབ་འདོད་ལྕགས་ལུག་
(ཕྱི་ལོ་༡༧༥༡)ལོའི་ཐ་སྐར་ཉའི་ཚེས་བཅོ་བརྒྱད་ཉིན་འཇམ་མགོན་སངས་རྒྱས་ཕུན་ཚོགས་ཀྱི་དུས་མཆོད་ལ། མཁན་རིན་པོ་ཆེ་ཉིད་ཀྱི་ཐུགས་འདུན་
དང་། ཡོན་བདག་རྒྱ་པ། སྦལ་ཐང་ཨོ་རྒྱན་རྡོ་རྗེ་བཅས་ཀྱིས་བསྐོར་བའི་ཕན་ཡོན་ཞུས་པ་ལྟར་སྡེ་དགེ་ལྷུན་གྲུབ་སྟེང་གི་ཕན་གླིང་བླ་བྲང་ནས་
མཆོད་རྟེན་དཔལ་གྱི་ལྷུན་པོའི་དཀར་ཆག་བཅས་མཛད་པའི་ཡི་གེ་པ་བསྟན་འཛིན་མཆོག་གྲུབ་ཀྱིས་བགྱིས། ཝེ་ལྟའི་བློ་བཟང་ནོར་བུ། སྦལ་ཐང་ཨོ་
རྒྱན་རྡོ་རྗེ། རྒྱ་པ། དག་ལ་སོགས་ཀྱིས་སྦྱིན་བདག་ཞུས། ཝེ་རྒྱ་དག་གསུམ་འདི་སྔོན་པཎ་ཆེན་སྨྲྀ་ཏིའི་སྐབས་སྦྱིན་བདག་ཡིན་པར་གྲགས།
 མེ་སྟག་(ཕྱི་ལོ་༡༨༠༦དང་ཡང་ན་༡༨༦༦)ཟླ་༡ཚེས་༡༥ལ། དག་ལ་ཚང་གིས་བྲི་གཞི་སྦྱོར་བ་ལ་བརྟེན་ནས། ཐར་རྩེ་འཇམ་དབྱངས་ཀུན་བཟང་ཆོས་
ཀྱི་རྒྱལ་མཚན་གྱིས་མཁན་ཆེན་དཔལ་ལྡན་ཆོས་སྐྱོང་གིས་མཛད་པའི་དཀར་ཆག་ཉམས་གསོ་དང་ཉིད་ཀྱིས་བསྡུས་པ་ཞིག་བསམ་འགྲུབ་དགོན་ནས་
མཛད།
  རབ་བྱུང་བཅུ་བཞི་པའི་ས་ལུག་(༡༨༥༩)ལོར། སངས་རྒྱས་ཤཱཀྱ་ཐུབ་པ་དགའ་ལྡན་ལྷ་ནས་བབ་པའི་དུས་ལ་དམིགས་ནས། འཛོམ་ཉག་བླ་དགོན་སྤྱི་
དང་། སྦྱིན་བདག་གི་གཙོ་བོ་ལྷ་སྒྲའི་བེ་ཅང་། རྒྱ་པ། དག་ལ། ཝེ་ལྟ་སོགས་ཡུལ་མི་སྤྱི་དང་བཟོ་རིགས་རྣམས་ཀྱིས་ལྷག་བསམ་རྣམ་པར་དག་པས་
གདུགས་རིམ་པ་བཅུ་གསུམ་ཆར་ཁེབ་ཉི་ཟླ་དང་བཅས་པ་གསར་སྒྲོན་ཞུས། ལྕགས་སྤྲེལ་(༡༨༦༠)ལོའི་སངས་རྒྱས་སྐུ་བལྟམས་པའི་དུས་ཁྱད་པར་
ཅན་ལ་དམིགས་ནས། སྦྱིན་བདག་རྒྱ་པའི་མགོན་པོ་དབང་རྒྱལ་དང་དག་ལའི་ཚེ་སྲུང་། ཝེ་ལྟའི་བློ་བཟང་ནོར་བུ་སོགས་ཁག་གསུམ་གྱིས་སྦྱིན་བདག་
གི་གཙོ་བོ་བྱས། དགོན་པ་དང་དགེ་སློང་ཕལ་ཆེར་དང་ཡུལ་མི་གང་དྲག རྒན་པོ་མ་སྲུ་མོ་བཙུན། ཡུལ་ཡར་མར་རྣམས་ཀྱིས་ཆེ་བའི་ཇ་རྟ་གསེར་
དངུལ། ཆུང་བའི་དུ་བག་དར་ཁ། རྒྱ་མཚོའི་ནང་གི་ཆུ་ཐིགས་ཀྱི་ཚུལ་དུ་ལྷག་བསམ་རྣམ་པར་དག་པའི་སྒོ་ནས་ཞུས་ཏེ་གསེར་ཕམ་ཏོག་དང་བཅས་
པ་ལེགས་པར་གྲུབ། བསམ་འགྲུབ་དགོན་པའི་དཔོན་སློབ་རྣམ་གསུམ་དབུ་ལ་བཞུགས་ནས་དགེ་འདུན་རྣམས་ཀྱིས་ངན་སོང་སྦྱོང་རྒྱུད་ཀྱི་སྒོ་ནས་
ཞག་བདུན་གྱི་བར་རབ་གནས་དང་མཆོད་བསྟོད་རྒྱ་ཆེན་པོར་མཛད་པས་བཀྲ་ཤིས་པའི་དགེ་མཚན་དུ་མ་བྱུང་ཞིང་། དེའི་དུས་སུ། འདན་རག་ཅོ་
རྟོགས་ལྡན་གནས་གཡུ་བྲག་ཕུག་ལ་སྐུ་མཚམས་ལ་བཞུགས་པའི་སྐབས་སུ་ཀླུ་དཀར་པོ་སྦྲུལ་ཞགས་ཐོགས་པ་ཞིག་གིས་འཛོམ་ཉག་མཆོད་རྟེན་འདི་
ན། ས་ག་ཟླའི་ཚེས་བཅུ་ལ་རྒྱ་ནག་གླང་ཆེན་སོགས་གནས་མགྲོན་མང་པོ་བྱོན་ཡོད། བསམ་ཡས་བྱེ་མའི་ལྷ་ཁང་དང་འདྲ། ཉིན་མོར་མིས་བསྐོར་
མཚན་མོར་ལྷ་འདྲེས་བསྐོར་ཞེས་ལུང་བསྟན་པ་རྨིས། རྒྱ་པའི་མགོན་པོ་དབང་རྒྱལ་གྱིས་ཞུས་པ་བཞིན་ས་ཟླའི་ཡར་ཚེས་༡ རེས་གཟའ་སྤེན་པ། སྐར་
མ་སྣར་མ་འཛོམས་པའི་ཉིན་ཚེ་རིང་དོན་ལྡན་གྱིས་འཛོམ་ཉག་མཆོད་རྟེན་གྱི་དཀར་ཆག་མཛད།
ཕྱིས་ཀྱི་དགོན་བདག་ངོར་ཤར་ཆེན་ཀླུ་ལྡིང་པས་
མཛད། བླ་བྲང་གི་གཟིམ་ཤག་དང་མཆོད་གཞིས། ཞིང་ཕྱུགས་སོགས་ཀྱང་ཡོད་ཅིང་མཁན་པོ་དང་ཞབས་དྲུང་བཞུགས་
པའམ་བླ་ཚབ་གཏོང་བ། ཡང་ན་བསམ་འགྲུབ་དགོན་གྱི་གྲྭ་པ་ཞིག་ངོས་ཚབ་བཞག་པ་བཅས་ཀྱིས་སྐྱོང་། རབ་རྒྱལ་མེ་བྱི་(ཕྱི་ལོ་༡༩༣༦)དང་ས་གླང་(ཕྱི་ལོ་༡༩༤༩)ལོ་སྟེ་ཐེངས་གཉིས་ལ་མཆོད་རྟེན་གྱི་གདུགས་རིམ་པ་བཅུ་གསུམ་ཆར་ཁེབ་ཏོག་
བཅས་གསར་དུ་བརྗེས། རབ་ཚེས་ཆུ་བྱི་(ཕྱི་ལོ་༡༩༡༢)ལོར་འདུ་ཁང་བསམ་འཕེལ་རྣམ་རྒྱལ་ཁང་ཀ་བ་ཞེ་གཉིས་ཅན་
གསར་དུ་བཞེངས། རབ་རྒྱལ་ཆུ་བྱ་(ཕྱི་ལོ་༡༩༣༣)ལོར་རབ་འབྱམས་པའི་སྐབས་ཀྱི་འདུ་ཁང་དང་། ཀ་དྲུག་ཁང་། རྣམ་རྒྱལ་
ལྷ་ཁང་ཀ་བ་བཅུ་དྲུག་ཅན། མགོན་ཁང་ཀ་བ་གཉིས་ཅན། ལམ་འབྲས་ཁང་ཀ་བ་བཅུ་དྲུག་ཅན་བཅས་གཅིག་ཏུ་བསྡུས་ཏེ་
མགོན་ཁང་གསར་དུ་བཞེངས། རབ་རྒྱལ་ཆུ་འབྲུག་༡༩༥༢ལོར་དཔལ་ས་སྐྱའི་བདག་ཆེན་ངག་དབང་ཀུན་དགའ་བསོད་
ནམས་ཀྱིས་བཤད་གྲྭ་བཙུགས་པས་བཤད་སྒྲུབ་ཟུང་གི་བསྟན་པ་རྒྱས་པར་གྱུར། དངོས་གྲུབ་དཔལ་འབར་དང་སྡེ་སྣོད་རྒྱ་མཚོ་རྣམ་གཉིས་མཁན་
པོར་བསྐོས།སྐབས་དེར་སློབ་གཉེར་བ་གྲྭ་པ་ཉེར་གཅིག་བཞུགས།

           བསྡོམས་ལྡེབ་ངོས་༢ཡོད།                  ངོས་པ།  ༢༽