བསམ་འགྲུབ་དགོན་གྱི་དཀར་ཆག

༄༅། །འཛོམ་ཉག་བསམ་འགྲུབ་དགོན་གྱི་དཀར་ཆག་སྐོར།
འདུ་ཁང་ཆེན་མོ་བསམ་འཕེལ་རྣམ་རྒྱལ་ཁང་གསར་བཞེངས་ཀྱི་དཀར་ཆག

བསྡོམས་ལྡེབ་ངོས་༧ཡོད། ༡༽ ༢༽ ༣༽ ༤༽ ༥༽ ༦༽ ངོས་༧པའོ།།

〓༄༅། །བླ་མ་དང་འཇམ་པའི་དབྱངས་ལ་ཕྱག་འཚལ་ལོ། འདིར་ཡོངས་རྫོགས་བསྟན་པའི་མངའ་བདག་རིགས་གསུམ་སྒྱུ་འཕྲུལ་དྲྭ་བའི་ཟློས་
གར་རྗེ་བཙུན་ས་སྐྱ་པ་ཆེན་པོ་ཡབ་སྲས་སྐུ་མཆེད་ཆོས་རྗེ་ཁུ་དབོན་བཅས་གོང་མ་ལྔའི་གསང་གསུམ་མི་ཟད་རྒྱན་གྱི་འཁོར་ལོ་གཅིག་ཏུ་བསྡུས་
པའི་རྣམ་རོལ་རྒྱལ་བ་རྡོ་རྗེ་འཆང་ཀུན་དགའ་བཟང་པོ་ཞེས་ཡོངས་སུ་གྲགས་པའི་རིང་ལུགས་འཛིན་པ་བསྟན་པའི་རྩ་ལག་འདུས་ཚོགས་
རིན་པོ་ཆེ་འདི་ཉིད། འཕགས་ཡུལ་པཎ་གྲུབ་ཆེན་པོ་ཇོ་བོ་སྨྲྀ་ཏི་ཛྙཱ་ནའི་སྤྲུལ་པའི་ཡང་སྲིད་ཆོས་རྗེ་བཀའ་རབ་འབྱམས་པ་ཀུན་དགའ་ཡེ་ཤེས་
ཀྱིས་ས་མོ་སྦྲུལ་གྱི་ལོ་ལ་གདན་ས་བཏབ་ནས་ལྷུན་གྲུབ་བདེ་ཆེན་དགོན་ཞེས་མིང་དུ་གསོལ་བ་ནས་དའི་བར་བསྟན་པའི་རྒྱུན་བཟང་མ་ཉམས་
པ་གནས་པར་གྱུར། དེ་ལྟར་སྐབས་འདིར་གླེང་བར་བྱ་བའི་གཙུག་ལག་ཁང་གསར་དུ་བཞེངས་པའི་ཀ་ཆགས་(དཀར་ཆག)ཤེལ་དཀར་མེ་ལོང་
རབ་ཏུ་གསལ་བ་བཀོད་པའི་ཐོག་མར། ཀུན་མཁྱེན་ཨེ་ཝཾ་པ་ཆེན་པོའི་བསྟན་པའི་གསལ་བྱེད་གདན་རབས་ང་དགུ་པ་ངོར་ཁང་གསར་མཁན་
ཆེན་ལྕེ་བཙུན་རྡོ་རྗེ་འཆང་ངག་དབང་མཁྱེན་རབ་འཇམ་དཔལ་སྙིང་པོ་ལྗོངས་འདིར་ཞབས་པད་ཁ་ལོ་སྒྱུར་ཚེ། ལྕགས་གླང་ཟླ་བ་གསུམ་པའི་
ཚེས་༡༧ལ་དགེ་མཚན་མངོན་དུ་གྲུབ་པའི་ས་འདུལ་མཛད། དེ་ནས་ས་ག་ཟླ་བའི་ཉེར་ལྔ་དུས་ཆེན་ཁྱད་པར་ཅན་འཕྲོད་སྦྱོར་བཟང་པོའི་ཉིན་
གཙུག་ལག་ཁང་གི་རྨིང་རྡོ་སྟེང་(བཏིངས)ནས་རིམ་པ་བཞིན་ལེགས་མྱུར་གྱིས་མཐར་ཕྱིན་པར་བྱས་ནས། ཆུ་ཡོས་ཟླ་ཚེས་༣ལ་ནང་གི་ལྷ་ཚོགས་
རྣམས་བཞེངས་པའི་ཚུལ་ནི། རབ་འབྱམས་རྒྱུད་སྡེ་བཞིའི་ཞི་ཁྲོའི་ལྷ་ཚོགས་དང་། ཁྱད་པར་ཞིང་འདིའི་བདག་པོ་རྒྱལ་བ་ཐུབ་པའི་དབང་པོའི་
སྐྱེས་རབས་དཔག་བསམ་ཁྲི་ཤིང་རྣམས། ཡུལ་ཚོགས་འདིའི་མཆོད་གནས་ཁོ་ནར་གཏོགས་པའི་ལྷ་བཟོ་དབུ་པ་བཅུ་གསུམ་ཡོད་པ་ལས་འགྲན་
ཟླ་(བྲལ)ཕུལ་དུ་ཕྱིན་པ་སྤྲུལ་པའི་ལྷ་བཟོ་ཆེན་པོ་རྨ་ཡོན་ཆོས་འགྲུབ་ཞེས་བྱ་བ་ཞིག་ཡོད་པ་དེ་ནི་རང་བཞིན་སྐྱེས་བུ་ཕལ་པ་དང་མི་འདྲ་བ།
གཡོ་སྒྱུ་བསླུ་ཐབས་དང་བྲལ་བ། ལས་འབྲས་ལ་ཞིབ་ཏུ་སེམས་པ། རང་རྒྱུད་ཆོས་དང་འབྲེལ་བ། རང་གི་ལྷ་འབྲི་དགོས་པའི་དོ་གལ་ཆེ་བ་རྣམས་
ཕལ་ཆེར་བཏང་སྙོམས་སུ་བསྐྱུར་ནས་གཞན་གྱི་ལྷ་འབྲི་དགོས་པ་རྣམས་གང་ལ་གང་འདོད་པའི་བསམ་པ་དགའ་བས་ཚིམ་པ་བསྐྱེད་ནུས་པའི་
བྱང་ཆུབ་སེམས་དང་ལྡན་པ་དེས་ཐོག་མར་ཐིག་རྡོ་དྲིལ་གྱི་སྐུད་པ་བསྣམས་ནས་རྩ་ཐིག་བཏབ་པས་དབུ་ཚུགས་ནས། གཙོ་བོ་སྟོན་པའི་ཞིང་
ཁམས་ཁྲི་རྒྱན་དྲུག་ཅན་འཁོར་དགྲ་བཅོམ་པ་གནས་བརྟན་བཅུ་དྲུག་གིས་བསྐོར་བའི་གཙོ་འཁོར་ཐམས་ཅད་དང་ཡི་དམ་རྡོ་རྗེ་འཇིགས་བྱེད་
རོ་ལངས་བརྒྱད་བསྐོར་གྱི་ཞིང་ཁམས་བཅས་སྐྱ་རིས་དང་གཟུགས་བསྐྱོད་སྤྱན་ཞལ་ཕྱེས་ནས། དེ་འཕྲོའི་ཚོན་མདངས་རི་མོ་འཁོར་གྱི་གཟུགས་
བསྐྱོད་སྤྱན་ཞལ་ཕྱེ་བ་རྣམས་དེ་ཡི་དངོས་སློབ་གཟུགས་འགྲོས་བཀོད་པ་ཚུལ་བཞིན་འཛིན་པའི་མཆོག་རྒྱ་པའི་ཆོས་འབྱུང་གིས་བྱས་སོ། །དེའི་
གཡོན་ཕྱོགས་གི་གཙོ་བོ་རྣམ་པར་སྣང་མཛད་དང་། ཐུགས་རྗེ་ཆེན་པོ་བཅུ་གཅིག་ཞལ་རིགས་ལྔས་བསྐོར་བའི་ཞིང་ཁམས་གཉིས། སྤྲུལ་པའི་
རང་བཟོ་ཆེན་པོ་རྨ་ཡོན་དང་ཆ་མཐུན་པ། སྔོན་རབས་ཀྱི་མི་བཞིན་དུ་གཤིས་བཟང་བ་བློ་ཆོས་ཚོགས་(ཕྱོགས)སུ་ཡོད་པ་ཕྱིས་སུ་དགེ་བསྙེན་གྱི་
བསླབ་པ་ལ་གནས་པ་གྲོང་འགོ་ཚེ་དར་ཞེས་པས་སྐྱ་རིས་དང་གཟུགས་བསྐྱོད་སྤྱན་ཕྱེ་ཡོངས་རྫོགས་བྱས། དེ་འཕྲོའི་ཚོན་མདངས་རི་མོ་དོན་གྲུབ་
བཀྲ་ཤིས་ཀྱིས་བྲིས་པ་ཡིན། དེ་ནས་གཡས་གཡོན་སྐྱེས་རབས་རྣམས་རིམ་པ་བཞིན། དགེ་སློང་ཀུན་དགའ་ཆོས་ལྡན་དང་། མི་དབང་ཆེན་པོ་བཱེ་
ཅང་དཔའ་ཆེན། དྭགས་ལའི་བསོད་སྟོབས། རྒྱ་པའི་ཆོས་འབྱུང་། འདག་པའི་ཚེ་འཕེལ། སྐྱེ་ཡི་བློ་ལྡན། འབྲོག་པའི་ཚེ་བ། འོད་ལྟའི་ད་འཕེལ།
སྤྲེ་གུ་ནས་ཨ་འཇམ། རབ་གསལ་རྒྱ་དར་བཅས་གཙོ་བོ་དབུ་པ་བཅུ་གསུམ་དེ་རྣམས་རེ་རེ་ལ་འཁོར་གསུམ་གསུམ་རེ་ཡོད་པ་བྱས་ནས་ཁྱོན་
བསྡོམས་བཅུ་ཕྲག་ལྔ་རེ་ལས་ལྷག་ཙམ་ཡོད་པས་སྐྱེས་རབས་རྣམས་དེ་ལྟར་བྲིས་པ་ཡིན། བསོད་ནམས་རྟོགས་བརྗོད་གཙོ་བོ་གྲོང་འགོ་ཚེ་དར་
དང་འཁོར་རྣམས་དྭགས་ལའི་བསོད་སྟོབས་གཉིས་ཁོ་ན་ཡིན། ༈ དེ་ནས་ཆོས་སྐྱོང་ནོར་ལྷའི་སྐོར་རྣམས་དབུ་བཙུགས་སྐབས་སུ་ནུབ་གཅིག་
ཐོ་རངས་ཀྱི་ཆ་ལ་གཙུག་ལག་(ཁང)དེ་བའི་སྟེང་ནས་སྤྲུལ་པའི་ཆོས་སྐྱོང་བྱ་རོག་སྐད་གྲགས་ཤར་མང་དུ་ཞག་གསུམ་གྱི་བར་བྱས་པ་ཚད་མེད་
ཐུགས་རྗེའི་མངའ་བདག་བླ་མ་རིན་པོ་ཆེ་བློ་གྲོས་དོན་ལྡན་ལ་སོགས་པས་གསན། དེ་སྐབས་ཕལ་ཆེར་ཐམས་ཅད་ལ་ཆོས་སྐྱོང་དྲག་རྩལ་ཆེ་བ་
རྨི་ལམ་དུ་འདུག་ཟེར་བ་དང་། ཁྱད་པར་དཔལ་མགོན་གདོང་བཞི་པ་འདི་སྤྲུལ་པའི་རང་བཟོ་ཆེན་པོ་ཆོས་འགྲུབ་ཀྱིས་སྐྱ་རིས་དང་གཟུགས་
བསྐྱོད་སྤྱན་ཞལ་ཕྱེ་བ་དང་། གཞན་ཚོན་མདངས་རི་མོ་རྣམས་ཆོས་སྐྱོང་དེའི་བསྙེན་སྒྲུབ་ལ་བརྩོན་པའི་དབུ་མཛད་བཀྲ་ཤིས་དབང་རྒྱལ་དང་
ཁོང་རྣམ་གཉིས་ཀྱིས་མཛད་སྐབས་རྨི་ལམ་ལ་སོགས་པ་མཐོང་སྣང་ཆོ་འཕྲུལ་མཚན་མ་དུ་མ་བྱུང་ནས། དེ་མ་ཐག་འཕྲལ་དུ་མཐའ་རྫོགས་དགོས་
པའི་རྐྱེན་བྱས་སོ། །སྤྱིར་རྨ་ཡོན་ཁོང་གིས་དཔལ་མགོན་བྲམ་གཟུགས་དང་གདོང་བཞི་པ་བྲིས་ཚད་ཐམས་ཅད་བྲི་བའི་སྔ་རོལ་རྨི་ལམ་དུ་འབྱོན་
པའི་མཚན་མ་རེ་ཡོད་པ་དང་། ལྷག་པར་འདི་ལ་རབ་འབྱམས་ཆོས་ཀྱི་རྒྱལ་པོས་ཆེད་དུ། ཆོས་སྡེ་འདིའི་བསྟན་པའི་སྲུང་མ་ཡིན་སྟབས་ཤིན་ཏུ་
མྱུར་ཟབ་ཆེ་བ་ཡིན་གསུངས་ནས་ཡོངས་སུ་གྲགས་སོ། །
(སྤྱིར་བརྡ་གསར་རྙིང་གི་བར་ཁྱད་དང་། ཁྱད་པར་དུ་མཁན་ཆེན་དཔལ་ལྡན་ཆོས་སྐྱོང་དང་། ཚེ་རིང་དོན་ལྡན། འབར་བའི་རྡོ་རྗེ་བཅས་ཁོང་རྣམ་གསུམ་གྱིས་མཛད་པའི་
དཀར་ཆག་ནི་ཡིག་ཚུགས་སོགས་སྤུས་ཞན་པ། ཕྱག་དམ་མེད་པ། གསར་དུ་སྐྲུན་ཚུལ་ཁ་གསལ་བ་སོགས་ལ་དཔགས་པས་སྐྱར་བཤུས་ཡང་བཤུས་སུ་སོང་གཤིས། ཡིག་ནོར་མང་
ཙམ་དང་ལྷག་ཆད་ཤོར་བ་ངེས་མོད། མ་ཡིག་ཇི་བཞིན་ལ་ཟླ་ཁྱིམ་དུ་ཡིག་ཆུང་གི་མཆན་བཏབ་པ་ལས་བཅོས་མེད། ཅེས་བསེ་མཁར་ཀུན་དགའ་ཚེ་རིང་གིས་རབ་རྒྱན་ལྕགས་
སྦྲུལ། ཕྱི་ལུགས་༢༠༠༡ལོའི་ཟླ་ཚེས་དགེ་བ་ལ།) དཀར་ཆག་འདི་དག་གི་མ་ཡིག་ནི་ཕྲན་གྱིས་ཉར་ཚགས་ཞུས་པ་དང་། གཞན་ཡང་མཁན་བདེ་བར་གཤེགས་པ་ཤེས་རབ་ཉི་མ་
དང་། འདས་པོ་སྙིང་རྗེ་བཟང་པོ། འདས་པོ་ཟླ་བ་ཚེ་རིང་། འདས་པོ་ཀྱེའུ་རིན་ཆེན་རྣམས་ཀྱིས་ཉར་ཚགས་གནང་བ། རྒན་ངག་དབང་སེངྒེས་བཙལ་གནང་བ་བཅས་ལགས་
ཤིང་། གསུང་འབུམ་འདི་ཕྱོགས་སྒྲིག་ཞུ་སྐབས་སྤྲུལ་སྐུ་ཀུན་དགའ་བསྟན་འཕེལ་ཆོས་ཀྱི་ཉི་མས་རོགས་སྐྱོར་གནང་བ། སྐྱིད་དགེ་ལེགས་ལགས་ཀྱིས་རྩིས་འཁོར་གཡར་གནང་བ། བཀྲ་ཤིས་ཚེ་སྐྱབས་ལགས་དང་ཁོང་གི་གཅུང་ཚེ་རིང་བསམ་གྲུབ་རྣམ་གཉིས་ཀྱིས་ཞུ་དག་གནང་བ་བཅས་ལ་བཀའ་དྲིན་ཆེ་ཞེས་ཞུའོ། །

བསེ་མཁར་རྣམ་སྲས་ཀྱིས་རབ་རྒྱན་ཤིང་བྱ་ལོའི་ཟླ་༡ཚེས་༦ཉིན་སྐྱེ་མདོ་ནས།
　

བསྡོམས་ལྡེབ་ངོས་༧ཡོད། ༡༽ ༢༽ ༣༽ ༤༽ ༥༽ ༦༽ ངོས་༧པའོ།།